Iran-US War: ବିବାହ ଉତ୍ସବ ବେଳେ ଘର ଉପରେ ଆମେରିକାର ଏୟାରଷ୍ଟ୍ରାଇକ୍, ୪ ବର୍ଷର ଶିଶୁ ସମେତ ୫ ମୃତ; ୫୦ରୁ ଅଧିକ ଆହତ
ନୂଆଦିଲ୍ଲୀ: ଇରାନର ଦକ୍ଷିଣ ଅଞ୍ଚଳରେ ଏକ ବିବାହ ଉତ୍ସବ ଚାଲିଥିବା ସମୟରେ ଆମେରିକାର ଏୟାରଷ୍ଟ୍ରାଇକ୍ ଘଟିଥିବା ଅଭିଯୋଗ ହୋଇଛି। ହର୍ମୁଜ୍ ପ୍ରଣାଳୀ ନିକଟ ହର୍ମୋଜଗାନ୍ ପ୍ରଦେଶର ସିରିକ୍ କାଉଣ୍ଟି ଅନ୍ତର୍ଗତ କୁହେସ୍ତାକ୍ ଅଞ୍ଚଳରେ ଏକ ଆବାସିକ ଘରକୁ ଲକ୍ଷ୍ୟ କରି ଏହି ଆକ୍ରମଣ ହୋଇଥିବା ଇରାନୀ କର୍ତ୍ତୃପକ୍ଷ କହିଛନ୍ତି। ଆକ୍ରମଣରେ ୪ ବର୍ଷର ଶିଶୁ ସମେତ ଅତି କମ୍ରେ ୫ ଜଣଙ୍କ ମୃତ୍ୟୁ ହୋଇଥିବାବେଳେ ୫୦ରୁ ଅଧିକ ଲୋକ ଆହତ ହୋଇଛନ୍ତି। ଉଦ୍ଧାର କାର୍ଯ୍ୟ ଜାରି ରହିଥିବାରୁ ମୃତାହତଙ୍କ ସଂଖ୍ୟା ଆହୁରି ବଢ଼ିପାରେ ବୋଲି ରିପୋର୍ଟରେ ଆଶଙ୍କା କରାଯାଇଛି।
ଏହି ଘଟଣାକୁ ନେଇ ଇରାନ ପକ୍ଷରୁ ତୀବ୍ର ପ୍ରତିକ୍ରିୟା ଆସିଛି। ଇରାନର ବୈଦେଶିକ ମନ୍ତ୍ରଣାଳୟ ଏହି ଆକ୍ରମଣକୁ ଚାଲିଥିବା ସଂଘର୍ଷରେ ସାଧାରଣ ନାଗରିକଙ୍କ ମୃତ୍ୟୁର ଏକ ବ୍ୟାପକ ଶୃଙ୍ଖଳାର ଅଂଶ ବୋଲି କହିଛି। ଇରାନୀ ଦୂତାବାସ ମଧ୍ୟ ଏହାକୁ ଆମେରିକୀୟ ସେନାର ଆଉ ଏକ ଅପରାଧ ବୋଲି ଅଭିଯୋଗ କରିଛି। ତେବେ ଏହି ବିବାହ ସମାରୋହ ଉପରେ ହୋଇଥିବା ଆକ୍ରମଣ ସମ୍ପର୍କରେ ଆମେରିକାର ପ୍ରତିରକ୍ଷା ବିଭାଗ ପକ୍ଷରୁ ଏପର୍ଯ୍ୟନ୍ତ କୌଣସି ଔପଚାରିକ ବିବୃତି ଆସିନାହିଁ। ଏହାପୂର୍ବରୁ ମିନାବ୍ର ଏକ ବାଳିକା ବିଦ୍ୟାଳୟ ଉପରେ ଆମେରିକାର ଆକ୍ରମଣରେ ୧୬୦ ଜଣଙ୍କ ମୃତ୍ୟୁ ହୋଇଥିବା ଇରାନ ଦାବି କରିଥିଲା। ଏହି ଘଟଣା ନେଇ ମଧ୍ୟ ଆମେରିକୀୟ ସେନା ପକ୍ଷରୁ ଅନ୍ତିମ ନିଷ୍କର୍ଷ ପ୍ରକାଶ ପାଇନାହିଁ।
ବିବାହ ଉତ୍ସବ ଉପରେ ଆକ୍ରମଣ ପରେ ଆମେରିକା ଓ ଇରାନ ମଧ୍ୟରେ ସଂଘର୍ଷ ପୁଣି ତୀବ୍ର ହୋଇଛି। ଆମେରିକୀୟ ସେଣ୍ଟ୍ରାଲ୍ କମାଣ୍ଡ ଅନୁସାରେ, ଇରାନର ଇସ୍ଲାମିକ୍ ରିଭଲ୍ୟୁସନାରୀ ଗାର୍ଡ କର୍ପ୍ସ (IRGC) ସହ ଜଡ଼ିତ ଏୟାର୍ ଡିଫେନ୍ସ, ରାଡାର, ସାମୁଦ୍ରିକ ସମ୍ପତ୍ତି, ମାଇନ୍ ବିଛାଇବା କ୍ଷମତା ଓ ଯୋଗାଯୋଗ ବ୍ୟବସ୍ଥାକୁ ଲକ୍ଷ୍ୟ କରି ଆକ୍ରମଣ କରାଯାଇଛି। ଏହାର ପ୍ରତିଜବାବରେ ଇରାନ ଅଞ୍ଚଳରେ ଥିବା ଆମେରିକୀୟ ସାମରିକ ଘାଟି ଉପରେ ମିସାଇଲ୍ ଓ ଡ୍ରୋନ୍ ଆକ୍ରମଣ କରିଥିବା ଦାବି କରିଛି। ଏହି ନୂଆ ସଂଘର୍ଷ ଯୋଗୁଁ ହର୍ମୁଜ୍ ପ୍ରଣାଳୀ ଦେଇ ବିଶ୍ୱର ତୈଳ ପରିବହନ ଉପରେ ମଧ୍ୟ ଚିନ୍ତା ବଢ଼ିଛି ଏବଂ ତୈଳ ମୂଲ୍ୟରେ ଉତ୍ତେଜନା ଦେଖାଦେଇଛି।
