‘ଦିମାଗୀ ନକ୍ସଲ’ ମନ୍ତବ୍ୟକୁ ନେଇ ମୋଦୀଙ୍କୁ ବିରୋଧୀଙ୍କ ଟାର୍ଗେଟ୍, କହିଲେ- ସ୍ୱାଧୀନତା ଦିବସରେ ରାଜନୈତିକ ଭାଷଣ ଦେଲେ ପ୍ରଧାନମନ୍ତ୍ରୀ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ‘ଦିମାଗୀ ନକ୍ସଲ’ ମନ୍ତବ୍ୟକୁ ନେଇ ବିରୋଧୀ ଦଳଗୁଡ଼ିକ ତୀବ୍ର ପ୍ରତିକ୍ରିୟା ଦେଇଛନ୍ତି। ସ୍ୱାଧୀନତା ଦିବସ ଭଳି ଜାତୀୟ ଅବସରରେ ପ୍ରଧାନମନ୍ତ୍ରୀ ରାଜନୈତିକ ମନ୍ତବ୍ୟ ଦେଇଥିବା ନେଇ ବିରୋଧୀମାନେ ସମାଲୋଚନା କରିଛନ୍ତି। କଂଗ୍ରେସ ମହାସଚିବ ଜୟରାମ ରମେଶ କହିଛନ୍ତି, ପୂର୍ବରୁ ବିରୋଧୀଙ୍କୁ ‘ଅର୍ବାନ ନକ୍ସଲ’ କୁହାଯାଉଥିଲା, ଏବେ ‘ଦିମାଗୀ ନକ୍ସଲ’ ଭଳି ନୂଆ ଶବ୍ଦ ବ୍ୟବହାର କରାଯାଉଛି। ସେହିପରି ମହିଳା ସଂରକ୍ଷଣ ପ୍ରସଙ୍ଗରେ ମଧ୍ୟ ମୋଦୀ ସରକାର ଦୋମୁହା ନୀତି ଆପଣାଇଥିବା ସେ ଅଭିଯୋଗ କରିଛନ୍ତି।
ସିପିଆଇ ମହାସଚିବ ଡି. ରାଜା କହିଛନ୍ତି, ସ୍ୱାଧୀନତା ଦିବସ ଭଳି ଗୁରୁତ୍ୱପୂର୍ଣ୍ଣ ଅବସରରେ ମଧ୍ୟ ମୋଦୀ ବିରୋଧୀଙ୍କୁ ଟାର୍ଗେଟ୍ କରିବାର ସୁଯୋଗ ଖୋଜୁଛନ୍ତି। ଦେଶର ଯୁବପିଢ଼ି ଚାକିରି ଓ ଶିକ୍ଷା ବ୍ୟବସ୍ଥାରେ ସୁଧାର ଦାବି କରୁଥିବା ବେଳେ ସରକାର ଏହାକୁ ଅଣଦେଖା କରୁଥିବା ସେ କହିଛନ୍ତି। ତୃଣମୂଳ କଂଗ୍ରେସ ମୁଖପାତ୍ର ସାକେତ ଗୋଖଲେ ‘ଦିମାଗୀ ନକ୍ସଲ’ ଶବ୍ଦକୁ ନେଇ ମୋଦୀଙ୍କୁ ସମାଲୋଚନା କରିବା ସହ ଯୁବପିଢ଼ିଙ୍କ ଉପରେ ପୁଲିସ ବଳ ପ୍ରୟୋଗ ପ୍ରସଙ୍ଗ ଉଠାଇଛନ୍ତି।
ଆମ୍ ଆଦମୀ ପାର୍ଟି ମୁଖ୍ୟ ଅରବିନ୍ଦ କେଜ୍ରିୱାଲ ମଧ୍ୟ ମୋଦୀଙ୍କ ଭାଷଣକୁ ନେଇ ସମାଲୋଚନା କରିଛନ୍ତି। କଂଗ୍ରେସ ସାଂସଦ ପବନ ଖେରା ମଧ୍ୟ ମୋଦୀଙ୍କ ଭାଷଣର ଏକ ଅଂଶକୁ ସେୟାର କରି ଟିପ୍ପଣୀ କରିଛନ୍ତି। ସେପଟେ କକ୍ରୋଚ୍ ଜନତା ପାର୍ଟିର ମୁଖପାତ୍ର ରତ୍ନା ସିଂହ କହିଛନ୍ତି ଯେ, NEET ପ୍ରଶ୍ନପତ୍ର ଲିକ୍ ପରେ ମୃତ୍ୟୁବରଣ କରିଥିବା ଛାତ୍ରଛାତ୍ରୀଙ୍କ ପରିବାରକୁ କ୍ଷତିପୂରଣ କିମ୍ବା ଆନ୍ଦୋଳନରତ ଯୁବପିଢ଼ିଙ୍କ ଉପରେ ପୁଲିସ ବଳ ପ୍ରୟୋଗ ପ୍ରସଙ୍ଗରେ ପ୍ରଧାନମନ୍ତ୍ରୀ କିଛି କହିନଥିବା ଅଭିଯୋଗ କରିଛନ୍ତି।
