ଆଜି ସଂସଦ ମୌସୁମୀ ଅଧିବେଶନର ଦ୍ୱିତୀୟ ଦିନ; CJP ପ୍ରଦର୍ଶନ, NEET ପେପର ଲିକ୍ ଓ ରାମ ମନ୍ଦିର ପ୍ରସଙ୍ଗରେ ସରକାରଙ୍କୁ ଘେରିବେ ବିରୋଧୀ
ନୂଆଦିଲ୍ଲୀ: ସଂସଦର ମୌସୁମୀ ଅଧିବେଶନର ଦ୍ୱିତୀୟ ଦିନରେ ସରକାର ଓ ବିରୋଧୀଙ୍କ ମଧ୍ୟରେ ପୁଣି ମୁହାଁମୁହିଁ ହେବାର ସମ୍ଭାବନା ରହିଛି। ବିରୋଧୀ ଦଳଗୁଡ଼ିକ CJP ପ୍ରଦର୍ଶନକାରୀଙ୍କ ଉପରେ ପୁଲିସର କାର୍ଯ୍ୟାନୁଷ୍ଠାନ, NEET-UG ପେପର ଲିକ୍, ପରୀକ୍ଷା ପରିଚାଳନାରେ ଅନିୟମିତତା ଏବଂ ଅଯୋଧ୍ୟା ରାମ ମନ୍ଦିର ଟ୍ରଷ୍ଟ ସହ ଜଡ଼ିତ ଦାନ ଅର୍ଥର କଥିତ ଦୁର୍ବ୍ୟବହାର ପ୍ରସଙ୍ଗ ଉଠାଇ ଶାସକ ଦଳକୁ ଟାର୍ଗେଟ କରିବେ | ଉଭୟ ଲୋକସଭା ଓ ରାଜ୍ୟସଭାର କାର୍ଯ୍ୟବିଧି ପ୍ରଶ୍ନକାଳରୁ ଆରମ୍ଭ ହେବା ସହ ବିଭିନ୍ନ ମନ୍ତ୍ରଣାଳୟ ପକ୍ଷରୁ ରିପୋର୍ଟ ଓ ଦଲିଲ ଉପସ୍ଥାପନ କରାଯିବ।
ଏହି ଅଧିବେଶନରେ ସରକାର ପାଞ୍ଚଟି ନୂଆ ବିଲ୍ ଆଣିବାକୁ ଯୋଜନା କରିଛନ୍ତି। ସେଥିରେ ଜନ୍ମ ଓ ମୃତ୍ୟୁ ପଞ୍ଜୀକରଣ (ସଂଶୋଧନ) ବିଲ୍, ସୁପ୍ରିମକୋର୍ଟରେ ବିଚାରପତି ସଂଖ୍ୟା ବୃଦ୍ଧି ସମ୍ପର୍କିତ ବିଲ୍, ଆୟକର (ସଂଶୋଧନ) ବିଲ୍, ଜାତୀୟ ସମ୍ମାନ ଅପମାନ ନିବାରଣ (ସଂଶୋଧନ) ବିଲ୍ ଏବଂ MSME ବିକାଶ ଆଇନରେ ସଂଶୋଧନ ପ୍ରସ୍ତାବ ସାମିଲ ରହିଛି। ଏହା ସହ ବିଦେଶୀ ଅନୁଦାନ ନିୟନ୍ତ୍ରଣ (FCRA) ସଂଶୋଧନ ବିଲ୍କୁ ମଧ୍ୟ ବିଚାର ଓ ପାରିତ କରିବା ପାଇଁ ସୂଚୀଭୁକ୍ତ କରାଯାଇଛି।
ଅନ୍ୟପକ୍ଷରେ, ବିଭିନ୍ନ ମନ୍ତ୍ରଣାଳୟ ପକ୍ଷରୁ ବାର୍ଷିକ ରିପୋର୍ଟ, ଅଡିଟ୍ ରିପୋର୍ଟ, ସରକାରୀ ସମୀକ୍ଷା ଏବଂ ବୈଧାନିକ ବିଜ୍ଞପ୍ତି ସଂସଦରେ ଉପସ୍ଥାପନ କରାଯିବ। ଏଥିରେ ଗୁଣବତ୍ତା ନିୟନ୍ତ୍ରଣ ଆଦେଶ, ସାର ନିୟମ, ଦିଲ୍ଲୀ ପୁଲିସ ନିଯୁକ୍ତି ନିୟମ ଓ ନାଗରିକତା (ସଂଶୋଧନ) ନିୟମାବଳୀ-୨୦୨୬ ସମ୍ବନ୍ଧୀୟ ବିଜ୍ଞପ୍ତି ମଧ୍ୟ ସାମିଲ ରହିଛି। ବିରୋଧୀଙ୍କ ଆକ୍ରମଣ ଓ ସରକାରଙ୍କ ବିଧାନ କାର୍ଯ୍ୟସୂଚୀ ମଧ୍ୟରେ ଆଜିର ସଂସଦୀୟ କାର୍ଯ୍ୟବିଧି ଉପରେ ସମସ୍ତଙ୍କ ନଜର ରହିଛି।
