ପରୀକ୍ଷା ସଂସ୍କାର ପାଇଁ ନନ୍ଦନ ନୀଳେକାନିଙ୍କ ନେତୃତ୍ୱରେ ହାଇପାୱାର ଟାସ୍କଫୋର୍ସ, ଘୋଷଣା କଲେ ପ୍ରଧାନମନ୍ତ୍ରୀ ମୋଦୀ
ପ୍ରଶ୍ନପତ୍ର ଲିକ୍ ବିବାଦ ପରେ ଦେଶର ପରୀକ୍ଷା ବ୍ୟବସ୍ଥାରେ ବଡ଼ ଧରଣର ସଂସ୍କାର ଆଣିବାକୁ କେନ୍ଦ୍ର ସରକାର ପଦକ୍ଷେପ ନେଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ଘୋଷଣା କରିଛନ୍ତି ଯେ, Infosysର ସହ-ପ୍ରତିଷ୍ଠାତା ଏବଂ ପ୍ରଯୁକ୍ତି ବିଶେଷଜ୍ଞ ନନ୍ଦନ ନୀଳେକାନିଙ୍କ ନେତୃତ୍ୱରେ ଏକ ହାଇପାୱାର ଟାସ୍କଫୋର୍ସ ଗଠନ କରାଯିବ। ଏହି ଟାସ୍କଫୋର୍ସ ଭାରତର ପରୀକ୍ଷା ବ୍ୟବସ୍ଥାକୁ ଅଧିକ ନିର୍ଭରଯୋଗ୍ୟ, ସ୍ୱଚ୍ଛ ଏବଂ ପ୍ରଯୁକ୍ତିନିର୍ଭର କରିବା ପାଇଁ ସରକାରଙ୍କୁ ସୁପାରିସ ଦେବ।
ପ୍ରଧାନମନ୍ତ୍ରୀ କହିଛନ୍ତି, ଛାତ୍ରଛାତ୍ରୀଙ୍କ ଭବିଷ୍ୟତ ସୁରକ୍ଷା ପାଇଁ ସରକାର ଲଗାତାର ପଦକ୍ଷେପ ନେଉଛନ୍ତି। ପ୍ରଶ୍ନପତ୍ର ଲିକ୍ରେ ସମ୍ପୃକ୍ତ ଅଭିଯୁକ୍ତମାନେ କାରାଗାରରେ ଅଛନ୍ତି, ଫାଷ୍ଟ-ଟ୍ରାକ୍ କୋର୍ଟ ଗଠନ କରାଯାଇଛି ଏବଂ ସଂସଦରେ କଠୋର ଦଣ୍ଡବିଧାନ ସହ ନୂଆ ଆଇନ ଆଣିବା ପାଇଁ ସରକାର ଆଗକୁ ବଢ଼ୁଛନ୍ତି। ସେ କହିଛନ୍ତି, ନନ୍ଦନ ନୀଳେକାନିଙ୍କ ଟାସ୍କଫୋର୍ସ ରିପୋର୍ଟ ଆଧାରରେ ଆଗାମୀ ପରୀକ୍ଷାଗୁଡ଼ିକୁ ଅଧିକ ବିଶ୍ୱସନୀୟ କରିବା ଦିଗରେ କାର୍ଯ୍ୟ କରାଯିବ।
ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଏବଂ ପ୍ରଶ୍ନପତ୍ର ଲିକ୍କୁ ନେଇ ଚାଲିଥିବା ଛାତ୍ର ଆନ୍ଦୋଳନ ଶେଷ ହେବାର ଗୋଟିଏ ଦିନ ପରେ ଏହି ଘୋଷଣା ଆସିଛି। ପ୍ରଧାନମନ୍ତ୍ରୀ କହିଛନ୍ତି, ଭବିଷ୍ୟତରେ ପରୀକ୍ଷା ପ୍ରକ୍ରିୟାକୁ ଅଧିକ ସ୍ୱଚ୍ଛ, ନିର୍ଭରଯୋଗ୍ୟ ଏବଂ ପ୍ରଯୁକ୍ତି ଆଧାରିତ କରିବା ହିଁ ସରକାରଙ୍କ ଲକ୍ଷ୍ୟ।
