ଚଳନ୍ତା କାର୍ରେ ଦୁଇ ନାବାଳିକା ଆଦିବାସୀ ଝିଅଙ୍କୁ ଅପହରଣ ପରେ ଗଣଦୁଷ୍କର୍ମ; ୩ ଅଭିଯୁକ୍ତ ଗିରଫ
ଗୁଆହାଟୀ: ଆସାମରେ ଦୁଇ ଜଣ ନାବାଳିକା ଆଦିବାସୀ ଝିଅଙ୍କୁ ଅପହରଣ କରି ଚଳନ୍ତା କାର୍ରେ ଗଣଦୁଷ୍କର୍ମ କରାଯାଇଥିବା ଅଭିଯୋଗ ଘଟଣାରେ ପୋଲିସ ୩ ଜଣ ଯୁବକଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ଆମଜାଦ ହୁସେନ୍ ଲସ୍କର (୨୦), ସଦ୍ଦାମ ହୁସେନ୍ ଲସ୍କର (୨୩) ଏବଂ ରିଙ୍କୁ ଦାସ (୨୫)। ସମସ୍ତେ ଆସାମର କାଚାର ଜିଲ୍ଲାର ବାସିନ୍ଦା ବୋଲି ପୋଲିସ ସୂଚନା ଦେଇଛି।
ପୋଲିସ କହିଛି, ଅଗଷ୍ଟ ୩ ତାରିଖ ଭୋର ପ୍ରାୟ ୨ଟା ୩୦ ମିନିଟ୍ରେ ଦୁଇ ନାବାଳିକା ଧୋଲାଇ ଥାନାରେ ପହଞ୍ଚି ଅପହରଣ ଓ ଯୌନ ନିର୍ଯାତନା ସମ୍ପର୍କରେ ଅଭିଯୋଗ କରିଥିଲେ। ପ୍ରଥମେ ସେମାନେ ଦୁଷ୍କର୍ମର ଶିକାର ହୋଇଥିବା କହିଥିଲେ, ପରେ ବିରୋଧ କରିବା ସତ୍ତ୍ୱେ ଚଳନ୍ତା କାର୍ରେ ଗଣଦୁଷ୍କର୍ମ କରାଯାଇଥିବା ଅଭିଯୋଗ କରିଥିଲେ। ଉଭୟ ନାବାଳିକା ହୋଇଥିବାରୁ ପୋଲିସ ପୋକ୍ସୋ ଆଇନ ସହ ସମ୍ପୃକ୍ତ ଧାରାରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
ଘଟଣା ପରେ ଉଭୟ ପୀଡ଼ିତାଙ୍କ ବୟାନ ରେକର୍ଡ କରାଯାଇଥିବା ବେଳେ ସେମାନଙ୍କର ବାଧ୍ୟତାମୂଳକ ଡାକ୍ତରୀ ପରୀକ୍ଷା ମଧ୍ୟ କରାଯାଇଛି। ପୋଲିସ ଭାରତୀୟ ନ୍ୟାୟ ସଂହିତାର ଧାରା ୭୦(୨) (ନାବାଳିକାଙ୍କ ସହ ଗଣଦୁଷ୍କର୍ମ), ଧାରା ୮୭ (ଅପହରଣ) ଏବଂ ପୋକ୍ସୋ ଆଇନର ଧାରା ୬ ଅନୁଯାୟୀ ମାମଲା ରୁଜୁ କରିଛି। ପ୍ରାରମ୍ଭିକ ଆଇନଗତ ପ୍ରକ୍ରିୟା ଶେଷ ପରେ ତିନି ଅଭିଯୁକ୍ତଙ୍କୁ ଅଦାଲତରେ ହାଜର କରାଯାଇଛି। ଘଟଣାର ପ୍ରକୃତ କାରଣ ଏବଂ ଅନ୍ୟ କାହାର ସମ୍ପୃକ୍ତି ରହିଛି କି ନାହିଁ, ସେନେଇ ପୋଲିସର ତଦନ୍ତ ଜାରି ରହିଛି।
