ଇରାନ ଉପରେ ଆକ୍ରମଣ ସ୍ଥଗିତ କଲେ ଟ୍ରମ୍ପ, ପରମାଣୁ ଚୁକ୍ତି ଓ ହର୍ମୁଜ୍ ଜଳପଥ ଖୋଲିବା ସର୍ତ୍ତ
ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ଉପରେ ପ୍ରସ୍ତାବିତ ସାମରିକ ଆକ୍ରମଣକୁ ସ୍ଥଗିତ ରଖିଥିବା ଘୋଷଣା କରିଛନ୍ତି। ସେ କହିଛନ୍ତି, ଯଦି ଇରାନ ଶୀଘ୍ର ପରମାଣୁ କାର୍ଯ୍ୟକ୍ରମ ବନ୍ଦ କରିବା, ହର୍ମୁଜ୍ ଜଳପଥକୁ ତୁରନ୍ତ ଖୋଲିବା ଏବଂ ଏକ ଚୁକ୍ତିରେ ପହଞ୍ଚିବାକୁ ରାଜି ହୁଏ, ତେବେ ଆକ୍ରମଣ କରାଯିବ ନାହିଁ। ଟ୍ରମ୍ପ ତାଙ୍କ ‘ଟ୍ରୁଥ୍ ସୋସିଆଲ୍’ ପୋଷ୍ଟରେ କହିଛନ୍ତି ଯେ, ଇରାନ ଓ ମଧ୍ୟପ୍ରାଚ୍ୟର ଅନ୍ୟ କେତେକ ଦେଶଙ୍କ ଅନୁରୋଧ ପରେ ସେ ଏହି ନିଷ୍ପତ୍ତି ନେଇଛନ୍ତି। ସେ ଦାବି କରିଛନ୍ତି ଯେ ଏହି ପଦକ୍ଷେପରେ ଇସ୍ରାଏଲ ମଧ୍ୟ ସହମତ ରହିଛି।
ଟ୍ରମ୍ପ କହିଛନ୍ତି, ଆମେରିକାର ସେନା ଦ୍ୱିତୀୟ ବିଶ୍ୱଯୁଦ୍ଧ ପରଠାରୁ ସବୁଠାରୁ ବଡ଼ ସାମରିକ ଆକ୍ରମଣ ପାଇଁ ପ୍ରସ୍ତୁତ ଥିଲା। ତେବେ କୂଟନୈତିକ ସମାଧାନର ସୁଯୋଗ ଦେବା ପାଇଁ ଆକ୍ରମଣକୁ ବାତିଲ କରାଯାଇଛି। ଅନ୍ୟପଟେ ଇରାନ ସ୍ପଷ୍ଟ କରିଛି ଯେ, ଯଦି ଆମେରିକା କିମ୍ବା ତାହାର ସହଯୋଗୀ ଦେଶ ପୁଣି ଆକ୍ରମଣ କରନ୍ତି, ତେବେ ସେ ଦୃଢ଼ ଜବାବ ଦେବ। ଇରାନର ବୈଦେଶିକ ମନ୍ତ୍ରୀ ଆବାସ ଆରାକଚି ସତର୍କ କରାଇଛନ୍ତି ଯେ, ଯେକୌଣସି ଆକ୍ରମଣର ପ୍ରତିକ୍ରିୟା ଅନୁପାତିକ ଏବଂ କଠୋର ହେବ।
ଏହି ଘଟଣା ମଧ୍ୟରେ ହର୍ମୁଜ୍ ଜଳପଥକୁ ନେଇ ବିଶ୍ୱବ୍ୟାପୀ ଚିନ୍ତା ବଢ଼ିଛି। ଇରାନ ପକ୍ଷରୁ ଏହି ଜଳପଥରେ ଜାହାଜ ଚଳାଚଳ ବାଧାପ୍ରାପ୍ତ ହେବାରୁ ବିଶ୍ୱ ତୈଳ ବଜାର ପ୍ରଭାବିତ ହୋଇଛି। ଏପରିସ୍ଥିତିରେ ଆମେରିକା ନିଜ ନାଗରିକଙ୍କୁ ମଧ୍ୟପ୍ରାଚ୍ୟରେ ସତର୍କ ରହିବା ସହ ଆବଶ୍ୟକ ପଡ଼ିଲେ ତୁରନ୍ତ ସ୍ଥାନ ଛାଡ଼ିବାକୁ ପରାମର୍ଶ ଦେଇଛି।
