Jammu Madrasa Case: ଶିକ୍ଷକଙ୍କ ମାଡ଼ ପରେ ମାଦ୍ରାସାରୁ ଦୌଡ଼ି ପଳାଇଆସିଲା୯ ବର୍ଷର ପିଲା, ୩୦ କିମି ଦୂରରୁ ଉଦ୍ଧାର
ଜମ୍ମୁ-କଶ୍ମୀର: ଜମ୍ମୁ-କଶ୍ମୀରର କିସ୍ତୱାର ଜିଲ୍ଲାରେ ଜଣେ ୯ ବର୍ଷର ଶିଶୁଙ୍କୁ ମାଦ୍ରାସାର ଜଣେ ଶିକ୍ଷକ ମାଡ଼ ମାରିଥିବା ଅଭିଯୋଗ ସାମ୍ନାକୁ ଆସିଛି। ଅଭିଯୋଗ ଅନୁସାରେ, ଶିକ୍ଷକଙ୍କ ମାଡ଼ ପରେ ଭୟଭୀତ ହୋଇ ଶିଶୁଟି ମାଦ୍ରାସାରୁ ବାହାରି ଯାଇଥିଲା। ପରେ ସେ ପ୍ରାୟ ୩୦ କିଲୋମିଟର ଦୂରରେ ଏକୁଟିଆ ବୁଲୁଥିବା ବେଳେ ସ୍ଥାନୀୟ ଲୋକଙ୍କ ନଜରକୁ ଆସିଥିଲା। ତାଙ୍କ ଶରୀରରେ ଆଘାତର ଚିହ୍ନ ଦେଖି ସ୍ଥାନୀୟ ଲୋକେ ଶିଶୁ କଲ୍ୟାଣ କମିଟିକୁ ସୂଚନା ଦେଇଥିଲେ।
ଶିଶୁ କଲ୍ୟାଣ କମିଟି ଶିଶୁଟିକୁ ଉଦ୍ଧାର କରି ଚିକିତ୍ସା ଓ ପରାମର୍ଶ ଦେଇଛି। ଶିଶୁଟି ଅଭିଯୋଗ କରିଥିବା ଅନୁସାରେ, ମାଦ୍ରାସାରେ ଏଭଳି ମାଡ଼ ମାରିବା ଘଟଣା ନିୟମିତ ଥିଲା ଏବଂ ଅନ୍ୟ କିଛି ପିଲାଙ୍କୁ ମଧ୍ୟ ବିଭିନ୍ନ କାରଣରେ ମାଡ଼ ମରାଯାଉଥିଲା। ତେବେ ଏହି ଅଭିଯୋଗର ସତ୍ୟତା ତଦନ୍ତ ପରେ ସ୍ପଷ୍ଟ ହେବ। ଘଟଣାରେ ଆଇନଗତ ପଦକ୍ଷେପ ଆରମ୍ଭ ହୋଇଥିବା ବେଳେ ଅଭିଯୁକ୍ତ ଶିକ୍ଷକ ଓ ମାଦ୍ରାସା ପ୍ରଶାସନ ବିରୋଧରେ ଶିଶୁ ସୁରକ୍ଷା ଆଇନ ଅନୁସାରେ କାର୍ଯ୍ୟାନୁଷ୍ଠାନ ନେବାକୁ ପ୍ରକ୍ରିୟା ଆରମ୍ଭ ହୋଇଛି।
କିସ୍ତୱାର ଜିଲ୍ଲାପାଳ ପଙ୍କଜ କୁମାର କହିଛନ୍ତି ଯେ, ଡାକ୍ତରୀ ପରୀକ୍ଷା ପରେ ଶିଶୁଟିକୁ ଜୁଭେନାଇଲ୍ ଜଷ୍ଟିସ୍ ବୋର୍ଡ ସମ୍ମୁଖରେ ହାଜର କରାଯିବ। ଅଭିଯୁକ୍ତଙ୍କ ବିରୋଧରେ ଏତଲା ରୁଜୁ କରାଯାଇ କଠୋର ପଦକ୍ଷେପ ନିଆଯିବ ବୋଲି ସେ କହିଛନ୍ତି। ଏହି ଘଟଣାକୁ ଶିଶୁ ଅଧିକାର କର୍ମୀମାନେ ନିନ୍ଦା କରିବା ସହ ଶିକ୍ଷାନୁଷ୍ଠାନରେ ପିଲାଙ୍କ ସୁରକ୍ଷା ନିଶ୍ଚିତ କରିବାକୁ ଦାବି କରିଛନ୍ତି।
