Bank Strike: ସେପ୍ଟେମ୍ବର ୧୧ରୁ ବ୍ୟାଙ୍କ କର୍ମଚାରୀଙ୍କ ଧର୍ମଘଟ, ୫ ଦିନିଆ କାର୍ଯ୍ୟସପ୍ତାହ ଓ PLIକୁ ନେଇ ବଡ଼ ନିଷ୍ପତ୍ତି
ନୂଆଦିଲ୍ଲୀ: ବିଭିନ୍ନ ଦାବି ପୂରଣ ନହେବାକୁ ନେଇ ବ୍ୟାଙ୍କ କର୍ମଚାରୀ ସଂଗଠନଗୁଡ଼ିକ ଧର୍ମଘଟ ଡାକରା ଦେଇଛନ୍ତି। United Forum of Bank Unions (UFBU) ପକ୍ଷରୁ ସେପ୍ଟେମ୍ବର ୧୧ରେ ଗୋଟିଏ ଦିନିଆ ଧର୍ମଘଟ ଏବଂ ସେପ୍ଟେମ୍ବର ୨୮ରୁ ୩୦ ପର୍ଯ୍ୟନ୍ତ ୩ ଦିନିଆ ଧର୍ମଘଟ ଘୋଷଣା କରାଯାଇଛି। ଦାବି ପୂରଣ ନହେଲେ ଅକ୍ଟୋବର ୨୬ରୁ ଅନିର୍ଦ୍ଦିଷ୍ଟକାଳୀନ ଧର୍ମଘଟ କରିବାକୁ ମଧ୍ୟ ସଂଗଠନଗୁଡ଼ିକ ଚେତାବନୀ ଦେଇଛନ୍ତି। UFBU ଅଧୀନରେ AIBEA, AIBOC, NCBE, AIBOA, BEFI, INBOC ଓ INBEF ସମେତ ୭ଟି ୟୁନିୟନ ରହିଛି।
ୟୁନିୟନଗୁଡ଼ିକର ମୁଖ୍ୟ ଦାବି ମଧ୍ୟରେ ୫ ଦିନିଆ ବ୍ୟାଙ୍କିଂ ସପ୍ତାହ ଲାଗୁ କରିବା, ସରକାରଙ୍କ Performance Linked Incentive (PLI) ବ୍ୟବସ୍ଥା ପ୍ରତ୍ୟାହାର ଏବଂ ଦ୍ୱିପାକ୍ଷିକ ଆଲୋଚନା ମାଧ୍ୟମରେ ପ୍ରୋତ୍ସାହନ ବ୍ୟବସ୍ଥାରେ ପରିବର୍ତ୍ତନ ଆଣିବା ରହିଛି। ୨୦୨୪ର ଦରମା ଚୁକ୍ତି ଅନୁସାରେ ସୋମବାରରୁ ଶୁକ୍ରବାର ପ୍ରତିଦିନ ଅତିରିକ୍ତ ୪୦ ମିନିଟ୍ କାମ କରିବା ବଦଳରେ ସମସ୍ତ ଶନିବାରକୁ ଛୁଟି ଦେବା ପ୍ରସ୍ତାବ ରହିଥିଲା। ୟୁନିୟନର ଦାବି ଅନୁସାରେ ଏହି ପ୍ରସ୍ତାବ ଦୁଇ ବର୍ଷରୁ ଅଧିକ ସମୟ ଧରି ଅର୍ଥ ମନ୍ତ୍ରଣାଳୟର ଅନୁମୋଦନ ଅପେକ୍ଷାରେ ରହିଛି।
ଅନ୍ୟପକ୍ଷରେ, PLI ବ୍ୟବସ୍ଥାକୁ ନେଇ ମଧ୍ୟ ବ୍ୟାଙ୍କ ୟୁନିୟନଗୁଡ଼ିକ ଆପତ୍ତି ଉଠାଇଛନ୍ତି। ୟୁନିୟନର ଦାବି ଅନୁସାରେ, ୨୦୨୪ ନଭେମ୍ବରରେ ଆର୍ଥିକ ସେବା ବିଭାଗ Scale IVରୁ VII ପର୍ଯ୍ୟନ୍ତ ଅଧିକାରୀଙ୍କ ପାଇଁ ବ୍ୟକ୍ତିଗତ ପ୍ରଦର୍ଶନ ଆଧାରିତ ନୂଆ ପ୍ରୋତ୍ସାହନ ଫର୍ମୁଲା ଲାଗୁ କରିବାକୁ ନିର୍ଦ୍ଦେଶ ଦେଇଥିଲା। ଏହା ପ୍ରାୟ ୪୦ ହଜାର ଅଧିକାରୀଙ୍କୁ ପ୍ରଭାବିତ କରିବ ବୋଲି ୟୁନିୟନ କହିଛି। ଅଗଷ୍ଟ ୨୧, ୨୦୨୬ରେ ଆର୍ଥିକ ସେବା ବିଭାଗ ପୁଣି ଏହି ବ୍ୟବସ୍ଥା ଲାଗୁ କରିବାକୁ ବ୍ୟାଙ୍କଗୁଡ଼ିକୁ ନିର୍ଦ୍ଦେଶ ଦେବା ପରେ ବିବାଦ ଆହୁରି ତୀବ୍ର ହୋଇଛି। ୟୁନିୟନଗୁଡ଼ିକ ଏହାକୁ ଭେଦଭାବପୂର୍ଣ୍ଣ ବୋଲି ଦାବି କରି ଧର୍ମଘଟ ଡାକରା ଦେଇଛନ୍ତି।
