ଅଗଷ୍ଟ ୨୮ରେ ମିଳିବ ସୁଭଦ୍ରା ଟଙ୍କା! ଏକାସାଙ୍ଗରେ ୫ କିସ୍ତି ପାଇବେ ବାଦ ପଡ଼ିଥିବା ଯୋଗ୍ୟ ମହିଳା
ଭୁବନେଶ୍ୱର: ସୁଭଦ୍ରା ଯୋଜନାକୁ ନେଇ ମହିଳା ହିତାଧିକାରୀଙ୍କ ପାଇଁ ବଡ଼ ଖବର ଆସିଛି। ଆସନ୍ତା ଅଗଷ୍ଟ ୨୮ ତାରିଖ ରକ୍ଷାବନ୍ଧନ ଦିନ ସୁଭଦ୍ରା ଯୋଜନାର ପଞ୍ଚମ କିସ୍ତି ଟଙ୍କା ଯୋଗ୍ୟ ହିତାଧିକାରୀଙ୍କ ଖାତାକୁ ପଠାଯିବ। ଏଥିପାଇଁ ନୟାଗଡ଼ରେ ରାଜ୍ୟସ୍ତରୀୟ ସୁଭଦ୍ରା ସମାରୋହ ଆୟୋଜନ କରାଯିବ। ଏଥର ଏକ କୋଟିରୁ ଅଧିକ ମହିଳା ସୁଭଦ୍ରା ଟଙ୍କା ପାଇବେ ବୋଲି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ସୂଚନା ଦେଇଛନ୍ତି। ଅଗଷ୍ଟ ୨୮ ସୁଦ୍ଧା ଜିଲ୍ଲା ପ୍ରଶାସନ ପକ୍ଷରୁ ଯାଞ୍ଚ ଓ ସୁପାରିସ ହୋଇଥିବା ଯୋଗ୍ୟ ଆବେଦନଗୁଡ଼ିକୁ ମଧ୍ୟ ଏହି ପର୍ଯ୍ୟାୟରେ ସାମିଲ କରାଯିବ।
ଏହି ଘୋଷଣାର ସବୁଠାରୁ ବଡ଼ ଦିଗ ହେଉଛି, ପୂର୍ବରୁ କୌଣସି କାରଣରୁ କିସ୍ତି ପାଇନଥିବା ଯୋଗ୍ୟ ମହିଳାଙ୍କୁ ଏକାଥରକେ ୫ଟି କିସ୍ତିର ଟଙ୍କା ମିଳିବ। ଅର୍ଥାତ୍ ଯୋଗ୍ୟତା ଯାଞ୍ଚ ପରେ ସେମାନଙ୍କୁ ମୋଟ ୨୫ ହଜାର ଟଙ୍କା ପର୍ଯ୍ୟନ୍ତ ମିଳିପାରେ। ଚଳିତ ଆର୍ଥିକ ବର୍ଷରେ ସୁଭଦ୍ରା ଯୋଜନା ପାଇଁ ୩.୧୭ ଲକ୍ଷରୁ ଅଧିକ ନୂଆ ଆବେଦନ ଆସିଥିବା ବେଳେ, ଏଥିରୁ ଅନେକ ଆବେଦନର ଯାଞ୍ଚ ମଧ୍ୟ ସରିଛି। ପୂର୍ବରୁ ଚାରିଟି କିସ୍ତିରେ ପ୍ରାୟ ୨୦,୬୦୦ କୋଟି ଟଙ୍କା ମହିଳାଙ୍କ ଖାତାକୁ ପଠାଯାଇଥିବା ସୂଚନା ମିଳିଛି।
ତେଣୁ ଯେଉଁ ମହିଳାମାନେ ସୁଭଦ୍ରା ଯୋଜନା ପାଇଁ ଆବେଦନ କରିଛନ୍ତି, ସେମାନେ ନିଜର ଆବେଦନର ସ୍ଥିତି ଓ ଯୋଗ୍ୟତା ସମ୍ପର୍କରେ ତଥ୍ୟ ଯାଞ୍ଚ କରିନେବା ଆବଶ୍ୟକ। ଯୋଜନା ସମ୍ପର୍କିତ କୌଣସି ସମସ୍ୟା କିମ୍ବା ସନ୍ଦେହ ଥିଲେ ସୁଭଦ୍ରା ଟୋଲ୍-ଫ୍ରି ନମ୍ବର ୧୪୫୬୭ରେ ଯୋଗାଯୋଗ କରିପାରିବେ। ଅଗଷ୍ଟ ୨୮ରେ ନୟାଗଡ଼ର ରାଜ୍ୟସ୍ତରୀୟ ସମାରୋହରୁ ଟଙ୍କା ବଣ୍ଟନ ହେବାକୁ ଥିବାରୁ, ଏହି ଦିନକୁ ନେଇ ଯୋଗ୍ୟ ହିତାଧିକାରୀଙ୍କ ମଧ୍ୟରେ ଉତ୍ସାହ ବଢ଼ିଛି।
