ତାମିଲନାଡୁରେ ପୂର୍ବତନ ମନ୍ତ୍ରୀ ସେନ୍ଥିଲବାଲାଜୀଙ୍କୁ ନେଇ ବଡ଼ ଆକ୍ସନ; ୪୧ ସ୍ଥାନରେ ଭିଜିଲାନ୍ସର ଚଢ଼ାଉ
ତାମିଲନାଡୁ: ତାମିଲନାଡୁରେ ଟାସ୍ମାକ୍ (TASMAC)ରେ କଥିତ ଦୁର୍ନୀତି ଓ ଅର୍ଥ ଆତ୍ମସାତ୍ ମାମଲାରେ ରାଜ୍ୟ ଭିଜିଲାନ୍ସ ଏବଂ ଦୁର୍ନୀତି ନିବାରଣ ନିର୍ଦ୍ଦେଶାଳୟ (DVAC) ବଡ଼ ଧରଣର ଚଢ଼ାଉ କରିଛି। ମଙ୍ଗଳବାର ରାଜ୍ୟର ୪୧ଟି ସ୍ଥାନରେ ଏକକାଳୀନ ତଲାସି ଚାଲିଥିବା ବେଳେ ପୂର୍ବତନ ମନ୍ତ୍ରୀ ତଥା DMK ବିଧାୟକ ଭି. ସେନ୍ଥିଲବାଲାଜୀଙ୍କ କରୁରସ୍ଥିତ ବାସଭବନ ଏବଂ ତାଙ୍କ ସହଯୋଗୀଙ୍କ ଘରେ ମଧ୍ୟ ଚଢ଼ାଉ କରାଯାଇଛି। ଚେନ୍ନାଇର ଏକ ବେସରକାରୀ ହୋଟେଲରେ ରହୁଥିବା ସେନ୍ଥିଲବାଲାଜୀଙ୍କୁ ମଧ୍ୟ ଡିଭିଏସି ଅଧିକାରୀମାନେ ପଚରାଉଚରା କରିଛନ୍ତି।
ଡିଭିଏସି ପୂର୍ବତନ ମନ୍ତ୍ରୀ ସେନ୍ଥିଲବାଲାଜୀ, ଟାସ୍ମାକ୍ର ପୂର୍ବତନ ପରିଚାଳନା ନିର୍ଦ୍ଦେଶକ ଏବଂ କିଛି ଅଧିକାରୀଙ୍କ ବିରୋଧରେ ଅନିୟମିତତା ଅଭିଯୋଗରେ ମାମଲା ରୁଜୁ କରିଛି। ସେନ୍ଥିଲବାଲାଜୀ ପୂର୍ବ DMK ସରକାରରେ ନିଷେଧାଜ୍ଞା ଓ ଅବକାରୀ ମନ୍ତ୍ରୀ ଭାବେ କାର୍ଯ୍ୟ କରିଥିଲେ ଏବଂ ସରକାରୀ ମଦ ବିକ୍ରୟ ସଂସ୍ଥା ଟାସ୍ମାକ୍ର ଦାୟିତ୍ୱ ତାଙ୍କ ଅଧୀନରେ ଥିଲା।
ଏହି ମାମଲାରେ ଡିଭିଏସି ତିରୁଭାରୁରସ୍ଥିତ ମଦ ଉତ୍ପାଦନକାରୀ ସଂସ୍ଥା ‘ଗୋଲ୍ଡେନ୍ ଭ୍ୟାଟ୍ସ ପ୍ରାଇଭେଟ୍ ଲିମିଟେଡ୍’ରେ ମଧ୍ୟ ତଲାସି କରିଛି। ତଦନ୍ତକାରୀ ସଂସ୍ଥାର ଅଭିଯୋଗ ଅନୁସାରେ, ଏହି ସଂସ୍ଥାର ସମ୍ପର୍କ DMK ସାଂସଦ ଟି.ଆର୍. ବାଲୁଙ୍କ ସହ ରହିଛି। ଚେନ୍ନାଇ, କରୁର, ତିରୁଭାରୁର, କୋଏମ୍ବାଟୁର, ଇରୋଡ୍, ତଞ୍ଜାଭୁର ସମେତ ଅନେକ ଜିଲ୍ଲାରେ ଚଢ଼ାଉ ଜାରି ରହିଛି। ଶାସକ TVK ଦଳ ପୂର୍ବରୁ ଟାସ୍ମାକ୍ରେ ଦୁର୍ନୀତି ନେଇ ସେନ୍ଥିଲବାଲାଜୀଙ୍କ ବିରୋଧରେ ଅଭିଯୋଗ କରୁଥିବା ବେଳେ DMK ସମସ୍ତ ଅଭିଯୋଗକୁ ଖଣ୍ଡନ କରିଛି।
