ଆମେରିକାରୁ ୨୫% ଏଲପିଜି କିଣିବ ଭାରତ! ବାଣିଜ୍ୟ ଚୁକ୍ତି ଓ ଯୋଗାଣ ସୁରକ୍ଷା ଉପରେ ଫୋକସ୍
ନୂଆଦିଲ୍ଲୀ: ଭାରତ ୨୦୨୭ ମସିହାରୁ ନିଜର ମୋଟ ଏଲପିଜି ଆମଦାନୀର ପ୍ରାୟ ୨୫ ପ୍ରତିଶତ ଆମେରିକାରୁ କ୍ରୟ କରିବାକୁ ଯୋଜନା କରୁଥିବା ସୂଚନା ମିଳିଛି। ପଶ୍ଚିମ ଏସିଆ ଉପରେ ନିର୍ଭରଶୀଳତା କମାଇବା ସହ ଆମେରିକା ସହ ପ୍ରସ୍ତାବିତ ବାଣିଜ୍ୟ ଚୁକ୍ତିକୁ ଆଗକୁ ବଢ଼ାଇବା ଏହାର ମୁଖ୍ୟ ଉଦ୍ଦେଶ୍ୟ ବୋଲି କୁହାଯାଉଛି। ସରକାରୀ ତୈଳ ବିପଣନ କମ୍ପାନୀ ଇଣ୍ଡିଆନ୍ ଅଏଲ୍, ବିପିସିଏଲ୍ ଓ ଏଚପିସିଏଲ୍ ଖୁବଶୀଘ୍ର ଏହି ସମ୍ପର୍କରେ ଟେଣ୍ଡର ଜାରି କରିପାରନ୍ତି ଏବଂ ଏକ ପ୍ରତିନିଧି ଦଳ ଆମେରିକା ଗସ୍ତ କରି ଆଲୋଚନା ମଧ୍ୟ କରିବାର ସମ୍ଭାବନା ରହିଛି ବୋଲି ସୂଚନାରୁ ଜଣାପଡିଛି |
ତେବେ ଏହି ନିଷ୍ପତ୍ତିକୁ କେବଳ ବାଣିଜ୍ୟିକ ଦୃଷ୍ଟିକୋଣରୁ ନୁହେଁ, ବରଂ ଭୂ-ରାଜନୈତିକ ରଣନୀତି ଭାବେ ମଧ୍ୟ ଦେଖାଯାଉଛି। ଆମେରିକାରୁ ଅଧିକ ପରିମାଣରେ ଏନର୍ଜି କ୍ରୟ କଲେ ଦୁଇ ଦେଶ ମଧ୍ୟରେ ବାଣିଜ୍ୟ ସନ୍ତୁଳନରେ ସୁଧାର ଆସିପାରେ, ଯାହାକୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦୀର୍ଘଦିନ ଧରି ଗୁରୁତ୍ୱ ଦେଇଆସୁଛନ୍ତି। ଭାରତ ଆଗାମୀ କିଛି ମାସ ମଧ୍ୟରେ ଆମେରିକା ସହ ବହୁ ପ୍ରତୀକ୍ଷିତ ବାଣିଜ୍ୟ ଚୁକ୍ତି ସମ୍ପନ୍ନ କରିବାକୁ ଉଦ୍ୟମ କରୁଥିବାରୁ ଏହି ପଦକ୍ଷେପ ସେହି ଦିଗରେ ସହାୟକ ହୋଇପାରେ। ଭାରତ ପୂର୍ବରୁ ଆମେରିକାରୁ ଏନର୍ଜି କ୍ରୟକୁ ୧୦ ବିଲିୟନ ଡଲାରରୁ ବଢ଼ାଇ ୨୫ ବିଲିୟନ ଡଲାର କରିବାର ପ୍ରତିଶ୍ରୁତି ଦେଇସାରିଛି।
ବିଶେଷଜ୍ଞମାନଙ୍କ ମତରେ, ଏହି ପଦକ୍ଷେପରୁ ଉଭୟ ଦେଶ ଲାଭବାନ ହୋଇପାରନ୍ତି। ଭାରତ ପାଇଁ ଏହା ଯୋଗାଣ ସୁରକ୍ଷା ବଢ଼ାଇବା, ପଶ୍ଚିମ ଏସିଆ ଉପରେ ନିର୍ଭରଶୀଳତା କମାଇବା ଏବଂ ଭୂ-ରାଜନୈତିକ ବିପଦକୁ ହ୍ରାସ କରିବାର ସୁଯୋଗ ହେବ। ଅନ୍ୟପକ୍ଷରେ, ଆମେରିକା ପାଇଁ ଏହା ବଡ଼ ରପ୍ତାନି ବଜାର ଏବଂ ବାଣିଜ୍ୟିକ ଲାଭ ଆଣିବ। ତେଣୁ ଏହି ଚୁକ୍ତିକୁ କେବଳ ଟ୍ରମ୍ପଙ୍କ ଦାବି ପୂରଣ ଭାବେ ନୁହେଁ, ବରଂ ଭାରତର ଦୀର୍ଘମିଆଦି ଏନର୍ଜି ସୁରକ୍ଷା ରଣନୀତିର ଏକ ଅଂଶ ବୋଲି ମଧ୍ୟ ବିଶ୍ଳେଷକମାନେ ମତ ଦେଉଛନ୍ତି।
ଚଳିତ ବର୍ଷ ପଶ୍ଚିମ ଏସିଆର ଭୂ-ରାଜନୈତିକ ପରିସ୍ଥିତି ଓ ଯୋଗାଣ ବାଧା କାରଣରୁ ଭାରତ ଏଲପିଜି ସଙ୍କଟର ସମ୍ମୁଖୀନ ହୋଇଥିଲା। ଏହା ପରେ ସରକାର ଆମଦାନୀ ଉତ୍ସରେ ବିବିଧୀକରଣ ଉପରେ ଗୁରୁତ୍ୱ ଦେଉଛନ୍ତି। ବର୍ତ୍ତମାନ ଭାରତର ପ୍ରାୟ ୯୦ ପ୍ରତିଶତ ଏଲପିଜି ପଶ୍ଚିମ ଏସିଆରୁ ଆସୁଥିବା ବେଳେ ଦେଶର ମୋଟ ବ୍ୟବହାରର ପ୍ରାୟ ୬୬ ପ୍ରତିଶତ ଆମଦାନୀ ଉପରେ ନିର୍ଭରଶୀଳ। ଏହି ପରିସ୍ଥିତିରେ ଆମେରିକା ସମେତ ଅନ୍ୟ ଦେଶରୁ କ୍ରୟ ବଢ଼ାଇ ଯୋଗାଣ ସୁରକ୍ଷାକୁ ମଜବୁତ କରିବାକୁ ସରକାର ପଦକ୍ଷେପ ନେଉଛନ୍ତି।
