PM Modi Honour: ମୋଦୀଙ୍କୁ ଉଜବେକିସ୍ତାନର ସର୍ବୋଚ୍ଚ ସମ୍ମାନ, କଟାକ୍ଷ କଲେ ଓୱେସି
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଉଜବେକିସ୍ତାନର ସର୍ବୋଚ୍ଚ ବନ୍ଧୁତା ସମ୍ମାନ ମିଳିବା ପରେ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି। ଏହି ପ୍ରସଙ୍ଗକୁ ନେଇ ଏଆଇଏମଆଇଏମ ନେତା ତଥା ହାଇଦ୍ରାବାଦ ସାଂସଦ ଅସଦୁଦ୍ଦିନ ଓୱେସି ବିଜେପି ଓ ଆରଏସଏସକୁ କଟାକ୍ଷ କରିଛନ୍ତି। ଉଜବେକିସ୍ତାନ ପକ୍ଷରୁ ମୋଦୀଙ୍କୁ ଦିଆଯାଇଥିବା ସମ୍ମାନକୁ ନେଇ ସେ ବିଜେପିର ପୂର୍ବ ରାଜନୈତିକ ଆଭିମୁଖ୍ୟକୁ ପ୍ରଶ୍ନ କରିଛନ୍ତି।
ଓୱେସି କହିଛନ୍ତି ଯେ, ବିଜେପି ଯେଉଁ ବାବରଙ୍କ ନାମକୁ ନେଇ ଦୀର୍ଘଦିନ ଧରି ରାଜନୈତିକ ଆକ୍ରମଣ କରିଆସୁଥିଲା, ସେହି ବାବରଙ୍କ ଜନ୍ମଭୂମି ଉଜବେକିସ୍ତାନରୁ ଏବେ ଭାରତର ପ୍ରଧାନମନ୍ତ୍ରୀ ସମ୍ମାନିତ ହୋଇଛନ୍ତି। ଏହାକୁ ନେଇ ସେ ଆରଏସଏସ ଓ ବିଜେପିକୁ ନିଜ ଆଭିମୁଖ୍ୟ ଉପରେ ପୁନର୍ବିଚାର କରିବାକୁ କହିଛନ୍ତି। ମୋଦୀ ଯେଉଁ ଦେଶକୁ ଯାଉଛନ୍ତି, ସେଠାରୁ ସମ୍ମାନ ହାସଲ କରୁଛନ୍ତି ବୋଲି ମଧ୍ୟ ସେ କଟାକ୍ଷ କରିଛନ୍ତି।
ରବିବାର ତାସକେଣ୍ଟରେ ଉଜବେକିସ୍ତାନ ରାଷ୍ଟ୍ରପତି ଶଭକତ ମିର୍ଜିୟୋୟେଭ ପ୍ରଧାନମନ୍ତ୍ରୀ ମୋଦୀଙ୍କୁ ଦେଶର ସର୍ବୋଚ୍ଚ ବନ୍ଧୁତା ସମ୍ମାନ ‘ଓଲି ଦାରାଜଲି ଦୋସ୍ତଲିକ୍’ ପ୍ରଦାନ କରିଥିଲେ। ଏହି ସମ୍ମାନ ପରେ ମୋଦୀଙ୍କୁ ବିଭିନ୍ନ ଦେଶରୁ ମିଳିଥିବା ସମ୍ମାନକୁ ନେଇ ମଧ୍ୟ ଚର୍ଚ୍ଚା ହେଉଛି। ଉଜବେକିସ୍ତାନର ଫର୍ଗାନା ଉପତ୍ୟକା ସହ ବାବରଙ୍କ ଐତିହାସିକ ସମ୍ପର୍କ ରହିଥିବାରୁ ଓୱେସିଙ୍କ ଟିପ୍ପଣୀ ରାଜନୈତିକ ଚର୍ଚ୍ଚାକୁ ଆହୁରି ତୀବ୍ର କରିଛି।
