ବସ୍ ଡ୍ରାଇଭରଙ୍କ ଘରେ ପୋଲିସର ଚଢ଼ାଉ: ମିଳିଲା ୧୫ କିଲୋ ସୁନା, ୨୦ କୋଟି ନଗଦ ଟଙ୍କା! ତଦନ୍ତରେ ବଡ଼ ଦୁର୍ନୀତିର ସନ୍ଦେହ
ପଶ୍ଚିମବଙ୍ଗ: ପଶ୍ଚିମବଙ୍ଗର ବୀରଭୂମ ଜିଲ୍ଲାରେ ଜଣେ ପୂର୍ବତନ ସରକାରୀ ବସ୍ ଡ୍ରାଇଭରଙ୍କ ଘରେ ପୋଲିସର ଚଢ଼ାଉ ବେଳେ ବିପୁଳ ପରିମାଣର ନଗଦ ଟଙ୍କା ଓ ସୁନା ଜବତ ହୋଇଥିବା ଘଟଣା ଚର୍ଚ୍ଚାର ବିଷୟ ପାଲଟିଛି। ପୋଲିସ ଦାବି ଅନୁସାରେ, ଘରୁ ପ୍ରାୟ ୧୫ କିଲୋଗ୍ରାମ ସୁନା ବିସ୍କୁଟ ଓ ପ୍ରାୟ ୨୦ କୋଟି ଟଙ୍କା ନଗଦ ଜବତ କରାଯାଇଛି। ଏହି ନଗଦ ଅର୍ଥକୁ ଗଣନା କରିବା ପାଇଁ ୫ଟି କରେନ୍ସି କାଉଣ୍ଟିଂ ମେସିନ୍ ବ୍ୟବହାର କରାଯାଇଥିବା ବେଳେ, ଜବତ ସମ୍ପତ୍ତିକୁ ନେବା ପାଇଁ ୫ଟି ବଡ଼ ଧାତୁ ବାକ୍ସର ଆବଶ୍ୟକତା ପଡ଼ିଥିଲା।
ସୂଚନା ଅନୁଯାୟୀ, ପୋଲିସ ପଥର ବ୍ୟବସାୟୀ ଟୁଲୁ ମଣ୍ଡଳଙ୍କ ପତ୍ନୀ ଏବଂ ପୂର୍ବତନ ସରକାରୀ ବସ୍ ଡ୍ରାଇଭର ମିନାର ମଣ୍ଡଳଙ୍କ ଘରେ ଚଢ଼ାଉ କରିଥିଲା। ଦେଉଚା ଅଞ୍ଚଳରେ ହୋଇଥିବା ଏହି ଚଢ଼ାଉ ପଥର ବ୍ୟବସାୟ ସହ ଜଡ଼ିତ କଥିତ ଆର୍ଥିକ ଅନିୟମିତତାର ତଦନ୍ତର ଏକ ଅଂଶ ବୋଲି ପୋଲିସ କହିଛି। ଚଢ଼ାଉ ସମୟରେ ୩୫ଟି ବସ୍ତାରେ ପ୍ୟାକ୍ ହୋଇଥିବା ନଗଦ ଅର୍ଥ ଓ ସୁନା ଜବତ ହୋଇଥିବା ସୂଚନା ମିଳିଛି।
ପ୍ରାଥମିକ ତଦନ୍ତରେ ଏହି ମାମଲା ପଥର ଶିଳ୍ପରେ ହୋଇଥିବା କଥିତ ବେଆଇନ ଆର୍ଥିକ କାରବାର ସହ ଜଡ଼ିତ ଥିବା ସନ୍ଦେହ କରାଯାଉଛି। ପୋଲିସର ସୂଚନା ଅନୁସାରେ, ପଥର ଶିଳ୍ପରୁ ଆଦାୟ ହେଉଥିବା ବିପୁଳ ଟିକସ ରାଶିରେ ଅନିୟମିତତା ହୋଇଥିବା ଅଭିଯୋଗ ରହିଛି। ନଗଦ ଟଙ୍କା ଓ ସୁନାର ପ୍ରକୃତ ଉତ୍ସ, ସମ୍ପୃକ୍ତ ବ୍ୟକ୍ତିଙ୍କ ଭୂମିକା ଏବଂ ସମ୍ଭାବ୍ୟ ଆର୍ଥିକ ଦୁର୍ନୀତିର ଦିଗକୁ ନେଇ ପୋଲିସ ତଦନ୍ତ ଜାରି ରଖିଛି।
