Karnataka Lokayukta Action: ଜେଲ୍ ଯିବା ବଦଳରେ Hospitalରେ ଅଧିକାରୀ, Surprise Raidରେ Girlfriendଙ୍କ ସହ ଧରାପଡ଼ିଲେ
କର୍ଣ୍ଣାଟକର ଶ୍ରୀରଙ୍ଗପଟ୍ଟଣାର ଭୂମି ରେକର୍ଡ ବିଭାଗର ସହକାରୀ ନିର୍ଦ୍ଦେଶକ ମହମ୍ମଦ ହୁସେନଙ୍କୁ ଏକ କଥିତ ଅବୈଧ ଆକାଉଣ୍ଟ୍ ସମ୍ପର୍କିତ ମାମଲାରେ ଲୋକାୟୁକ୍ତ ପୁଲିସ ଗିରଫ କରିଥିଲା। ଗିରଫ ପରେ ତାଙ୍କୁ ଜେଲ୍ରେ ରଖାଯିବା କଥା ଥିଲା। କିନ୍ତୁ ତାଙ୍କୁ ମାଣ୍ଡ୍ୟା ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସେସ୍ (MIMS)ରେ ଭର୍ତ୍ତି କରାଯାଇ ଏକ ସ୍ୱତନ୍ତ୍ର କୋଠରୀରେ ରଖାଯାଇଥିବା ଜଣାପଡ଼ିଛି। ମାଣ୍ଡ୍ୟା ଜିଲ୍ଲା ଓ ସେସନ୍ସ ଜଜ୍ ସି. ଚନ୍ଦ୍ରଶେଖର ହଠାତ୍ ହସ୍ପିଟାଲ ପରିଦର୍ଶନ କରିବା ପରେ ଏହି ଘଟଣା ସାମ୍ନାକୁ ଆସିଛି।
ଜଜ୍ ଏକ ଟିମ୍ ସହ ହସ୍ପିଟାଲରେ ପହଞ୍ଚି ହୁସେନଙ୍କୁ ରଖାଯାଇଥିବା ୱାର୍ଡ ଯାଞ୍ଚ କରିଥିଲେ। ତାଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ଡାକ୍ତରମାନଙ୍କୁ ପଚରାଯିବାରୁ, ହୁସେନଙ୍କୁ ହସ୍ପିଟାଲରେ ରଖିବା ଭଳି କୌଣସି ଗୁରୁତର ଅସୁସ୍ଥତା ନଥିବା ଜଣେ ଡାକ୍ତର କହିଥିବା ଜଣାପଡ଼ିଛି। ଏହି ସମୟରେ ହୁସେନଙ୍କ ସ୍ୱତନ୍ତ୍ର କୋଠରୀ ଭିତରେ ଜଣେ ଯୁବତୀଙ୍କୁ ମଧ୍ୟ ଦେଖିବାକୁ ମିଳିଥିଲା। ଜଜ୍ ତାଙ୍କ ପରିଚୟ ପଚାରିବାରୁ ସେ ନିଜକୁ ହୁସେନଙ୍କ ପ୍ରେମିକା ବୋଲି କହିଥିବା ସୂଚନା ମିଳିଛି। ଏହାପରେ ଜେଲ୍ରୁ ହୁସେନଙ୍କୁ କାହିଁକି ହସ୍ପିଟାଲକୁ ନିଆଯାଇଥିଲା ଏବଂ ତାଙ୍କୁ ସେଠାରେ ରଖିବାର ଆବଶ୍ୟକତା କ’ଣ ଥିଲା, ସେନେଇ ଜଜ୍ ଜେଲ୍ ଅଧିକାରୀଙ୍କୁ ପଚରାଉଚରା କରିଥିଲେ।
ଜେଲ୍ ଅଧିକାରୀମାନେ ହୁସେନଙ୍କୁ ଜେଲ୍ ଡାକ୍ତରଙ୍କ ସୁପାରିସ ଆଧାରରେ MIMSରେ ଭର୍ତ୍ତି କରାଯାଇଥିବା କହିଥିଲେ। ତେବେ ଜେଲ୍ରୁ ହସ୍ପିଟାଲକୁ ତାଙ୍କୁ ସ୍ଥାନାନ୍ତର କରାଯିବା ସମ୍ପର୍କରେ କୋର୍ଟକୁ ଅବଗତ କରାଯାଇଥିଲା କି ନାହିଁ ବୋଲି ଜଜ୍ ପଚାରିଥିଲେ। ଏନେଇ କୋର୍ଟକୁ ସୂଚନା ଦିଆଯାଇନଥିବା ଜଣେ ଜେଲ୍ ଅଧିକାରୀ ସ୍ୱୀକାର କରିଥିବା ଜଣାପଡ଼ିଛି। ଏହାପରେ ଜଜ୍ ଜେଲ୍ କର୍ତ୍ତୃପକ୍ଷଙ୍କୁ ତାଗିଦ୍ କରିବା ସହ ହୁସେନଙ୍କୁ ହସ୍ପିଟାଲରେ ଭର୍ତ୍ତି ଓ ସେଠାରେ ରହିବାର ସମସ୍ତ ପରିସ୍ଥିତି ସମ୍ପର୍କରେ ଜେଲ୍ ଅଧିକାରୀ ଓ MIMS ମେଡିକାଲ କର୍ତ୍ତୃପକ୍ଷଙ୍କୁ ବିସ୍ତୃତ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି।
