China Typhoon: ‘ସାଉଡେଲ୍’ର କରାଳ ରୂପ, ଚୀନ୍ର ଫୁଜିଆନ୍ରେ ତୃତୀୟ ଲ୍ୟାଣ୍ଡଫଲ୍
ନୂଆଦିଲ୍ଲୀ: ଚୀନ୍ରେ ଚଳିତ ବର୍ଷର ୧୮ତମ ଟାଇଫୁନ୍ ‘ସାଉଡେଲ୍’ ଗୁରୁବାର ସକାଳେ ଫୁଜିଆନ୍ ପ୍ରଦେଶରେ ତୃତୀୟ ଥର ପାଇଁ ଲ୍ୟାଣ୍ଡଫଲ୍ କରିଛି। ସକାଳ ପ୍ରାୟ ୬ଟା ୩୦ରେ ଝାଙ୍ଗଝୋଉ ସହରର ଝାଙ୍ଗପୁ କାଉଣ୍ଟି ଉପକୂଳରେ ଟାଇଫୁନ୍ ପହଞ୍ଚିଥିଲା। ଆଞ୍ଚଳିକ ପାଣିପାଗ ବିଜ୍ଞାନ ଅବଜରଭେଟୋରୀ ଅନୁସାରେ, ଏହାର କେନ୍ଦ୍ର ନିକଟରେ ସର୍ବାଧିକ ପବନର ବେଗ ଘଣ୍ଟା ପ୍ରତି ପ୍ରାୟ ୮୬ କିଲୋମିଟର ରେକର୍ଡ ହୋଇଛି। ଏହା ପୂର୍ବରୁ ଅଗଷ୍ଟ ୨୮ରେ ଝେଜିଆଙ୍ଗ ପ୍ରଦେଶର ଉପକୂଳରେ ସାଉଡେଲ୍ ଦୁଇଥର ଲ୍ୟାଣ୍ଡଫଲ୍ କରିଥିଲା।
ଝେଜିଆଙ୍ଗରେ ପ୍ରଥମ ଲ୍ୟାଣ୍ଡଫଲ୍ ସମୟରେ ଟାଇଫୁନ୍ର କେନ୍ଦ୍ର ନିକଟରେ ପବନର ବେଗ ସେକେଣ୍ଡ ପ୍ରତି ୩୫ ମିଟର ଥିଲା। ଏହାର କିଛି ସମୟ ପରେ ୱେନଝୋଉ ସହର ଉପକୂଳରେ ଦ୍ୱିତୀୟ ଲ୍ୟାଣ୍ଡଫଲ୍ ହୋଇଥିଲା, ସେତେବେଳେ ସର୍ବାଧିକ ପବନ ବେଗ ଘଣ୍ଟା ପ୍ରତି ୧୨୬ କିଲୋମିଟର ରେକର୍ଡ ହୋଇଥିଲା। ଝଡ଼ର ଆଶଙ୍କାକୁ ଦୃଷ୍ଟିରେ ରଖି ଝେଜିଆଙ୍ଗ ପ୍ରଦେଶ ଅଗଷ୍ଟ ୨୭ରେ ଜରୁରୀକାଳୀନ ପ୍ରତିକ୍ରିୟା ସ୍ତରକୁ ସର୍ବୋଚ୍ଚ ସ୍ତର-୧କୁ ବଢ଼ାଇଥିଲା। ଫୁଜିଆନ୍ରେ ମଧ୍ୟ ବିପଦପ୍ରବଣ ଅଞ୍ଚଳରୁ ପ୍ରାୟ ୨,୪୭,୭୦୦ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଥିଲା।
ଝଡ଼ର ମୁକାବିଲା ପାଇଁ ଫୁଜିଆନ୍ରେ ୮୦ ହଜାରରୁ ଅଧିକ ଜରୁରୀକାଳୀନ କର୍ମଚାରୀ ଓ ପ୍ରାୟ ୮୦ ହଜାର ଉପକରଣ ପ୍ରସ୍ତୁତ ରଖାଯାଇଥିଲା। ଜାତୀୟ ପାଣିପାଗ କେନ୍ଦ୍ର ମଧ୍ୟ ଟାଇଫୁନ୍ ସତର୍କତା ଜାରି କରି ଝଡ଼ ଦକ୍ଷିଣ-ପଶ୍ଚିମ ଦିଗକୁ ଘଣ୍ଟା ପ୍ରତି ୨୦ରୁ ୨୫ କିଲୋମିଟର ବେଗରେ ଗତି କରି ଧୀରେ ଧୀରେ ଦୁର୍ବଳ ହେବ ବୋଲି ଆକଳନ କରିଥିଲା। ଝେଜିଆଙ୍ଗରେ ୪ ହଜାରରୁ ଅଧିକ ନିରୀକ୍ଷଣ କର୍ମଚାରୀ ୭,୨୦୦ରୁ ଅଧିକ ବିପଦପ୍ରବଣ ସ୍ଥାନରେ ୧୯ ହଜାରରୁ ଅଧିକ ଥର ପାଟ୍ରୋଲିଂ କରିଥିବା ବେଳେ, ୫୬୪ ଜଣ ଭୂତାତ୍ତ୍ୱିକ ବିଶେଷଜ୍ଞଙ୍କୁ ୭୩ଟି କାଉଣ୍ଟିକୁ ପଠାଯାଇଥିଲା।
