Army Jawan Death: ଛୁଟିରେ ଘରକୁ ଆସିଥିଲେ, ଜମି ଟଙ୍କାକୁ ନେଇ ପେଟ୍ରୋଲ ଢାଳି ଜାଳିଦେଲେ; ସପ୍ତାହେ ପରେ ଆଖି ବୁଜିଲେ ଯବାନ
ବିହାର: ବିହାରର କ୍ୟାମୁର ଜିଲ୍ଲାରୁ ଆସିଛି ଚାଞ୍ଚଲ୍ୟକର Army Jawan Death ମାମଲା। ଛୁଟିରେ ଘରକୁ ଆସିଥିବା ସେନା ଯବାନ ଶତ୍ରୁଘ୍ନ ଯାଦବଙ୍କୁ ଜମି ବିକ୍ରି ବାବଦରେ ବକେୟା ଥିବା ୧୬ ଲକ୍ଷ ଟଙ୍କା ମାଗିବାରୁ ତାଙ୍କ ଉପରେ ପେଟ୍ରୋଲ ଢାଳି ନିଆଁ ଲଗାଇଦେବା ଅଭିଯୋଗ ହୋଇଛି। ରାମଗଡ଼ ଥାନା ଅଞ୍ଚଳର ସାହୁକା ଗାଁରେ ସେପ୍ଟେମ୍ବର ୯ ତାରିଖରେ ଏହି ଘଟଣା ଘଟିଥିବା କୁହାଯାଇଛି। ଯବାନଙ୍କ ପତ୍ନୀ ରିଙ୍କୁ କୁମାରୀ ସିଂହଙ୍କ ଅଭିଯୋଗ ଅନୁସାରେ, ଜମିର ବକେୟା ଟଙ୍କା ଦେବା ବାହାନାରେ ଶତ୍ରୁଘ୍ନଙ୍କୁ ସ୍କର୍ପିଓ ଗାଡ଼ି ପଠାଇ ଡକାଯାଇଥିଲା। ସେଠାରେ ଟଙ୍କାକୁ ନେଇ ବଚସା ହେବା ପରେ ବୀରେନ୍ଦ୍ର ଯାଦବ, ଦୀପକ ଯାଦବ, ବ୍ରଜେଶ ଯାଦବଙ୍କ ସମେତ ୮ ଜଣ ତାଙ୍କ ଉପରେ ପେଟ୍ରୋଲ ଢାଳି ନିଆଁ ଲଗାଇଥିବା ପରିବାର ଅଭିଯୋଗ କରିଛି।
ନିଆଁରେ ଶତ୍ରୁଘ୍ନ ଯାଦବଙ୍କ ଶରୀରର ବହୁ ଅଂଶ ପୋଡ଼ିଯାଇଥିଲା। ଗୁରୁତର ଅବସ୍ଥାରେ ପ୍ରଥମେ ତାଙ୍କୁ ଚିକିତ୍ସା କରାଯିବା ପରେ ଅଧିକ ଚିକିତ୍ସା ପାଇଁ ଲକ୍ଷ୍ନୌ ମିଲିଟାରୀ ହସ୍ପିଟାଲକୁ ନିଆଯାଇଥିଲା। ପୋଡ଼ିଯାଇଥିବା ସତ୍ତ୍ୱେ ଯବାନ ଜଣକ ବାରାଣସୀରେ ନିଜର ବୟାନ ରେକର୍ଡ କରିଥିବା କୁହାଯାଉଛି। ପ୍ରାୟ ଏକ ସପ୍ତାହ ଧରି ଜୀବନ ସହ ସଂଘର୍ଷ କରିବା ପରେ ସେପ୍ଟେମ୍ବର ୧୬ ତାରିଖ ବିଳମ୍ବିତ ରାତିରେ ଚିକିତ୍ସାଧୀନ ଅବସ୍ଥାରେ ଶତ୍ରୁଘ୍ନଙ୍କ ମୃତ୍ୟୁ ହୋଇଥିଲା। ଘଟଣାକୁ ନେଇ ପରିବାର ପକ୍ଷରୁ ପୋଲିସରେ ଏଫ୍ଆଇଆର୍ ଦାଖଲ କରାଯାଇଥିଲା। ପରିବାରର ଅଭିଯୋଗ ଅନୁସାରେ, ପ୍ରଥମେ କିଛି ଲୋକଙ୍କୁ ପୋଲିସ ଧରିଥିଲେ ମଧ୍ୟ ପରେ ଛାଡ଼ି ଦେଇଥିଲା। ପରେ ପରିବାର ଓ ଗ୍ରାମବାସୀ ଏସ୍ପିଙ୍କୁ ଭେଟିବା ପରେ ଗିରଫଦାରୀ ଆରମ୍ଭ ହୋଇଥିଲା। କ୍ୟାମୁର ଏସ୍ପି ଶିଖର ଚୌଧୁରୀଙ୍କ ଅନୁସାରେ, ପରିଚିତ ଅଭିଯୁକ୍ତଙ୍କ ମଧ୍ୟରୁ ୩ ଜଣଙ୍କୁ ଗିରଫ କରାଯାଇଛି ଏବଂ ଆଉ ଜଣେ ଫେରାର ଅଭିଯୁକ୍ତଙ୍କୁ ଖୋଜା ଚାଲିଛି।
ଯବାନଙ୍କ ମୃତ୍ୟୁ ପରେ କ୍ୟାମୁର ଅଞ୍ଚଳରେ ଉତ୍ତେଜନା ଦେଖାଦେଇଛି। ଶହ ଶହ ଗ୍ରାମବାସୀ ହାତରେ ତ୍ରିରଙ୍ଗା ଧରି ରାସ୍ତାକୁ ଓହ୍ଲାଇଥିଲେ। ଉତ୍ତ୍ୟକ୍ତ ଲୋକେ ଜାତୀୟ ରାଜପଥ ଅବରୋଧ କରି ଅଭିଯୁକ୍ତମାନଙ୍କ ବିରୋଧରେ କଠୋର ଦଣ୍ଡ ଦାବି କରିଥିଲେ। ଶତ୍ରୁଘ୍ନଙ୍କ ପରିବାରରେ ତାଙ୍କ ପତ୍ନୀ ଓ ଦୁଇ ଛୋଟ ଝିଅ ଅଛନ୍ତି। ବଡ଼ ଝିଅର ବୟସ ମାତ୍ର ୨ ବର୍ଷ ହୋଇଥିବା ବେଳେ ସାନ ଝିଅଟି ମାତ୍ର ୨୦ ଦିନ ତଳେ ଜନ୍ମ ନେଇଛି। ଆସାମରେ ଦେଶର ସୁରକ୍ଷା ଦାୟିତ୍ୱରେ ନିୟୋଜିତ ଥିବା ଶତ୍ରୁଘ୍ନ ଛୁଟିରେ ଘରକୁ ଆସିଥିଲେ। କିନ୍ତୁ ଜମିର ୧୬ ଲକ୍ଷ ଟଙ୍କାକୁ ନେଇ ହୋଇଥିବା ବିବାଦ ତାଙ୍କ ଜୀବନ ନେଇଗଲା ବୋଲି ପରିବାର ଅଭିଯୋଗ କରିଛି। ଏହି ଘଟଣାରେ ପୋଲିସ ତଦନ୍ତ ଜାରି ରହିଛି।
