ଇମ୍ରାନ ଖାନଙ୍କ ହସ୍ପିଟାଲ୍ ସ୍ଥାନାନ୍ତର ପଛରେ ରହିଛି କି ଗୁପ୍ତ ଡିଲ୍? ପାକିସ୍ତାନରେ ବଡ଼ ରାଜନୈତିକ ପରିବର୍ତ୍ତନର ଆଭାସ ଦେଲେ ସାମ୍ବାଦିକ
ନୂଆଦିଲ୍ଲୀ : ପାକିସ୍ତାନର ଜେଲ୍ରେ ବନ୍ଦୀ ଥିବା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଚିକିତ୍ସା ପାଇଁ ଘରୋଇ ହସ୍ପିଟାଲ୍କୁ ସ୍ଥାନାନ୍ତର କରିବା ନେଇ ଦେଶର ରାଜନୀତିରେ ଚର୍ଚ୍ଚା ଜୋର ଧରିଛି। ପାକିସ୍ତାନ ସୁପ୍ରିମକୋର୍ଟ ଇମ୍ରାନଙ୍କ ସ୍ୱାସ୍ଥ୍ୟଗତ ସମସ୍ୟାକୁ ଦୃଷ୍ଟିରେ ରଖି ତାଙ୍କୁ ଆଡିଆଲା ଜେଲ୍ରୁ ଏକ ଘରୋଇ ହସ୍ପିଟାଲ୍କୁ ନେବାକୁ ନିର୍ଦ୍ଦେଶ ଦେଇଛନ୍ତି। ତେବେ ଶେହବାଜ ସରିଫ ସରକାର ଏହି ନିର୍ଦ୍ଦେଶକୁ ଚ୍ୟାଲେଞ୍ଜ କରିଛି। ଏହାରି ମଧ୍ୟରେ ବରିଷ୍ଠ ପାକିସ୍ତାନୀ ସାମ୍ବାଦିକ ହାମିଦ ମୀର ଏହି ଘଟଣା ପଛରେ କୌଣସି ଗୁପ୍ତ ବୁଝାମଣା ଥାଇପାରେ ବୋଲି ଆଶଙ୍କା ପ୍ରକାଶ କରିଛନ୍ତି।
ହାମିଦ ମୀରଙ୍କ ମତରେ, ପାକିସ୍ତାନର ରାଜନୈତିକ ଇତିହାସରେ ଜେଲ୍ରେ ବନ୍ଦୀ ଥିବା ନେତାଙ୍କୁ ଅଦାଲତରୁ ମିଳୁଥିବା ଏଭଳି ରିଲିଫ୍କୁ ପ୍ରାୟତଃ ଗୁପ୍ତ ଡିଲ୍ କିମ୍ବା ପରଦା ପଛର ବୁଝାମଣା ସହ ଯୋଡ଼ି ଦେଖାଯାଇଥାଏ। ସେ ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ଉଦାହରଣ ଦେଇ କହିଛନ୍ତି ଯେ, ଚିକିତ୍ସା ଆଧାରରେ ନୱାଜଙ୍କୁ ଅଦାଲତରୁ ରିଲିଫ୍ ମିଳିବା ପରେ ସେ ଲଣ୍ଡନ ଯାଇଥିଲେ। ତେଣୁ ଇମ୍ରାନଙ୍କ କ୍ଷେତ୍ରରେ ମଧ୍ୟ ଶେହବାଜ ସରିଫ ଶିବିର ଏଭଳି କୌଣସି ଗୁପ୍ତ ବୁଝାମଣାର ଆଶଙ୍କା କରୁଥାଇପାରେ ବୋଲି ମୀର କହିଛନ୍ତି। ତେବେ ଇମ୍ରାନଙ୍କୁ ମିଳିଥିବା ରିଲିଫ୍ ପଛରେ ସେନାର ଭୂମିକା ଥିବା ନେଇ ସେ ସିଧାସଳଖ କୌଣସି ମତ ଦେଇନାହାନ୍ତି।
ଏହି ଘଟଣା ପାକିସ୍ତାନର ଅସ୍ଥିର ରାଜନୈତିକ ପରିସ୍ଥିତି ମଧ୍ୟରେ ଘଟିଛି। ଶେହବାଜ ସରକାରର ମେଣ୍ଟ ସହଯୋଗୀ ପାକିସ୍ତାନ ପିପୁଲ୍ସ ପାର୍ଟି ସହ ମତଭେଦ ବଢ଼ୁଥିବା ବେଳେ ବିଲାୱଲ ଭୁଟ୍ଟୋ ସରକାର ବିରୋଧରେ ଅସନ୍ତୋଷ ପ୍ରକାଶ କରିଛନ୍ତି। ଏପରି ସ୍ଥିତିରେ ଇମ୍ରାନଙ୍କୁ ହସ୍ପିଟାଲ୍ ସ୍ଥାନାନ୍ତର କରାଯିବା ତାଙ୍କ ସମର୍ଥକଙ୍କ ମଧ୍ୟରେ ନୂଆ ଉତ୍ସାହ ସୃଷ୍ଟି କରିପାରେ। ମୀରଙ୍କ କହିବା ଅନୁସାରେ, ଇମ୍ରାନ ଏବେ ମଧ୍ୟ ଲୋକପ୍ରିୟ ନେତା ଏବଂ ପାକିସ୍ତାନର ରାଜନୀତିରେ ଆଗକୁ କ’ଣ ଘଟିବ ତାହା ନିଶ୍ଚିତ ଭାବେ କହିବା କଷ୍ଟକର। ତେଣୁ ଇମ୍ରାନଙ୍କ ହସ୍ପିଟାଲ୍ ସ୍ଥାନାନ୍ତର ତାଙ୍କ ରାଜନୈତିକ ପ୍ରତ୍ୟାବର୍ତ୍ତନର ପଥ ଖୋଲିବ କି ନାହିଁ, ତାହା ଏବେ ଚର୍ଚ୍ଚାର ବିଷୟ ପାଲଟିଛି।
