ଜାଲୌନରେ IAS ବନାମ ଆଇନଜୀବୀ ବିବାଦ; SDMଙ୍କ ବିରୋଧରେ ବାର୍ ଆସୋସିଏସନ୍ର ମୋର୍ଚ୍ଚା, ରାଜସ୍ୱ ଅଦାଲତ ବହିଷ୍କାର ଘୋଷଣା
ଉତ୍ତରପ୍ରଦେଶ: ଉତ୍ତରପ୍ରଦେଶର ଜାଲୌନରେ ପ୍ରଶାସନ ଓ ଆଇନଜୀବୀଙ୍କ ମଧ୍ୟରେ ବିବାଦ ତୀବ୍ର ରୂପ ନେଇଛି। ଏସ୍ଡିଏମ୍ (ନ୍ୟାୟିକ) ରିଙ୍କୁ ସିଂହ ରାହିଙ୍କ କାର୍ଯ୍ୟପ୍ରଣାଳୀକୁ ନେଇ ଜିଲ୍ଲା ବାର୍ ଆସୋସିଏସନ୍ କଡ଼ା ଆପତ୍ତି ଉଠାଇଛି। ଅଦାଲତ ପରିଚାଳନା ଏବଂ ଆଇନଜୀବୀଙ୍କ ପ୍ରତି ତାଙ୍କ ବ୍ୟବହାରକୁ ନେଇ ଅସନ୍ତୋଷ ପ୍ରକାଶ କରି ବାର୍ ଆସୋସିଏସନ୍ ରାଜସ୍ୱ ଅଦାଲତ ବହିଷ୍କାର କରିବାକୁ ଘୋଷଣା କରିଛି।
ବାର୍ ଆସୋସିଏସନ୍ର ଅଭିଯୋଗ ଅନୁସାରେ, ଏସ୍ଡିଏମ୍ଙ୍କ କାର୍ଯ୍ୟଶୈଳୀ ଯୋଗୁଁ ଆଇନଜୀବୀମାନେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି। ଏହି ପ୍ରସଙ୍ଗରେ ଏକାଧିକ ଥର ଜିଲ୍ଲାପାଳଙ୍କ ନିକଟରେ ଲିଖିତ ଅଭିଯୋଗ କରାଯାଇଥିଲେ ମଧ୍ୟ କୌଣସି ସନ୍ତୋଷଜନକ ପଦକ୍ଷେପ ନିଆଯାଇନଥିବାରୁ ଆଇନଜୀବୀମାନେ ଆନ୍ଦୋଳନର ପଥ ବାଛିଛନ୍ତି। ଏହାକୁ ନେଇ ଜିଲ୍ଲାର ପ୍ରଶାସନିକ ମହଲରେ ଚର୍ଚ୍ଚା ଜୋର ଧରିଛି।
ଅନ୍ୟପକ୍ଷରେ, IAS ଅଧିକାରୀ ରିଙ୍କୁ ସିଂହ ରାହି ନିଜ ବିରୋଧରେ ଉଠିଥିବା ସମସ୍ତ ଅଭିଯୋଗକୁ ଖଣ୍ଡନ କରି କହିଛନ୍ତି ଯେ, ସେ ସମ୍ପୂର୍ଣ୍ଣ ଭାବେ ନିୟମ ଅନୁଯାୟୀ କାର୍ଯ୍ୟ କରୁଛନ୍ତି। ନିଜ ଦାବିକୁ ସମର୍ଥନ କରି ସେ କୋର୍ଟ କାର୍ଯ୍ୟର ଭିଡିଓ ମଧ୍ୟ ସାର୍ବଜନୀନ କରିଛନ୍ତି। ସୂଚନାଯୋଗ୍ୟ, ରିଙ୍କୁ ସିଂହ ରାହି ପୂର୍ବରୁ ମଧ୍ୟ ବିଭିନ୍ନ ପ୍ରଶାସନିକ ପ୍ରସଙ୍ଗକୁ ନେଇ ଚର୍ଚ୍ଚାରେ ରହିଆସିଛନ୍ତି। ବର୍ତ୍ତମାନର ଏହି ବିବାଦର ସମାଧାନ ଆଲୋଚନା ମାଧ୍ୟମରେ ହେବ କି ନାହିଁ, ତାହା ଉପରେ ସମସ୍ତଙ୍କ ନଜର ରହିଛି।
