Kanpur Hospital: ଡାକ୍ତର ନଥିବା ବେଳେ ଡ୍ରାଇଭର ଦେଖିଲେ ରୋଗୀ, ପ୍ରେସକ୍ରିପସନ୍ରେ ଲେଖିଲେ ଔଷଧ; ଭିଡିଓ ଭାଇରାଲ
ଉତ୍ତରପ୍ରଦେଶ: ଉତ୍ତରପ୍ରଦେଶର କାନପୁରସ୍ଥିତ କାଶୀରାମ ଯୁକ୍ତ ଚିକିତ୍ସାଳୟ ଓ ଟ୍ରମା ସେଣ୍ଟରରୁ ସ୍ୱାସ୍ଥ୍ୟ ବ୍ୟବସ୍ଥାକୁ ନେଇ ପ୍ରଶ୍ନ ଉଠାଇଥିବା ଏକ ଭିଡିଓ ସାମ୍ନାକୁ ଆସିଛି। ଭିଡିଓରେ ଡାକ୍ତରଙ୍କ ଅନୁପସ୍ଥିତିରେ ଜଣେ ଡ୍ରାଇଭର ରୋଗୀଙ୍କ ସମସ୍ୟା ପଚାରିବା ସହ ପ୍ରେସକ୍ରିପସନ୍ରେ ଔଷଧ ଲେଖୁଥିବା ଦେଖାଯାଉଛି। ଏହି ଭିଡିଓ ସୋସିଆଲ ମିଡିଆରେ ପ୍ରସାରିତ ହେବା ପରେ ଘଟଣାଟିକୁ ନେଇ ଚର୍ଚ୍ଚା ଆରମ୍ଭ ହୋଇଛି।
ଭିଡିଓଟି ସାମ୍ନାକୁ ଆସିବା ପରେ ହସ୍ପିଟାଲ ପ୍ରଶାସନ ଘଟଣାର ସଂଜ୍ଞାନ ନେଇ ତଦନ୍ତ ଆରମ୍ଭ କରିଛି। ଡାକ୍ତରଙ୍କ ଅନୁପସ୍ଥିତିରେ ଡ୍ରାଇଭର କେଉଁ ପରିସ୍ଥିତିରେ ରୋଗୀଙ୍କୁ ଦେଖୁଥିଲେ ଏବଂ ଔଷଧ ଲେଖିବାର ଅଧିକାର ତାଙ୍କୁ କିଏ ଦେଇଥିଲା, ସେନେଇ ଯାଞ୍ଚ କରାଯାଉଛି।
ଏହି ଘଟଣାରେ ସମ୍ପୃକ୍ତ ଡାକ୍ତରଙ୍କୁ ମଧ୍ୟ ସ୍ପଷ୍ଟୀକରଣ ମଗାଯାଇଥିବା ଜଣାପଡ଼ିଛି। ତଦନ୍ତ ପରେ ଘଟଣାରେ କାହାର ଅବହେଳା ରହିଛି କିମ୍ବା ନିୟମ ଉଲ୍ଲଂଘନ ହୋଇଛି କି, ତାହା ସ୍ପଷ୍ଟ ହେବ। ବର୍ତ୍ତମାନ ଭାଇରାଲ ଭିଡିଓକୁ ଆଧାର କରି ହସ୍ପିଟାଲ ପ୍ରଶାସନ ପକ୍ଷରୁ ତଦନ୍ତ ଜାରି ରହିଛି।
