TGSRTC Conductor: ହଜ୍ ଯାତ୍ରୀଙ୍କ ୩ ଲକ୍ଷ ଟଙ୍କା ଫେରାଇଲେ କଣ୍ଡକ୍ଟର, ବସ୍ରେ ଛାଡ଼ି ଯାଇଥିଲେ ଟଙ୍କା ଭର୍ତ୍ତି ବ୍ୟାଗ୍
ତେଲେଙ୍ଗାନା: ବସ୍ରେ ଯାତ୍ରା କରୁଥିବା ବେଳେ ଭୁଲ୍ରେ ଛାଡ଼ି ଯାଇଥିବା ୩ ଲକ୍ଷ ଟଙ୍କା ଭର୍ତ୍ତି ବ୍ୟାଗ୍କୁ ଯାତ୍ରୀଙ୍କୁ ଫେରାଇ ମାନବିକତାର ଉଦାହରଣ ଦେଇଛନ୍ତି ତେଲେଙ୍ଗାନା ଷ୍ଟେଟ୍ ରୋଡ୍ ଟ୍ରାନ୍ସପୋର୍ଟ କର୍ପୋରେସନ୍ (TGSRTC)ର ଜଣେ କଣ୍ଡକ୍ଟର। ଶନିବାର ଶାଦନଗରର ବ୍ୟବସାୟୀ ଜାହାଙ୍ଗୀର ତାଙ୍କ ପତ୍ନୀଙ୍କ ସହ ହାଇଦ୍ରାବାଦ ଆସୁଥିଲେ। ଅଫଜଲଗଞ୍ଜରେ ବସ୍ରୁ ଓହ୍ଲାଇ ନାମପଲ୍ଲୀ ଅଭିମୁଖେ ଯାଇଥିବା ବେଳେ ତାଙ୍କ ବ୍ୟାଗ୍ଟି ବସ୍ରେ ରହିଯାଇଥିଲା।
କିଛି ସମୟ ପରେ ବ୍ୟାଗ୍ ଛାଡ଼ି ଆସିଥିବା ଜାହାଙ୍ଗୀର ଓ ତାଙ୍କ ପତ୍ନୀ ଜାଣିବାକୁ ପାଇଥିଲେ। ବ୍ୟାଗ୍ରେ ୩ ଲକ୍ଷ ଟଙ୍କା ଥିବାରୁ ସେମାନେ ଚିନ୍ତାରେ ପଡ଼ି ତୁରନ୍ତ ବସ୍ଷ୍ଟାଣ୍ଡକୁ ଫେରିଥିଲେ। ସେପଟେ ଡ୍ୟୁଟିରେ ଥିବା କଣ୍ଡକ୍ଟର ସରିତା ବସ୍ ଭିତରେ ଅବହେଳିତ ଭାବେ ପଡ଼ିଥିବା ବ୍ୟାଗ୍ଟି ଦେଖିଥିଲେ। ସେ ତୁରନ୍ତ ଡ୍ରାଇଭର ନରସିମ୍ହୁଲୁଙ୍କୁ ଜଣାଇ ଟଙ୍କାକୁ ସୁରକ୍ଷିତ ରଖିଥିଲେ।
ଜାହାଙ୍ଗୀର ଓ ତାଙ୍କ ପତ୍ନୀ ବସ୍ଷ୍ଟାଣ୍ଡକୁ ଫେରିବା ପରେ କଣ୍ଡକ୍ଟର ସରିତା ଓ ଡ୍ରାଇଭର ନରସିମ୍ହୁଲୁ ସମ୍ପୂର୍ଣ୍ଣ ୩ ଲକ୍ଷ ଟଙ୍କା ସେମାନଙ୍କୁ ଫେରାଇ ଦେଇଥିଲେ। ଟଙ୍କା ଫେରି ପାଇବା ପରେ ଦମ୍ପତି କଣ୍ଡକ୍ଟର ଓ ଡ୍ରାଇଭରଙ୍କୁ ଧନ୍ୟବାଦ ଜଣାଇଥିଲେ। ସେମାନଙ୍କ ଏହି ସଚ୍ଚୋଟତାକୁ ନେଇ TGSRTC ପକ୍ଷରୁ ମଧ୍ୟ ପ୍ରଶଂସା କରାଯାଇଛି।
