NEET-PG: ମଦ୍ୟପାନ କରି ପରୀକ୍ଷା କେନ୍ଦ୍ରରେ ପହଞ୍ଚିଲେ ପ୍ରାର୍ଥୀ, ସୁରକ୍ଷା ଯାଞ୍ଚ ପରେ ମଧ୍ୟ ହଲ୍ରେ ବସିଲେ; ତୁରନ୍ତ ବାହାର କଲେ କର୍ମଚାରୀ
ନୂଆଦିଲ୍ଲୀ: ତେଲଙ୍ଗାନାର ରଙ୍ଗା ରେଡ୍ଡି ଜିଲ୍ଲାରେ NEET-PG ପରୀକ୍ଷା ସମୟରେ ଏକ ଅଜବ ଘଟଣା ସାମ୍ନାକୁ ଆସିଛି। ଅଗଷ୍ଟ ୩୦ ତାରିଖ ସକାଳେ ସେରିଗୁଡ଼ାର ଏକ ପରୀକ୍ଷା କେନ୍ଦ୍ରରେ ମହମ୍ମଦ ରିଜୱାନ ନାମକ ଜଣେ ପ୍ରାର୍ଥୀ ମଦ୍ୟପାନ କରି ପହଞ୍ଚିଥିବା ଅଭିଯୋଗ ହୋଇଛି। ପ୍ରାରମ୍ଭିକ ସୁରକ୍ଷା ଯାଞ୍ଚ ପରେ ସେ ପରୀକ୍ଷା ହଲ୍ରେ ନିଜ ସିଟ୍ରେ ବସିବାରେ ସଫଳ ହୋଇଥିଲେ। ତେବେ ତାଙ୍କ ଅସ୍ବାଭାବିକ ଆଚରଣ ଦେଖି ପରୀକ୍ଷା କର୍ମଚାରୀମାନଙ୍କ ସନ୍ଦେହ ହୋଇଥିଲା।
କର୍ମଚାରୀମାନେ ତାଙ୍କ ନିକଟରୁ ମଦ୍ୟପାନର ଗନ୍ଧ ପାଇବା ସହ ଆଚରଣରେ ପରିବର୍ତ୍ତନ ଦେଖିଥିଲେ। ଏହାପରେ ଅନ୍ୟ ପରୀକ୍ଷାର୍ଥୀଙ୍କୁ ଅସୁବିଧା ନହେବା ପାଇଁ ରିଜୱାନଙ୍କୁ ତୁରନ୍ତ ପରୀକ୍ଷା ହଲ୍ରୁ ବାହାରକୁ ନିଆଯାଇଥିଲା। ଘଟଣାର ଏକ ଭିଡିଓ ମଧ୍ୟ ସୋସିଆଲ ମିଡିଆରେ ପ୍ରସାରିତ ହେଉଛି, ଯେଉଁଥିରେ ସେ ନିଶାଗ୍ରସ୍ତ ଅବସ୍ଥାରେ ଥିବା ଏବଂ NEET ପରୀକ୍ଷା ଦେବାକୁ ଆସିଥିବା କହୁଥିବା ଦେଖାଯାଇଥିବା ଦାବି କରାଯାଉଛି।
ଘଟଣା ସମ୍ପର୍କରେ ଖବର ପାଇ ପୋଲିସ ପରୀକ୍ଷା କେନ୍ଦ୍ରରେ ପହଞ୍ଚି ତଦନ୍ତ ଆରମ୍ଭ କରିଥିଲା। ଇବ୍ରାହିମପାଟନମ୍ ACP କେ. ରାଜାଙ୍କ ତତ୍ତ୍ୱାବଧାନରେ ରିଜୱାନଙ୍କ ମଦ୍ୟପାନର ମାତ୍ରା ଜାଣିବା ପାଇଁ ବ୍ରେଥଆଲାଇଜର୍ ପରୀକ୍ଷା କରାଯାଇଥିବା ସୂଚନା ମିଳିଛି। ସେ କିପରି ସୁରକ୍ଷା ଯାଞ୍ଚକୁ ଅତିକ୍ରମ କରି ପରୀକ୍ଷା ହଲ୍ରେ ପହଞ୍ଚିଲେ, ତାଙ୍କ ପାଖରେ ନକଲି ପ୍ରବେଶପତ୍ର ଥିଲା କି ନାହିଁ ଏବଂ ଘଟଣାରେ ଅନ୍ୟ କାହାର ସମ୍ପୃକ୍ତି ରହିଛି କି ନାହିଁ, ସେସବୁ ଦିଗରୁ ତଦନ୍ତ ଚାଲିଛି। ଏହି ଘଟଣା ପରୀକ୍ଷା କେନ୍ଦ୍ରର ସୁରକ୍ଷା ବ୍ୟବସ୍ଥାକୁ ନେଇ ମଧ୍ୟ ପ୍ରଶ୍ନ ଉଠାଇଛି।
