ହସ୍ପିଟାଲରୁ ସିଧା ରାଜଘାଟ ଗଲେ ସୋନମ ୱାଙ୍ଗଚୁକ୍; କହିଲେ- ‘ଆଜି ବି ବାପୁଙ୍କ ଅହିଂସାର ପଥ ହିଁ ସବୁଠାରୁ ଶକ୍ତିଶାଳୀ’
ନୂଆଦିଲ୍ଲୀ: ନିଟ୍ ପେପର ଲିକ୍ ପ୍ରସଙ୍ଗକୁ ନେଇ ଦିଲ୍ଲୀର ଜନ୍ତରମନ୍ତରରେ ହୋଇଥିବା ଦୀର୍ଘ ୨୬ ଦିନିଆ ଅନଶନ ଶେଷ କରି ହସ୍ପିଟାଲରୁ ଡିସଚାର୍ଜ ହେବା ପରେ ପରିବେଶ କର୍ମୀ ସୋନମ ୱାଙ୍ଗଚୁକ୍ ସିଧାସଳଖ ରାଜଘାଟ ପହଞ୍ଚି ମହାତ୍ମା ଗାନ୍ଧୀଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି। ପତ୍ନୀ ଗୀତାଞ୍ଜଳିଙ୍କ ସହ ରାଜଘାଟ ଯାଇ ସେ କହିଛନ୍ତି ଯେ, ଗାନ୍ଧୀଜୀଙ୍କ ଦେଖାଇଥିବା ଅହିଂସା ଓ ଶାନ୍ତିର ପଥ ଆଜି ମଧ୍ୟ ସମାନ ଭାବେ ପ୍ରାସଙ୍ଗିକ। ହିଂସା ନୁହେଁ, ବରଂ ନିଜେ କଷ୍ଟ ସହି ସତ୍ୟ ପାଇଁ ଲଢ଼ିବା ହିଁ ଯେକୌଣସି ଆନ୍ଦୋଳନର ସବୁଠାରୁ ବଡ଼ ଶକ୍ତି ବୋଲି ସେ କହିଛନ୍ତି।
ୱାଙ୍ଗଚୁକ୍ କହିଛନ୍ତି, ୨୬ ଦିନର ଉପବାସ ଓ ଆନ୍ଦୋଳନ ପରେ ସେ ପ୍ରଥମେ ବାପୁଙ୍କୁ ସ୍ମରଣ କରିବାକୁ ରାଜଘାଟ ଆସିଥିଲେ। ଅନେକ ଲୋକ ଅହିଂସାମୂଳକ ପ୍ରତିବାଦର ପ୍ରଭାବକୁ ପ୍ରଶ୍ନ କରୁଥିବାବେଳେ, ନିଜ ଅଭିଜ୍ଞତାରୁ ଏହା ସଫଳ ବୋଲି ସେ ପୁଣିଥରେ ଅନୁଭବ କରିଥିବା କହିଛନ୍ତି। ଆନ୍ଦୋଳନ ସମୟରେ ଦେଶର ବିଭିନ୍ନ ସ୍ଥାନରୁ ଲୋକଙ୍କ ସମର୍ଥନ ମିଳିଥିବାରୁ ସେ ସମସ୍ତଙ୍କୁ କୃତଜ୍ଞତା ଜଣାଇଥିଲେ। ଯୁବପିଢ଼ି ଶାନ୍ତିପୂର୍ଣ୍ଣ ଭାବେ ଆନ୍ଦୋଳନକୁ ପରିଚାଳନା କରିଥିବାରୁ ସେ ସେମାନଙ୍କୁ ପ୍ରଶଂସା କରିଥିଲେ।
ହସ୍ପିଟାଲରୁ ଡିସଚାର୍ଜ ହେବା ପରେ ସୋସିଆଲ ମିଡିଆରେ ଜାରି କରିଥିବା ଭିଡିଓ ବାର୍ତ୍ତାରେ ୱାଙ୍ଗଚୁକ୍ କହିଛନ୍ତି ଯେ, ବର୍ତ୍ତମାନ ସେ ସୁସ୍ଥ ଅନୁଭବ କରୁଛନ୍ତି, ଖାଦ୍ୟ ଗ୍ରହଣ କରୁଛନ୍ତି ଏବଂ ଧୀରେ ଧୀରେ ଶକ୍ତି ଫେରି ପାଉଛନ୍ତି। ଘରକୁ ଫେରିବା ପୂର୍ବରୁ ବାପୁଙ୍କୁ ଶ୍ରଦ୍ଧାଞ୍ଜଳି ଜଣାଇବା ତାଙ୍କର ପ୍ରଥମ ଇଚ୍ଛା ଥିଲା ବୋଲି ସେ କହିଛନ୍ତି। ଏହି ଆନ୍ଦୋଳନକୁ ସଫଳ କରିବାରେ ସହଯୋଗ କରିଥିବା ସମସ୍ତ ଦେଶବାସୀଙ୍କୁ ସେ ଧନ୍ୟବାଦ ଜଣାଇବା ସହ ଭବିଷ୍ୟତରେ ମଧ୍ୟ ଶାନ୍ତି ଓ ଅହିଂସାର ପଥରେ ସାମାଜିକ ପରିବର୍ତ୍ତନ ଆଣିବାକୁ ଆହ୍ୱାନ ଦେଇଛନ୍ତି।
