EPFO Wage Ceiling: PF ନିୟମରେ ବଡ଼ ପରିବର୍ତ୍ତନ, ଚାକୀରିଆଙ୍କ ଦରମା ସୀମା ୧୫ ହଜାରରୁ ୨୫ ହଜାରକୁ ବୃଦ୍ଧି
ନୂଆଦିଲ୍ଲୀ: ଦେଶର କର୍ମଜୀବୀଙ୍କ ସାମାଜିକ ସୁରକ୍ଷାକୁ ଆହୁରି ବ୍ୟାପକ କରିବା ଦିଗରେ କେନ୍ଦ୍ର ସରକାର ଏକ ବଡ଼ ପଦକ୍ଷେପ ନେଇଛନ୍ତି। ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ କେନ୍ଦ୍ର କ୍ୟାବିନେଟ୍ ବୈଠକରେ EPFO ଅଧୀନରେ ବାଧ୍ୟତାମୂଳକ ଦରମା ସୀମାକୁ ମାସିକ ୧୫,୦୦୦ ଟଙ୍କାରୁ ୨୫,୦୦୦ ଟଙ୍କାକୁ ବୃଦ୍ଧି କରିବା ପ୍ରସ୍ତାବକୁ ମଞ୍ଜୁରୀ ମିଳିଛି। ସରକାରଙ୍କ ଆକଳନ ଅନୁସାରେ, ଏହା ଦ୍ୱାରା ୫୧ ଲକ୍ଷରୁ ଅଧିକ ନୂଆ କର୍ମଚାରୀ EPFOର ସାମାଜିକ ସୁରକ୍ଷା ବ୍ୟବସ୍ଥାରେ ସାମିଲ ହୋଇପାରିବେ।
୨୦୧୪ ସେପ୍ଟେମ୍ବରରେ EPFOର ଦରମା ସୀମା ୧୫,୦୦୦ ଟଙ୍କା କରାଯାଇଥିଲା। ଏହା ପରେ ବେତନ ବୃଦ୍ଧି, ଆୟ ବଢ଼ିବା ଏବଂ ଆନୁଷ୍ଠାନିକ କ୍ଷେତ୍ରରେ ନିଯୁକ୍ତି ବଢ଼ିଥିବାକୁ ଦୃଷ୍ଟିରେ ରଖି ଦୀର୍ଘ ସମୟ ପରେ ସୀମା ବୃଦ୍ଧି କରାଯାଇଛି। ଏହା ଲାଗୁ ହେଲେ ୧୫,୦୦୦ରୁ ୨୫,୦୦୦ ଟଙ୍କା ମଧ୍ୟରେ ଦରମା ପାଉଥିବା ଯୋଗ୍ୟ କର୍ମଚାରୀମାନେ EPFOର ତିନି ପ୍ରମୁଖ ଯୋଜନା-EPF, EPS ଓ EDLI—ଅଧୀନରେ ସଞ୍ଚୟ, ପେନସନ୍ ଏବଂ ବୀମା ସୁରକ୍ଷାର ସୁବିଧା ପାଇପାରିବେ।
ଏହି ନିଷ୍ପତ୍ତି ଯୋଗୁଁ ସରକାରଙ୍କ ଆର୍ଥିକ ଦାୟିତ୍ୱ ମଧ୍ୟ ବଢ଼ିବ। ସୂଚନା ଅନୁସାରେ, ବାର୍ଷିକ ବଜେଟ୍ ସହାୟତା ପୂର୍ବର ପ୍ରାୟ ୧୦,୨୫୦ କୋଟି ଟଙ୍କାରୁ ବଢ଼ି ପ୍ରାୟ ୧୧,୩୩୯ କୋଟି ଟଙ୍କା ହୋଇପାରେ ଏବଂ ଆଗାମୀ ୫ ବର୍ଷରେ ସରକାର ପ୍ରାୟ ୫୬,୬୯୬ କୋଟି ଟଙ୍କା ବ୍ୟୟ କରିପାରନ୍ତି। EPFO ବର୍ତ୍ତମାନ ପ୍ରାୟ ୭.୯୮ କୋଟି ସଦସ୍ୟ ଓ ୮୨ ଲକ୍ଷ ପେନସନଭୋଗୀଙ୍କୁ ସେବା ଦେଉଛି। ନୂଆ ବ୍ୟବସ୍ଥାର ବିଧିବଦ୍ଧ କାର୍ଯ୍ୟକାରିତା ପାଇଁ ଶ୍ରମ ମନ୍ତ୍ରଣାଳୟ ପରବର୍ତ୍ତୀ ପଦକ୍ଷେପ ନେବ ବୋଲି ସୂଚନା ମିଳିଛି।
