ବିହାରର ପଞ୍ଚାୟତିରାଜ ମନ୍ତ୍ରୀ ଦୀପକ ପ୍ରକାଶଙ୍କ ନିଯୁକ୍ତିକୁ ନେଇ ପ୍ରଶ୍ନ ଉଠାଇଲେ ସୁପ୍ରିମକୋର୍ଟ: କହିଲେ,”ନିର୍ବାଚିତ ନହୋଇ ୬ ମାସରୁ ଅଧିକ ସମୟ କିପରି ମନ୍ତ୍ରୀ?”
ବିହାର: ବିହାରର ପଞ୍ଚାୟତିରାଜ ମନ୍ତ୍ରୀ ଦୀପକ ପ୍ରକାଶଙ୍କ ନିଯୁକ୍ତିକୁ ନେଇ ସୁପ୍ରିମକୋର୍ଟ ଗୁରୁତ୍ୱପୂର୍ଣ୍ଣ ପ୍ରଶ୍ନ ଉଠାଇଛନ୍ତି। ବିଧାନସଭା କିମ୍ବା ବିଧାନ ପରିଷଦର ସଦସ୍ୟ ନହୋଇ ମଧ୍ୟ ସେ କିପରି ୬ ମାସରୁ ଅଧିକ ସମୟ ମନ୍ତ୍ରୀ ପଦରେ ରହିଛନ୍ତି, ସେନେଇ ବିହାର ସରକାରଙ୍କୁ ସ୍ପଷ୍ଟୀକରଣ ଦେବାକୁ ସର୍ବୋଚ୍ଚ ନ୍ୟାୟାଳୟ କହିଛନ୍ତି। ମୁଖ୍ୟ ବିଚାରପତି ସୂର୍ଯ୍ୟ କାନ୍ତ କହିଛନ୍ତି, ଏହା ସମ୍ବିଧାନର ବ୍ୟାଖ୍ୟା ସହ ଜଡ଼ିତ ଏକ ଶୁଦ୍ଧ ଆଇନଗତ ପ୍ରଶ୍ନ। ଏହି ମାମଲାର ପରବର୍ତ୍ତୀ ଶୁଣାଣି ଅଗଷ୍ଟ ୪ରେ ହେବ।
ମାମଲା ଅନୁଯାୟୀ, ଦୀପକ ପ୍ରକାଶ ପ୍ରଥମେ ନୀତିଶ କୁମାର ସରକାରରେ ୪ ମାସ ୨୬ ଦିନ ମନ୍ତ୍ରୀ ଥିଲେ। ଏପ୍ରିଲ ୧୫, ୨୦୨୬ରେ ସରକାର ଭଙ୍ଗ ହେବା ପରେ ସେ ୨୨ ଦିନ ମନ୍ତ୍ରୀ ପଦରେ ନଥିଲେ। ପରେ ମେ ୭ରେ ସମ୍ରାଟ ଚୌଧୁରୀଙ୍କ ନୂଆ ସରକାରରେ ସେ ପୁଣି ମନ୍ତ୍ରୀ ଭାବେ ଶପଥ ନେଇଥିଲେ। ତେବେ ଏହି ଦୁଇଟି କାର୍ଯ୍ୟକାଳକୁ ମିଶାଇଲେ ସେ ନିର୍ବାଚିତ ନହୋଇ ୬ ମାସରୁ ଅଧିକ ସମୟ ମନ୍ତ୍ରୀ ରହିଥିବାରୁ ତାଙ୍କ ନିଯୁକ୍ତିକୁ ଚ୍ୟାଲେଞ୍ଜ କରି ଆବେଦନ ହୋଇଛି। ଆବେଦନକାରୀ ଏହାକୁ “ସମ୍ବିଧାନ ସହ ପ୍ରତାରଣା” ବୋଲି ଦର୍ଶାଇଛନ୍ତି।
ଭାରତୀୟ ସମ୍ବିଧାନର ଅନୁଚ୍ଛେଦ ୧୬୪(୪) ଅନୁଯାୟୀ, କୌଣସି ବ୍ୟକ୍ତି ମନ୍ତ୍ରୀ ଭାବେ ଶପଥ ନେବା ପରେ ୬ ମାସ ମଧ୍ୟରେ ବିଧାନମଣ୍ଡଳର ସଦସ୍ୟ ହେବା ଆବଶ୍ୟକ, ନଚେତ ସେ ମନ୍ତ୍ରୀ ପଦ ଛାଡ଼ିବାକୁ ପଡ଼ିବ। କିନ୍ତୁ ଦୀପକ ପ୍ରକାଶଙ୍କ କ୍ଷେତ୍ରରେ ୬ ମାସର ସମୟସୀମା ନୂଆ ଶପଥ ସହ ପୁଣି ଆରମ୍ଭ ହେବ କି ନାହିଁ, ସେହି ପ୍ରଶ୍ନ ଏବେ ସୁପ୍ରିମକୋର୍ଟଙ୍କ ବିଚାରାଧୀନ। ଏହି ରାୟ ଭବିଷ୍ୟତରେ ନିର୍ବାଚିତ ନହୋଇ ମନ୍ତ୍ରୀ ହେଉଥିବା ବ୍ୟକ୍ତିମାନଙ୍କ ସମ୍ବନ୍ଧୀୟ ସାମ୍ବିଧାନିକ ବ୍ୟବସ୍ଥାକୁ ସ୍ପଷ୍ଟ କରିବ ବୋଲି ଆଇନ ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।
