ଆତଙ୍କବାଦୀ ହମିମ୍ ମଣ୍ଡଳ ମାମଲାରେ ବଡ଼ କାର୍ଯ୍ୟାନୁଷ୍ଠାନ; ପ୍ରେମିକା ଅର୍ପିତା ସରକାରକୁ ଗିରଫ କଲା ପୋଲିସ
ପଶ୍ଚିମବଙ୍ଗ: ସନ୍ଦିଗ୍ଧ ଆତଙ୍କବାଦୀ କାର୍ଯ୍ୟକଳାପ ମାମଲାରେ ହମିମ୍ ମଣ୍ଡଳର ଗିରଫ ପରେ ଏବେ ପଶ୍ଚିମବଙ୍ଗ ସ୍ପେଶାଲ୍ ଟାସ୍କ ଫୋର୍ସ (ଏସଟିଏଫ୍) ଝାଡ଼ଖଣ୍ଡର ସାହିବଗଞ୍ଜରୁ ତାର ପ୍ରେମିକା ଅର୍ପିତା ସରକାରକୁ ଗିରଫ କରିଛି। ପଚରାଉଚରା ପରେ ତାଙ୍କୁ ପଶ୍ଚିମବଙ୍ଗର ବର୍ଦ୍ଧମାନକୁ ଅଣାଯାଇଛି ଏବଂ କୋର୍ଟରେ ହାଜର କରାଯିବ ବୋଲି ସୂଚନା ମିଳିଛି। ତଦନ୍ତକାରୀ ସଂସ୍ଥାମାନଙ୍କ କହିବା ଅନୁଯାୟୀ, ହମିମ୍ ଏବଂ ଅର୍ପିତାଙ୍କ ମଧ୍ୟରେ ହୋଇଥିବା ହ୍ୱାଟସଆପ୍ ବାର୍ତ୍ତାଳାପର ପ୍ରମାଣ ମିଳିଛି।
ଏସଟିଏଫ୍ର ପ୍ରାଥମିକ ତଦନ୍ତରୁ ସନ୍ଦେହ କରାଯାଉଛି ଯେ, ଅର୍ପିତାଙ୍କୁ ପ୍ରଭାବଶାଳୀ ବ୍ୟକ୍ତି ଓ ରାଜନେତାଙ୍କ ସହ ସମ୍ପର୍କ ସ୍ଥାପନ କରି ସେମାନଙ୍କ ବ୍ୟକ୍ତିଗତ ଏବଂ ଦୈନନ୍ଦିନ କାର୍ଯ୍ୟକଳାପ ସମ୍ପର୍କିତ ସୂଚନା ସଂଗ୍ରହ ପାଇଁ ବ୍ୟବହାର କରାଯାଉଥିଲା। ତଦନ୍ତକାରୀମାନଙ୍କ ଦାବି ଅନୁଯାୟୀ, ହମିମ୍ ବିରୋଧୀ ଦଳନେତା ଶୁଭେନ୍ଦୁ ଅଧିକାରୀଙ୍କ ଗତିବିଧି ଓ ତାଙ୍କ କନଭୟ ଯାତାୟାତ କରୁଥିବା ରାସ୍ତା ଉପରେ ନଜର ରଖୁଥିଲେ। ପ୍ରଥମେ ପ୍ରଭାବଶାଳୀ ବ୍ୟକ୍ତିଙ୍କ ସହ ସମ୍ପର୍କ ସ୍ଥାପନ କରାଯାଇ ପରେ ସେମାନଙ୍କ ବ୍ୟକ୍ତିଗତ ସୂଚନା ସଂଗ୍ରହ କରି ହମିମ୍ଙ୍କୁ ପଠାଯାଉଥିବା ନେଇ ତଦନ୍ତକାରୀ ସଂସ୍ଥା ସନ୍ଦେହ କରୁଛି।
ତଦନ୍ତକାରୀ ଏଜେନ୍ସିମାନେ ଏହି ସୂଚନା କୌଣସି ଆକ୍ରମଣ ଷଡ଼ଯନ୍ତ୍ର ପାଇଁ ବ୍ୟବହାର ହେବାକୁ ଥିଲା କି ନାହିଁ, ସେନେଇ ମଧ୍ୟ ତଦନ୍ତ କରୁଛନ୍ତି। ସେହିପରି ହମିମ୍ଙ୍କର ନିଷିଦ୍ଧ ଆତଙ୍କବାଦୀ ସଂଗଠନ ଜୈସ୍-ଏ-ମହମ୍ମଦ ସହ ସମ୍ଭାବ୍ୟ ସମ୍ପର୍କ ଥିବା ଅଭିଯୋଗକୁ ନେଇ ମଧ୍ୟ ତଦନ୍ତ ଚାଲିଛି। ତେବେ ଏପର୍ଯ୍ୟନ୍ତ ଏହି ସମସ୍ତ ଅଭିଯୋଗ କୋର୍ଟରେ ପ୍ରମାଣିତ ହୋଇନାହିଁ ଏବଂ ମାମଲାର ତଦନ୍ତ ଜାରି ରହିଛି।
