Delhi Crime: ସ୍ଲିପର ବସ୍ରେ ୧୬ ବର୍ଷୀୟା ନାବାଳିକାଙ୍କୁ ଦୁଷ୍କର୍ମ ଅଭିଯୋଗ, ଡ୍ରାଇଭର-କଣ୍ଡକ୍ଟର ଗିରଫ
ନୂଆଦିଲ୍ଲୀ: ଦିଲ୍ଲୀର କାଶ୍ମୀରୀ ଗେଟ୍ ଅଞ୍ଚଳରୁ ଜଣେ ୧୬ ବର୍ଷୀୟା ନାବାଳିକାଙ୍କୁ ସ୍ଲିପର ବସ୍ରେ ଦୁଷ୍କର୍ମ କରାଯାଇଥିବା ନେଇ ଗୁରୁତର ଅଭିଯୋଗ ସାମ୍ନାକୁ ଆସିଛି। ଅଗଷ୍ଟ ୪ ତାରିଖ ରାତିରେ ଘଟିଥିବା ଏହି ଘଟଣାରେ ଦିଲ୍ଲୀ ପୋଲିସ ବସ୍ର ଡ୍ରାଇଭର ଓ କଣ୍ଡକ୍ଟରଙ୍କୁ ଗିରଫ କରିଛି। ପୀଡ଼ିତା ଉତ୍ତରପ୍ରଦେଶର ମୈନପୁରୀ ଜିଲ୍ଲାର ବାସିନ୍ଦା ଏବଂ ଏକାଦଶ ଶ୍ରେଣୀରେ ପଢ଼ୁଥିବା ଜଣାପଡ଼ିଛି।
ପୋଲିସ ଅନୁସାରେ, ପରିବାର ସହ ମନୋମାଳିନ୍ୟ ପରେ ନାବାଳିକା ଜଣକ କାହାକୁ ନଜଣାଇ ନୋଏଡାରେ ରହୁଥିବା ଜଣେ ସମ୍ପର୍କୀୟଙ୍କ ଘରକୁ ଯାଉଥିଲେ। ପ୍ରବଳ ବର୍ଷା ଓ ଅନ୍ଧାର ଯୋଗୁଁ ସେ ଭୁଲବଶତଃ ପରୀ ଚୌକରେ ଓହ୍ଲାଇ ପଡ଼ିଥିଲେ। ସେହି ସମୟରେ ଏକ ଖାଲି ସ୍ଲିପର ବସ୍କୁ ଅଟକାଇବା ପରେ ଡ୍ରାଇଭର ଓ କଣ୍ଡକ୍ଟର ତାଙ୍କୁ ନୋଏଡା ସେକ୍ଟର-୬୩ରେ ଛାଡ଼ିଦେବାକୁ କହି ବସ୍ରେ ବସାଇଥିଲେ। ଅଭିଯୋଗ ଅନୁଯାୟୀ, ବସ୍ ଚାଲିବା ପରେ ଉଭୟ ଅଭିଯୁକ୍ତ ନାବାଳିକାଙ୍କ ସହ ଅପରାଧ କରିଥିଲେ ଏବଂ ବିରୋଧ କରିବାରୁ ତାଙ୍କୁ ଧମକ ଦେଇଥିଲେ।
ଅଭିଯୋଗ ଅନୁସାରେ, ପରୀ ଚୌକରୁ କାଶ୍ମୀରୀ ଗେଟ୍ ପର୍ଯ୍ୟନ୍ତ ପ୍ରାୟ ୪୭ କିଲୋମିଟର ଯାତ୍ରା କରିବା ପରେ ଗଭୀର ରାତିରେ ନାବାଳିକାଙ୍କୁ ରାସ୍ତାରେ ଛାଡ଼ି ଅଭିଯୁକ୍ତମାନେ ଚାଲିଯାଇଥିଲେ। ପୀଡ଼ିତା ପରେ କାଶ୍ମୀରୀ ଗେଟ୍ ପୋଲିସ ଷ୍ଟେସନରେ ପହଞ୍ଚି ଘଟଣା ସମ୍ପର୍କରେ ଅଭିଯୋଗ କରିଥିଲେ। ତଦନ୍ତ ସମୟରେ ପୋଲିସ ତିମାରପୁର ଅଞ୍ଚଳର ଏକ ବସ୍ ପାର୍କିଂରୁ ଡ୍ରାଇଭର କୁଲଦୀପ ଓ କଣ୍ଡକ୍ଟର ସନ୍ଦୀପଙ୍କୁ ଧରିଥିବା ସୂଚନା ମିଳିଛି। ଘଟଣାରେ ବ୍ୟବହୃତ ବସ୍କୁ ମଧ୍ୟ ଜବତ କରାଯାଇ ଫୋରେନ୍ସିକ୍ ଯାଞ୍ଚ କରାଯାଉଛି। ମାମଲାରେ ପୋଲିସ ଆହୁରି ତଦନ୍ତ ଜାରି ରଖିଛି।
