UFO ଭିଡିଓ ଗାଏବ୍? କଲରାଡୋ ସାମରିକ ଘାଟିରେ ଦେଖାଯାଇଥିବା ରହସ୍ୟମୟ ବସ୍ତୁର ଭିଡିଓ ଖୋଜୁଛି ପେଣ୍ଟାଗନ୍
ଆମେରିକାର ଡିପାର୍ଟମେଣ୍ଟ ଅଫ୍ ୱାର୍ କଲରାଡୋର ଏକ ସାମରିକ ଘାଟି ଉପରେ ଦେଖାଯାଇଥିବା କଥିତ UFOର ଦୁଇଟି ମୋବାଇଲ୍ ଭିଡିଓକୁ ନେଇ ତଦନ୍ତ ଆରମ୍ଭ କରିଛି। ଏହି ଦୁଇଟି ଭିଡିଓ ୨୦୨୩ରେ ଜଣେ ସେବା ସଦସ୍ୟ ଲଗାତାର ଦୁଇ ରାତିରେ ରେକର୍ଡ କରିଥିବା ଦାବି କରାଯାଉଛି। ଭିଡିଓଗୁଡ଼ିକ ସାର୍ବଜନୀନ ହୋଇନଥିବା ଖବର ପ୍ରକାଶ ପାଇବା ପରେ ପେଣ୍ଟାଗନ୍ ସେଗୁଡ଼ିକର ସନ୍ଧାନ ଆରମ୍ଭ କରିଛି। ପେଣ୍ଟାଗନ୍ ପ୍ରେସ୍ ସେକ୍ରେଟାରୀ ଜୋଏଲ୍ ଭାଲଡେଜ୍ କହିଛନ୍ତି ଯେ ବିଭାଗ ଏହି ଭିଡିଓଗୁଡ଼ିକ କେଉଁଠି ଅଛି, ତାହା ସକ୍ରିୟ ଭାବେ ଖୋଜୁଛି।
ରିପୋର୍ଟ ଅନୁସାରେ, ଏହି କଥିତ ଭିଡିଓରେ ପ୍ରାୟ ୧୦୦ ଫୁଟ୍ ଆକାରର ଏକ ତ୍ରିକୋଣାକାର ବସ୍ତୁ କଲରାଡୋର ଏକ ସାମରିକ ଘାଟି ନିକଟରେ ଉଡ଼ୁଥିବା ଦେଖାଯାଇଥିବା ଦାବି ହୋଇଛି। ଏହା ପାହାଡ଼ ଉପରେ ଗତି କରୁଥିବା ଏବଂ ମେଘ ମଧ୍ୟରେ ନିଜକୁ ଲୁଚାଇ ଦେଉଥିବା ଭଳି ଦେଖାଯାଇଥିବା ସୂଚନା ମିଳିଛି। ଭିଡିଓଗୁଡ଼ିକ କଲରାଡୋର ଏୟାର ଫୋର୍ସ ଅଫିସ୍ ଅଫ୍ ସ୍ପେସିଆଲ୍ ଇନଭେଷ୍ଟିଗେସନ୍ସ ପାଖରେ ଥିବା ଏବଂ ସେଗୁଡ଼ିକର ଫାଇଲ୍ ନମ୍ବର ମଧ୍ୟ ରହିଥିବା ଦାବି କରାଯାଇଛି। ତେବେ ଏହି ଭିଡିଓର ପ୍ରକୃତ ସ୍ୱରୂପ ସମ୍ପର୍କରେ ସରକାରୀ ଭାବେ କୌଣସି ନିଷ୍କର୍ଷ ସାମ୍ନାକୁ ଆସିନାହିଁ।
ଏହି ଘଟଣା ମଧ୍ୟରେ ଆମେରିକା ସରକାର ଅଜଣା ଆକାଶୀୟ ଘଟଣା ବା UAP (Unidentified Anomalous Phenomena) ସମ୍ପର୍କିତ ଦସ୍ତାବିଜ ମଧ୍ୟ ପ୍ରକାଶ କରୁଛି। ଟ୍ରମ୍ପ ପ୍ରଶାସନ ଏଥିପାଇଁ PURSUE ବ୍ୟବସ୍ଥା ଅଧୀନରେ ବିଭିନ୍ନ ରେକର୍ଡ ସାର୍ବଜନୀନ କରିଛି। ସେଥିରେ ୨୦୨୩ରେ କଲରାଡୋ ସ୍ପ୍ରିଙ୍ଗ୍ସ ନିକଟରେ ଏକ ତ୍ରିକୋଣାକାର UFO ଦେଖାଯାଇଥିବା ରିପୋର୍ଟ ମଧ୍ୟ ରହିଛି। FBI ପକ୍ଷରୁ ଏହି ଘଟଣାର ଏକ କଳାତ୍ମକ ଡିଜିଟାଲ୍ ଚିତ୍ର ମଧ୍ୟ ପ୍ରସ୍ତୁତ କରାଯାଇଛି।
