ସେପ୍ଟେମ୍ବରରେ ଭାରତ ଆସିବେ ଇରାନ ରାଷ୍ଟ୍ରପତି, ବ୍ରିକ୍ସ ଶିଖର ସମ୍ମିଳନୀରେ ଯୋଗଦେବେ ପେଜେସ୍କିଆନ
ନୂଆଦିଲ୍ଲୀ: ଇରାନ ରାଷ୍ଟ୍ରପତି ମସୁଦ ପେଜେସ୍କିଆନ ସେପ୍ଟେମ୍ବରରେ ଭାରତ ଗସ୍ତରେ ଆସିବେ। ନୂଆଦିଲ୍ଲୀରେ ଆୟୋଜିତ ହେବାକୁ ଥିବା ୧୮ତମ ବ୍ରିକ୍ସ ଶିଖର ସମ୍ମିଳନୀରେ ସେ ଯୋଗଦେବେ ବୋଲି ଇରାନୀ ସୂତ୍ରରୁ ସୂଚନା ମିଳିଛି। ଭାରତର ଅଧ୍ୟକ୍ଷତାରେ ଏହି ସମ୍ମିଳନୀ ଆୟୋଜିତ ହେଉଥିବାରୁ ପେଜେସ୍କିଆନଙ୍କ ଗସ୍ତକୁ ଉଭୟ ଦେଶର ସମ୍ପର୍କ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ବୋଲି ଦେଖାଯାଉଛି।
ଚଳିତ ବର୍ଷ ଆରମ୍ଭରେ ଭାରତ ବ୍ରାଜିଲଠାରୁ ବ୍ରିକ୍ସର ଅଧ୍ୟକ୍ଷତା ଗ୍ରହଣ କରିଥିଲା। ‘ସ୍ଥାୟୀତା, ନବସୃଜନ, ସହଯୋଗ ଓ ସ୍ଥିରତା ପାଇଁ ନିର୍ମାଣ’ ବିଷୟବସ୍ତୁକୁ ନେଇ ଏଥର ଶିଖର ସମ୍ମିଳନୀ ଆୟୋଜିତ ହେବ। ବ୍ରିକ୍ସ ମଞ୍ଚରେ ଇରାନର ଅଂଶଗ୍ରହଣ ମଧ୍ୟ ଗୁରୁତ୍ୱ ବହନ କରୁଛି। ଇରାନ ୨୦୨୪ରେ ବ୍ରିକ୍ସର ପୂର୍ଣ୍ଣକାଳୀନ ସଦସ୍ୟ ହୋଇଥିବାବେଳେ ଏହାର ସଦସ୍ୟ ସଂଖ୍ୟା ପରେ ୧୧କୁ ବୃଦ୍ଧି ପାଇଛି।
ପେଜେସ୍କିଆନ ଏହା ପୂର୍ବରୁ ୨୦୨୪ ଅକ୍ଟୋବରରେ ରୁଷର କାଜାନଠାରେ ଅନୁଷ୍ଠିତ ବ୍ରିକ୍ସ ଶିଖର ସମ୍ମିଳନୀ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିଥିଲେ। ସେଠାରେ ଦୁଇ ନେତା ଦ୍ୱିପାକ୍ଷିକ ଓ ଆଞ୍ଚଳିକ ପ୍ରସଙ୍ଗ ନେଇ ଆଲୋଚନା କରିଥିଲେ। ଏହାସହ ଜୁନ୍ ମାସରେ ଇରାନର ବୈଦେଶିକ ମନ୍ତ୍ରୀ ଆବାସ ଆରାଘଚି ବ୍ରିକ୍ସ ବୈଦେଶିକ ମନ୍ତ୍ରୀସ୍ତରୀୟ ବୈଠକରେ ଯୋଗଦେବା ପାଇଁ ଭାରତ ଆସିଥିଲେ। ତେଣୁ ପେଜେସ୍କିଆନଙ୍କ ଆଗାମୀ ଭାରତ ଗସ୍ତ ଦୁଇ ଦେଶ ମଧ୍ୟରେ କୂଟନୈତିକ ଓ ଆଞ୍ଚଳିକ ସହଯୋଗକୁ ଆହୁରି ମଜବୁତ କରିବାର ଅବସର ଦେଇପାରେ।
