NEETକୁ ସମ୍ପୂର୍ଣ୍ଣ ବାତିଲ ଦାବି କଲା ବିଜୟଙ୍କ TVK, ରାଜ୍ୟଙ୍କୁ ମେଡିକାଲ ଶିକ୍ଷାର ପୂର୍ଣ୍ଣ ଅଧିକାର ଦେବାକୁ ଦାବି
NEET ପ୍ରଶ୍ନପତ୍ର ଲିକ୍କୁ ନେଇ ଦେଶବ୍ୟାପୀ ପ୍ରତିବାଦ ଜାରି ଥିବା ବେଳେ ଅଭିନେତା ବିଜୟଙ୍କ ଦଳ ତାମିଳଗା ଭେଟ୍ରି କଝଗମ (TVK) ମଙ୍ଗଳବାର ଏହି ପ୍ରସଙ୍ଗରେ କଡ଼ା ମତ ରଖିଛି। ଦଳ ସ୍ପଷ୍ଟ କରିଛି ଯେ ସେମାନେ କେବଳ NEETରେ ଅନିୟମିତତାର ବିରୋଧ କରୁନାହାନ୍ତି, ବରଂ NEET ପରୀକ୍ଷାକୁ ସମ୍ପୂର୍ଣ୍ଣ ବାତିଲ କରିବାକୁ ଦାବି କରୁଛନ୍ତି। ଏହା ସହ ମେଡିକାଲ ଶିକ୍ଷା ସମେତ ସମଗ୍ର ଶିକ୍ଷା ବ୍ୟବସ୍ଥା ଉପରେ ରାଜ୍ୟ ସରକାରଙ୍କୁ ପୂର୍ଣ୍ଣ ଅଧିକାର ଦେବାକୁ ମଧ୍ୟ ଦଳ ଦାବି କରିଛି।
TVK ଏକ ବିବୃତ୍ତିରେ କହିଛି ଯେ ଶିକ୍ଷାକୁ ସମବର୍ତ୍ତୀ ତାଲିକା (Concurrent List)ରୁ ବାହାର କରି ରାଜ୍ୟ ତାଲିକା (State List)ରେ ସାମିଲ କରାଯିବା ଉଚିତ। ଯଦି ଏଥିରେ ଆଇନଗତ କିମ୍ବା ସାମ୍ବିଧାନିକ ବାଧା ଥାଏ, ତେବେ ଅନ୍ତରୀଣ ବ୍ୟବସ୍ଥା ଭାବେ ଏକ ସ୍ୱତନ୍ତ୍ର ସମବର୍ତ୍ତୀ ତାଲିକା ଗଠନ କରି ରାଜ୍ୟଗୁଡ଼ିକୁ ମେଡିକାଲ ଶିକ୍ଷା ସମେତ ଶିକ୍ଷା କ୍ଷେତ୍ରରେ ପୂର୍ଣ୍ଣ କ୍ଷମତା ଦିଆଯାଉ। ଦଳ ଦାବି କରିଛି ଯେ ଏହା ହେଉଛି ଶିକ୍ଷା କ୍ଷେତ୍ରର ସ୍ଥାୟୀ ସମାଧାନ।
ଏହି ବିବୃତ୍ତିରେ TVK ପରୋକ୍ଷରେ DMKକୁ ମଧ୍ୟ ଟାର୍ଗେଟ କରିଛି। ଦଳ କହିଛି ଯେ ଭୋଟ ପାଇଁ ମିଛ ପ୍ରତିଶ୍ରୁତି ଦେଇ ଲୋକଙ୍କୁ ବିଭ୍ରାନ୍ତ କରିବାର ରାଜନୀତି ସେମାନେ କରିବେ ନାହିଁ। ୨୦୨୧ ବିଧାନସଭା ନିର୍ବାଚନ ପୂର୍ବରୁ DMK କ୍ଷମତାକୁ ଆସିଲେ NEET ବାତିଲ କରିବ ବୋଲି ପ୍ରତିଶ୍ରୁତି ଦେଇଥିଲା। ସେହିପରି, ଅନ୍ୟମାନଙ୍କ ଆନ୍ଦୋଳନ ଓ ଚିନ୍ତାଧାରାକୁ ନିଜର ବୋଲି ଦାବି କରି ରାଜନୀତି କରିବା ବନ୍ଦ କରିବାକୁ ମଧ୍ୟ TVK ଆହ୍ୱାନ ଜଣାଇଛି। ଦିଲ୍ଲୀରେ NEETକୁ ନେଇ ଛାତ୍ରଛାତ୍ରୀଙ୍କ ଆନ୍ଦୋଳନ ଜାରି ଥିବା ବେଳେ ଏବଂ ତାମିଳନାଡୁରେ ରାପ୍ ଗାୟକ ‘ଥେରୁକ୍କୁରାଲ୍ ଅରିଭୁ’ଙ୍କ NEET ବିରୋଧୀ ପ୍ରତିବାଦକୁ ନେଇ ବିବାଦ ବଢ଼ୁଥିବା ସମୟରେ TVKର ଏହି ମତ ରାଜ୍ୟର ରାଜନୀତିକୁ ଆହୁରି ସରଗରମ କରିଛି।
