ପ୍ରଥମ ଥର କର୍ମଚାରୀଙ୍କୁ ଚାକିରିରୁ ବାହାର କଲା AI! ୨୩ ଶିଫ୍ଟରୁ ୧୭ ଥର ବିଳମ୍ବରେ ଆସିଥିଲେ
ନୂଆଦିଲ୍ଲୀ: AIକୁ ନେଇ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି | ଆମେରିକାର ସାନ୍ ଫ୍ରାନ୍ସିସ୍କୋରେ ଏକ ପରୀକ୍ଷାମୂଳକ ଏଆଇ ପରିଚାଳିତ ଷ୍ଟୋର୍ରେ ପ୍ରଥମ ଥର ପାଇଁ ଜଣେ ମାନବ କର୍ମଚାରୀଙ୍କୁ ଚାକିରିରୁ ବହିଷ୍କାର କରିବାକୁ ଏଆଇ ମ୍ୟାନେଜର ପରାମର୍ଶ ଦେଇଛି। ଆଣ୍ଡନ୍ ଲ୍ୟାବ୍ସ ପରିଚାଳିତ ‘ଆଣ୍ଡନ୍ ମାର୍କେଟ୍’ର ଏଆଇ ମ୍ୟାନେଜର ‘ଲୁନା’ ଜଣେ କର୍ମଚାରୀଙ୍କୁ ଚାକିରିରୁ ବାହାର କରିବାକୁ ସୁପାରିସ କରିଥିଲା। ଉକ୍ତ କର୍ମଚାରୀ ୨୩ଟି ଶିଫ୍ଟ ମଧ୍ୟରୁ ୧୭ ଥର ବିଳମ୍ବରେ କାମକୁ ଆସିଥିବା ଜଣାପଡ଼ିଛି। ତେବେ ଏଆଇର ସୁପାରିସକୁ ମାନବ କର୍ମଚାରୀମାନେ ସମୀକ୍ଷା କରିବା ପରେ ହିଁ ବହିଷ୍କାର ନିଷ୍ପତ୍ତି କାର୍ଯ୍ୟକାରୀ କରାଯାଇଥିଲା।
ଏହି ଘଟଣାର ବିଶେଷତ୍ୱ ହେଉଛି, ଲୁନା ନିଜେ ତିଆରି କରିଥିବା ଉପସ୍ଥାନ ନୀତିକୁ ପରେ ଭୁଲିଯାଇଥିବା ଭଳି ଲାଗିଥିଲା। ଫଳରେ କର୍ମଚାରୀ ଦୀର୍ଘ ସମୟ ଧରି ବିଳମ୍ବରେ ଆସୁଥିଲେ ମଧ୍ୟ ତାଙ୍କ ବିରୋଧରେ କୌଣସି ପଦକ୍ଷେପ ନିଆଯାଇନଥିଲା। ପରେ ଆଣ୍ଡନ୍ ଲ୍ୟାବ୍ସର ଗବେଷକମାନେ ଲୁନାକୁ ନିଜେ ତିଆରି କରିଥିବା ନୀତି ଖୋଜିବାକୁ କହିଥିଲେ। ଏହାପରେ କର୍ମଚାରୀଙ୍କ କାର୍ଯ୍ୟଦକ୍ଷତା ଓ ଉପସ୍ଥାନ ରେକର୍ଡ ଆଧାରରେ ମୂଲ୍ୟାୟନ କରି ଲୁନା ଚାକିରିରୁ ବହିଷ୍କାର କରିବାକୁ ସୁପାରିସ କରିଥିଲା।
ଆଣ୍ଡନ୍ ମାର୍କେଟ୍ରେ ଏଆଇକୁ ବାସ୍ତବ ବ୍ୟବସାୟ ପରିଚାଳନାର ଦାୟିତ୍ୱ ଦେଇ ଏହାର କ୍ଷମତା ପରୀକ୍ଷା କରାଯାଉଛି। ଏଆଇକୁ ୧ ଲକ୍ଷ ଡଲାର, କର୍ପୋରେଟ୍ କାର୍ଡ, ଇଣ୍ଟରନେଟ୍ ସୁବିଧା ଏବଂ ତିନି ବର୍ଷର ଲିଜ୍ ଦିଆଯାଇଥିଲା। ଏହାପରେ ଦୋକାନରେ କେଉଁ ସାମଗ୍ରୀ ବିକ୍ରି ହେବ, ଦାମ କେତେ ରହିବ, ଦୋକାନ ଖୋଲିବା ସମୟ ଏବଂ ବ୍ରାଣ୍ଡିଂ ଭଳି ଅନେକ ନିଷ୍ପତ୍ତି ଏଆଇ ନେଉଛି। ତେବେ ବିକ୍ରି ହେଉଥିଲେ ମଧ୍ୟ ଦୋକାନଟି ଏପର୍ଯ୍ୟନ୍ତ ଲାଭ କରିପାରିନାହିଁ। ଏହି ପରୀକ୍ଷଣ ବର୍ତ୍ତମାନର ଏଆଇ ପ୍ରଣାଳୀର ଏକ ସୀମାବଦ୍ଧତାକୁ ମଧ୍ୟ ସାମ୍ନାକୁ ଆଣିଛି—ଏଆଇ ନିଜେ ନୀତି ତିଆରି କରିପାରୁଥିଲେ ମଧ୍ୟ ତାହାକୁ ଦୀର୍ଘ ସମୟ ଧରି ନିରନ୍ତର ମନେ ରଖି ପ୍ରୟୋଗ କରିବାରେ ଅସୁବିଧା ହୋଇପାରେ।
