Lingaraj ଟେମ୍ପଲେ: କାଲି ରାତି ୧୧ଟାରୁ ବନ୍ଦ ବାବା ଲିଙ୍ଗରାଜଙ୍କ ନୀତିକାନ୍ତି, ସେବାୟତ ବିବାଦକୁ ନେଇ ଭକ୍ତଙ୍କ ମଧ୍ୟରେ ଅସନ୍ତୋଷ
ଭୁବନେଶ୍ୱର: ଭୁବନେଶ୍ୱରର ପ୍ରସିଦ୍ଧ ଶ୍ରୀଲିଙ୍ଗରାଜ ମନ୍ଦିରରେ ପୁଣି ନୀତିକାନ୍ତି ବନ୍ଦ ହୋଇଥିବା ସୂଚନା ମିଳିଛି। ଗତକାଲି ରାତି ପ୍ରାୟ ୧୧ଟାରୁ ମନ୍ଦିରରେ ଠାକୁରଙ୍କ ନୀତି ଆଗକୁ ବଢ଼ିପାରିନଥିବା ଜଣାପଡ଼ିଛି। ସେବାୟତମାନଙ୍କ ମଧ୍ୟରେ ଉପୁଜିଥିବା ବିବାଦକୁ ନେଇ ଏଭଳି ପରିସ୍ଥିତି ସୃଷ୍ଟି ହୋଇଥିବା କୁହାଯାଉଛି।
ନୀତିକାନ୍ତି ନିର୍ଦ୍ଧାରିତ ସମୟରେ ହୋଇନପାରିବାରୁ ମନ୍ଦିରରେ ଅବ୍ୟବସ୍ଥା ବଢ଼ିଛି। ଦୀର୍ଘ ସମୟ ଧରି ନୀତି ବନ୍ଦ ରହିବାରୁ ଠାକୁରଙ୍କ ଦର୍ଶନ ଓ ଅନ୍ୟାନ୍ୟ ଧାର୍ମିକ ବିଧିକୁ ନେଇ ମଧ୍ୟ ପ୍ରଭାବ ପଡ଼ିଥିବା ଜଣାପଡ଼ିଛି। ଏହି ଘଟଣାକୁ ନେଇ ମନ୍ଦିରକୁ ଆସିଥିବା ଶ୍ରଦ୍ଧାଳୁଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ସେବାୟତ ବିବାଦର ସମାଧାନ କରି ମନ୍ଦିରର ନୀତିକାନ୍ତିକୁ ସ୍ୱାଭାବିକ କରିବା ଏବେ ମୁଖ୍ୟ ଚ୍ୟାଲେଞ୍ଜ ହୋଇଛି। ତେବେ ବିବାଦର ପ୍ରକୃତ କାରଣ କଣ ଏବଂ କେବେଠାରୁ ନୀତିକାନ୍ତି ସ୍ୱାଭାବିକ ହେବ, ସେନେଇ ସ୍ପଷ୍ଟ ସୂଚନା ମିଳିନାହିଁ। ମନ୍ଦିର ପ୍ରଶାସନ ଓ ସେବାୟତଙ୍କ ମଧ୍ୟରେ ଆଲୋଚନା ପରେ ଏହି ଅଚଳାବସ୍ଥା ଦୂର ହେବ ବୋଲି ଆଶା କରାଯାଉଛି।
