ବାଙ୍କିପୁରରେ ବିଜେପିକୁ ବଡ JHATAKA; ବଡ ବିଜୟ ଲକ୍ଷରେ ପ୍ରଶାନ୍ତ କିଶୋର ! ଭୁସୁଡ଼ିଲା ବିଜେପିର ଦୀର୍ଘଦିନର ଗଡ
ବିହାର: ବିହାର ରାଜନୀତିରେ ବାଙ୍କିପୁର ଉପନିର୍ବାଚନ ଏକ ବଡ଼ ରାଜନୈତିକ ସନ୍ଦେଶ ଦେଇଛି। ଦୀର୍ଘ ବର୍ଷ ଧରି ବିଜେପିର ଦୁର୍ଗ ଭାବେ ପରିଚିତ ବାଙ୍କିପୁରରେ ଜନ ସୁରାଜ ପାର୍ଟିର ପ୍ରତିଷ୍ଠାତା ପ୍ରଶାନ୍ତ କିଶୋର ଆଗୁଆ ରହି ବିଜେପିକୁ ଶକ୍ତ ଝଟକା ଦେଇଛନ୍ତି। ଗଣନାର ପ୍ରଥମ ପର୍ଯ୍ୟାୟରୁ ସେ ଲଗାତାର ଅଗ୍ରଣୀ ରହିଥିବାବେଳେ ପରବର୍ତ୍ତୀ ରାଉଣ୍ଡଗୁଡ଼ିକରେ ତାଙ୍କ ବ୍ୟବଧାନ ଆହୁରି ବଢ଼ିଛି। ଏହି ଫଳାଫଳକୁ ବିହାର ରାଜନୀତିରେ ଏକ ନୂଆ ଅଧ୍ୟାୟର ସଙ୍କେତ ବୋଲି ଦେଖାଯାଉଛି।
ବାଙ୍କିପୁର ଆସନ ପୂର୍ବରୁ ବିଜେପିର ବରିଷ୍ଠ ନେତା ତଥା ପୂର୍ବତନ ବିଧାୟକ ନିତିନ ନବୀନଙ୍କ ଦଖଲରେ ଥିଲା। ରାଜ୍ୟସଭାକୁ ନିର୍ବାଚିତ ହେବା ପରେ ସେ ଆସନ ଛାଡ଼ିଥିବାରୁ ଏହି ଉପନିର୍ବାଚନ ହୋଇଥିଲା। ବିଜେପି ଏଥର ନୀରଜ କୁମାର ସିହ୍ନାଙ୍କୁ ପ୍ରାର୍ଥୀ କରିଥିବାବେଳେ, ରାଜନୈତିକ ରଣନୀତିକାରରୁ ନେତା ପାଲଟିଥିବା ପ୍ରଶାନ୍ତ କିଶୋର ପ୍ରଥମ ଥର ପାଇଁ ନିର୍ବାଚନୀ ମଇଦାନକୁ ଓହ୍ଲାଇଥିଲେ। ନିଜର ସଂଗଠନ, ଘରେ ଘରେ ପ୍ରଚାର ଓ ବିକଳ୍ପ ରାଜନୀତିର ସ୍ଲୋଗାନକୁ ଆଧାର କରି ସେ ପାରମ୍ପରିକ ରାଜନୈତିକ ସମୀକରଣକୁ ବଦଳାଇବାରେ ସଫଳ ହୋଇଥିବା ଚର୍ଚ୍ଚା ହେଉଛି।
ବାଙ୍କିପୁରର ଫଳାଫଳ କେବଳ ଗୋଟିଏ ଆସନର ବିଜୟ କିମ୍ବା ପରାଜୟରେ ସୀମିତ ନୁହେଁ। ଏହାକୁ ବିହାରର ଆଗାମୀ ରାଜନୈତିକ ସମୀକରଣ ଉପରେ ପ୍ରଭାବ ପକାଇପାରୁଥିବା ଘଟଣା ବୋଲି ବିଶ୍ଳେଷକମାନେ ମତ ଦେଉଛନ୍ତି। ବିଜେପିର ସୁରକ୍ଷିତ ଆସନରେ ପ୍ରଶାନ୍ତ କିଶୋରଙ୍କ ଏଭଳି ପ୍ରଦର୍ଶନ ତାଙ୍କ ଜନ ସୁରାଜ ଅଭିଯାନକୁ ନୂଆ ଶକ୍ତି ଦେଇଥିବାବେଳେ, ଆଗାମୀ ବିଧାନସଭା ନିର୍ବାଚନ ପୂର୍ବରୁ ବିହାର ରାଜନୀତିରେ ଏହାର ଦୂରଗାମୀ ପ୍ରଭାବ ପଡ଼ିପାରେ।
