Bihar Flood Alert: ବନ୍ୟା ପାଣିରୁ ମାଛ ଖାଇବା ମନା, ବିକ୍ରି ଓ କିଣିବା ଉପରେ ସରକାରଙ୍କ କଡ଼ା ଚେତାବନୀ
ବିହାର: ନେପାଳରେ ଭୟଙ୍କର ବନ୍ୟା ପରେ ଏବେ ବିହାରରେ ମଧ୍ୟ ବିପଦ ବଢ଼ିଛି। କୋଶୀ, ଗଣ୍ଡକ ଓ ଅନ୍ୟ ନଦୀରେ ବନ୍ୟାଜଳ ବଢ଼ିବା ସହ ଅନେକ ଅଞ୍ଚଳରେ ପାଣି ପଶିଛି। ଏହାରି ମଧ୍ୟରେ ବନ୍ୟା ପାଣିରୁ ଧରାଯାଉଥିବା ମାଛକୁ ନେଇ ଚିନ୍ତା ବଢ଼ିଛି। ଲୋକଙ୍କୁ ଏଭଳି ମାଛ ନଖାଇବା, ନବିକିବା ଓ ନକିଣିବା ପାଇଁ ପ୍ରଶାସନ ପକ୍ଷରୁ ସତର୍କ କରାଯାଇଛି। ନେପାଳ ପୁଲିସ ମଧ୍ୟ ବନ୍ୟା ପରିସ୍ଥିତିରେ ଖାଦ୍ୟ ଓ ପାଣିକୁ ନେଇ ସତର୍କ ରହିବାକୁ ଲୋକଙ୍କୁ କହିଛି।
ବନ୍ୟା ପାଣି ସହ ବିଭିନ୍ନ ସ୍ଥାନର ଆବର୍ଜନା, ମଇଳା ପାଣି ଓ ମୃତ ଜୀବଜନ୍ତୁଙ୍କ ଅବଶେଷ ଭାସି ଆସିବାର ଆଶଙ୍କା ରହିଥାଏ। ଏଭଳି ପ୍ରଦୂଷିତ ପାଣିରେ ରହୁଥିବା ମାଛ ମଧ୍ୟ ଦୂଷିତ ହୋଇପାରେ। ଏହାକୁ ଖାଇଲେ ଖାଦ୍ୟଜନିତ ଅସୁସ୍ଥତାର ଆଶଙ୍କା ବଢ଼ିପାରେ। ବନ୍ୟା ପରେ ଅନେକ ସ୍ଥାନରେ ଲୋକେ ପାଣିରୁ ମାଛ ଧରି ଖାଉଥିବାରୁ ପ୍ରଶାସନ ଏନେଇ ସତର୍କତା ଜାରି କରିଛି। ତେଣୁ ବନ୍ୟା ପାଣିରୁ ଧରାଯାଇଥିବା ଅଜଣା ମାଛ ଖାଇବାଠାରୁ ଦୂରେଇ ରହିବାକୁ କୁହାଯାଇଛି।
କେବଳ ମାଛ ନୁହେଁ, ବନ୍ୟା ପରେ ପାନୀୟ ଜଳକୁ ନେଇ ମଧ୍ୟ ସତର୍କତା ଆବଶ୍ୟକ। ବନ୍ୟାଜଳ କୂଅ, ନଳକୂପ ଓ ଅନ୍ୟ ଜଳ ଉତ୍ସରେ ପଶିଲେ ପାଣି ପ୍ରଦୂଷିତ ହୋଇପାରେ। ଏହାସହ ଜମି ରହିଥିବା ପାଣି ଯୋଗୁଁ ମଶାବାହିତ ରୋଗର ଆଶଙ୍କା ମଧ୍ୟ ବଢ଼ିଥାଏ। ତେଣୁ ବନ୍ୟା ପରିସ୍ଥିତିରେ ଅଜଣା ମାଛ ନଖାଇବା ସହ ସୁରକ୍ଷିତ ଓ ପରିଷ୍କାର ପାଣି ବ୍ୟବହାର କରିବାକୁ ପ୍ରଶାସନ ପକ୍ଷରୁ ଲୋକଙ୍କୁ ସଚେତନ କରାଯାଇଛି।
