ବିହାରର ଅଶୋକ ଧାମ ମନ୍ଦିରରେ ବଡ ଅଘଟଣ! ଦଳାଚକଟାରେ ୭ ଭକ୍ତଙ୍କ ମୃତ୍ୟୁ, ଅନେକ ଆହତ
ବିହାର: ବିହାରର ଲଖିସରାଇ ଜିଲ୍ଲାର ଅଶୋକ ଧାମ ମନ୍ଦିର ବାହାରେ ସୋମବାର ସକାଳେ ଏକ ବଡ ଅଘଟଣ ଘଟିଛି। ଭିଡ଼ ମଧ୍ୟରେ ଦଳାଚକଟା ଭଳି ପରିସ୍ଥିତି ସୃଷ୍ଟି ହେବାରୁ ଅତି କମରେ ୭ ଜଣ ଭକ୍ତଙ୍କ ମୃତ୍ୟୁ ହୋଇଥିବାବେଳେ ଅନେକ ଲୋକ ଆହତ ହୋଇଛନ୍ତି। ଶ୍ରାବଣ ମାସର ତୃତୀୟ ସୋମବାର ଅବସରରେ ମନ୍ଦିରରେ ବହୁ ସଂଖ୍ୟାରେ ଭକ୍ତଙ୍କ ସମାଗମ ହୋଇଥିଲା। ଘଟଣା ପରେ ପୁଲିସ ଓ ପ୍ରଶାସନିକ ଟିମ୍ ଘଟଣାସ୍ଥଳରେ ପହଞ୍ଚି ଉଦ୍ଧାରକାର୍ଯ୍ୟ ଆରମ୍ଭ କରିଥିଲେ।
ଲଖିସରାଇ ଜିଲ୍ଲାପାଳ ଶୈଳେନ୍ଦ୍ର କୁମାରଙ୍କ ସୂଚନା ଅନୁଯାୟୀ, ସକାଳ ପ୍ରାୟ ୬ଟା ୩୦ରୁ ୬ଟା ୪୫ ମଧ୍ୟରେ ଦୁଇଟି ଟ୍ରେନ୍ ଆସିବା ପରେ ମନ୍ଦିର ନିକଟରେ ହଠାତ୍ ଭକ୍ତଙ୍କ ଭିଡ଼ ବଢ଼ିଯାଇଥିଲା। ଅତ୍ୟଧିକ ଭିଡ଼ ଯୋଗୁଁ ମନ୍ଦିର ବାହାରେ ଲାଗିଥିବା ବ୍ୟାରିକେଡ୍ର ଏକ ଅଂଶ ଭାଙ୍ଗିଯାଇଥିଲା। ଏହି ସମୟରେ ଏକ ବିଦ୍ୟୁତ୍ ଖୁଣ୍ଟି ମଧ୍ୟ ଭାଙ୍ଗି ପଡ଼ିଥିଲା। ଖୁଣ୍ଟି ଭାଙ୍ଗିବା ପରେ ଭିଡ଼ ମଧ୍ୟରେ ଜୀବନ୍ତ ବିଦ୍ୟୁତ୍ ତାର ପଡ଼ିଥିବା ନେଇ ଗୁଜବ ପ୍ରଚାର ହୋଇଥିଲା। ତେବେ ପ୍ରାଥମିକ ସୂଚନା ଅନୁସାରେ ତାହା ଏକ କେବୁଲ୍ ତାର ଥିଲା। ଏହି ଗୁଜବ ଯୋଗୁଁ ମହିଳାଙ୍କ ଧାଡ଼ିରେ ହଠାତ୍ ଚାପ ବଢ଼ିଯାଇ ଦଳାଚକଟା ଭଳି ସ୍ଥିତି ସୃଷ୍ଟି ହୋଇଥିଲା।
ଘଟଣା ସମ୍ପର୍କରେ ସୂଚନା ପାଇ ଆହତମାନଙ୍କୁ ତୁରନ୍ତ ନିକଟସ୍ଥ ହସ୍ପିଟାଲକୁ ନିଆଯାଇଛି। ପୁଲିସ ଓ ପ୍ରଶାସନ ପକ୍ଷରୁ ଘଟଣାର ପ୍ରକୃତ କାରଣ ଜାଣିବାକୁ ତଦନ୍ତ ଆରମ୍ଭ ହୋଇଛି। ସବ୍-ଡିଭିଜନାଲ ପୁଲିସ ଅଧିକାରୀ ଶିବମ କୁମାର କହିଛନ୍ତି ଯେ ପ୍ରାଥମିକ ଭାବେ ବିଦ୍ୟୁତ୍ ଖୁଣ୍ଟି ଭାଙ୍ଗିବା ପରେ ଘଟଣା ଘଟିଥିବା ସୂଚନା ମିଳିଛି। ତେବେ ସମସ୍ତ ତଥ୍ୟ ଯାଞ୍ଚ ପରେ ହିଁ ଘଟଣାର ପ୍ରକୃତ କାରଣ ସ୍ପଷ୍ଟ ହେବ। ଏହି ଘଟଣାକୁ ବିହାର ମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ ଅତ୍ୟନ୍ତ ଦୁଃଖଦ ବୋଲି କହିବା ସହ ଆହତଙ୍କୁ ଶୀଘ୍ର ଓ ଉତ୍ତମ ଚିକିତ୍ସା ଯୋଗାଇବାକୁ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି। ଅଶୋକ ଧାମ ମନ୍ଦିର ଶ୍ରୀ ଇନ୍ଦ୍ରଦମନେଶ୍ୱର ମହାଦେବ ମନ୍ଦିର ନାମରେ ମଧ୍ୟ ପରିଚିତ ଏବଂ ଶ୍ରାବଣ ମାସରେ ଏଠାରେ ବହୁ ସଂଖ୍ୟାରେ ଭକ୍ତଙ୍କ ସମାଗମ ହୋଇଥାଏ।
