ରାଜନୀତିକୁ ଆସିବେ କି ତାମିଲ ସୁପରଷ୍ଟାର ଧନୁଷ? ଗୋଟିଏ ଭାଷଣ ପରେ ବଢ଼ିଲା ଚର୍ଚ୍ଚା, TVK ସହ ହେଉଛି ତୁଳନା
ତାମିଲନାଡୁ: ତାମିଲ ସୁପରଷ୍ଟାର ଧନୁଷଙ୍କ ଏକ ସାର୍ବଜନୀନ ଭାଷଣ ପରେ ତାମିଲନାଡୁରେ ତାଙ୍କ ରାଜନୀତି ପ୍ରବେଶକୁ ନେଇ ଚର୍ଚ୍ଚା ଜୋର ଧରିଛି। ତିରୁଭାଲ୍ଲୁରରେ ଆୟୋଜିତ ଏକ ରକ୍ତଦାନ ଶିବିରରେ ଧନୁଷ ନିଜ ପ୍ରଶଂସକଙ୍କୁ କେବଳ ଫିଲ୍ମ ଉତ୍ସବ କିମ୍ବା ମିଳନ ସଭାରେ ସୀମିତ ନ ରହି ସମାଜସେବା ଓ ଜନକଲ୍ୟାଣମୂଳକ କାର୍ଯ୍ୟରେ ସକ୍ରିୟ ହେବାକୁ ଆହ୍ୱାନ କରିଥିଲେ। ସେ କହିଥିଲେ, ନିଜ ଅଞ୍ଚଳର ଲୋକଙ୍କ ସମସ୍ୟା ବୁଝି ସେମାନଙ୍କ ପାଇଁ କାମ କରନ୍ତୁ, ଯାହାଦ୍ୱାରା ମୋତେ ଆପଣମାନଙ୍କ ଉପରେ ଆହୁରି ଗର୍ବ ଅନୁଭବ ହେବ। ଏହି ଭାଷଣ ପରେ ସୋସିଆଲ ମିଡିଆରେ “ରାଜନୀତିକୁ ସ୍ୱାଗତ ଧନୁଷ” ପରି ମନ୍ତବ୍ୟ ଭାଇରାଲ୍ ହୋଇଛି।
ଏହି ଚର୍ଚ୍ଚାକୁ ଆହୁରି ବଳ ଦେଇଛି ଧନୁଷଙ୍କ ପ୍ରଶଂସକ ସଂଗଠନର କିଛି ନୂଆ ପଦକ୍ଷେପ। ନିକଟରେ ସେମାନେ ଧନୁଷଙ୍କ ଛବି ଥିବା ଲାଲ୍-ଧଳା ପତାକା ଉନ୍ମୋଚନ କରିଥିବାବେଳେ “ଏନ୍ନମ୍ପୋଲ୍ ଥାନ୍ ଭାଜ୍କାଇ” ସ୍ଲୋଗାନ୍ ମଧ୍ୟ ସାମ୍ନାକୁ ଆସିଛି। ଧନୁଷଙ୍କ ପିତା ତଥା ନିର୍ଦ୍ଦେଶକ କସ୍ତୁରୀ ରାଜାଙ୍କୁ ତାଙ୍କ ପୁଅଙ୍କ ରାଜନୀତି ପ୍ରବେଶ ସମ୍ପର୍କରେ ପଚରାଯିବାରୁ ସେ ସିଧାସଳଖ ଖଣ୍ଡନ କରିନଥିଲେ। ତେବେ ଧନୁଷ କିମ୍ବା ତାଙ୍କ ଟିମ୍ ପକ୍ଷରୁ ଏପର୍ଯ୍ୟନ୍ତ କୌଣସି ରାଜନୈତିକ ଘୋଷଣା କରାଯାଇନାହିଁ।
ଏହି ପରିସ୍ଥିତିରେ ଧନୁଷଙ୍କ ସହ ମୁଖ୍ୟମନ୍ତ୍ରୀ ତଥା TVK ନେତା ବିଜୟଙ୍କ ତୁଳନା କରାଯାଉଛି। ବିଶ୍ଳେଷକଙ୍କ ମତରେ, ବିଜୟଙ୍କ ସଫଳତାର ପଛରେ ବର୍ଷ ବର୍ଷ ଧରି ଗଢ଼ିଉଠିଥିବା ସଂଗଠନାତ୍ମକ ଭିତ୍ତି ରହିଥିଲା। ଅନ୍ୟପକ୍ଷରେ ଧନୁଷଙ୍କ ପ୍ରଶଂସକ ସଂଗଠନ ଏବେ ବି ସାମାଜିକ ସେବାରେ ସୀମିତ ରହିଛି, ନିର୍ବାଚନୀ ସଂଗଠନର ରୂପ ନେଇନାହିଁ। ତେବେ ରାଜନୀତିକୁ ଆସିବାକୁ ହେଲେ ତାଙ୍କୁ କେବଳ ଲୋକପ୍ରିୟତା ନୁହେଁ, ବରଂ ସୁଦୃଢ଼ ସଂଗଠନ, ସ୍ପଷ୍ଟ ରାଜନୈତିକ ଆଦର୍ଶ ଓ ଜନସାଧାରଣଙ୍କ ପ୍ରମୁଖ ପ୍ରସଙ୍ଗରେ ନିଜର ଅବସ୍ଥାନ ସ୍ପଷ୍ଟ କରିବାକୁ ପଡ଼ିବ ବୋଲି ରାଜନୈତିକ ମହଲରେ ମତ ପ୍ରକାଶ ପାଉଛି।
