ସ୍ୱାଧୀନତା ଦିବସ କାର୍ଯ୍ୟକ୍ରମର ଭିଡିଓ ଭାଇରାଲ୍ ପରେ ସିଲ୍ ହେଲା ସ୍କୁଲ୍! ଅନୁମୋଦନ ବିନା ଚାଲୁଥିବା ଜଣାପଡ଼ିଲା
ଉତ୍ତରପ୍ରଦେଶ: ଉତ୍ତରପ୍ରଦେଶର ଗୋଣ୍ଡା ଜିଲ୍ଲାରେ ଏକ ଘରୋଇ ସ୍କୁଲ୍କୁ ସିଲ୍ କରିଛି ମୌଳିକ ଶିକ୍ଷା ବିଭାଗ। ସ୍ୱାଧୀନତା ଦିବସ କାର୍ଯ୍ୟକ୍ରମର ଏକ ଭିଡିଓ ସୋସିଆଲ ମିଡିଆରେ ପ୍ରସାରିତ ହେବା ପରେ ସ୍କୁଲ୍ଟି ଚର୍ଚ୍ଚାକୁ ଆସିଥିଲା। ଭିଡିଓରେ କିଛି ଛାତ୍ରୀ ବୁର୍ଖା ପିନ୍ଧି ନୃତ୍ୟ କରୁଥିବା ଦେଖାଯାଇଥିବା ଅଧିକାରୀମାନେ କହିଛନ୍ତି। ଏହାପରେ ବିଭାଗ ପକ୍ଷରୁ ସ୍କୁଲ୍ରେ ଯାଞ୍ଚ କରାଯାଇଥିଲା।
ଗୋଣ୍ଡା ଜିଲ୍ଲାର ବଭନଜୋତ ଅଞ୍ଚଳର ଔସାନୀ ବୁଜୁର୍ଗରେ ଥିବା ଏହି ସ୍କୁଲ୍ର ଯାଞ୍ଚ ସମୟରେ ଏହା ବିନା ସ୍ୱୀକୃତିରେ ଚାଲୁଥିବା ଜଣାପଡ଼ିଥିଲା। ଜିଲ୍ଲା ମୌଳିକ ଶିକ୍ଷା ଅଧିକାରୀ ଅମିତ କୁମାର ସିଂହଙ୍କ ନିର୍ଦ୍ଦେଶରେ ବ୍ଲକ୍ ଶିକ୍ଷା ଅଧିକାରୀ ରିୟାଜ ଅହମଦ ସ୍କୁଲ୍ରେ ଯାଞ୍ଚ କରିଥିଲେ। ଅଧିକାରୀଙ୍କ କହିବା ଅନୁସାରେ, ପ୍ରାୟ ଏକ ସପ୍ତାହ ପୂର୍ବରୁ ସ୍କୁଲ୍ ପରିଚାଳନାକୁ ସଂସ୍ଥାନ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଥିଲା। କିନ୍ତୁ ନିର୍ଦ୍ଦେଶ ସତ୍ତ୍ୱେ ସ୍କୁଲ୍ର କାର୍ଯ୍ୟକଳାପ ଜାରି ରହିଥିଲା।
ଯାଞ୍ଚ ପରେ ଅଧିକାରୀମାନେ ସ୍କୁଲ୍ର ମ୍ୟାନେଜର ଓ ପ୍ରିନ୍ସିପାଲଙ୍କ କାର୍ଯ୍ୟାଳୟକୁ ତାଲା ପକାଇବା ସହ ମୁଖ୍ୟ ଫାଟକକୁ ମଧ୍ୟ ସିଲ୍ କରିଛନ୍ତି। ଏନେଇ ଜିଲ୍ଲା ମୌଳିକ ଶିକ୍ଷା ଅଧିକାରୀଙ୍କ ନିକଟରେ ଯାଞ୍ଚ ଓ ସିଲ୍ ସମ୍ପର୍କିତ ରିପୋର୍ଟ ଦାଖଲ କରାଯାଇଛି। ଏହାସହ ସ୍କୁଲ୍ରେ ପଢ଼ୁଥିବା ଛାତ୍ରଛାତ୍ରୀଙ୍କୁ ନିକଟସ୍ଥ ସରକାରୀ କିମ୍ବା ଅନ୍ୟ ସ୍ୱୀକୃତିପ୍ରାପ୍ତ ସ୍କୁଲ୍ରେ ନାମ ଲେଖାଇବାକୁ ଅଧିକାରୀମାନେ ନିର୍ଦ୍ଦେଶ ଦେଇଛନ୍ତି।
