Karnataka Property Tax: ସମ୍ପତ୍ତି କର ସହ ଏବେ ଦେବାକୁ ପଡ଼ିବ ସଫ୍ଟୱେର ଫି, ୨୦୦ରୁ ୧୦୦୦ ଟଙ୍କା ଯାଏ ଶୁଳ୍କ
କର୍ଣ୍ଣାଟକ: କର୍ଣ୍ଣାଟକରେ ସମ୍ପତ୍ତି କରକୁ ନେଇ ନୂଆ ବିବାଦ ଦେଖାଦେଇଛି। ରାଜ୍ୟ ସରକାର ସମ୍ପତ୍ତି କର ବ୍ୟବସ୍ଥାରେ ନୂଆ ସଫ୍ଟୱେର ଶୁଳ୍କ ଯୋଡ଼ିଥିବା ସୂଚନା ପରେ ରାଜନୈତିକ ତର୍କ ତୀବ୍ର ହୋଇଛି। ଆବାସିକ ସମ୍ପତ୍ତି ପାଇଁ ୨୦୦ ଟଙ୍କା ଏବଂ ବାଣିଜ୍ୟିକ କୋଠା ପାଇଁ ୧,୦୦୦ ଟଙ୍କା ଶୁଳ୍କ ଲାଗୁ କରାଯାଇଥିବା ନେଇ ବିଜେପି ପ୍ରଶ୍ନ ଉଠାଇଛି।
ବିଜେପି ପକ୍ଷରୁ ଏହି ଅତିରିକ୍ତ ଶୁଳ୍କର ସମ୍ପୂର୍ଣ୍ଣ ଖର୍ଚ୍ଚ ବିବରଣୀ ସାର୍ବଜନୀନ କରିବାକୁ ଦାବି କରାଯାଇଛି। ସରକାରୀ ସଫ୍ଟୱେର ବ୍ୟବସ୍ଥା ପାଇଁ ସାଧାରଣ ଲୋକଙ୍କଠାରୁ ଅଲଗା ଭାବେ ଟଙ୍କା କାହିଁକି ଆଦାୟ କରାଯିବ, ତାହା ନେଇ ବିରୋଧୀ ଦଳ ପ୍ରଶ୍ନ କରିଛି। ଏହି ଟଙ୍କା କେଉଁ କାମରେ ଖର୍ଚ୍ଚ ହେବ, ତାହାର ସ୍ପଷ୍ଟ ବିବରଣୀ ଦେବା କିମ୍ବା ଶୁଳ୍କ ପ୍ରତ୍ୟାହାର କରିବାକୁ ବିଜେପି ଦାବି କରିଛି।
ନୂଆ ଶୁଳ୍କକୁ ନେଇ ଏବେ କରଦାତାଙ୍କ ଉପରେ ଅତିରିକ୍ତ ଆର୍ଥିକ ବୋଝ ପଡ଼ିବା ପ୍ରସଙ୍ଗ ରାଜନୈତିକ ଚର୍ଚ୍ଚାର କେନ୍ଦ୍ରରେ ରହିଛି। ଅନ୍ୟପକ୍ଷରେ, ସରକାରୀ ସଫ୍ଟୱେର ବ୍ୟବସ୍ଥା ପାଇଁ ଏହି ଶୁଳ୍କର ଆବଶ୍ୟକତା ଓ ଏହାର ବ୍ୟବହାର ସମ୍ପର୍କରେ ସରକାରଙ୍କ ପକ୍ଷରୁ କଣ ସ୍ପଷ୍ଟୀକରଣ ଆସୁଛି, ତାହା ଉପରେ ନଜର ରହିଛି।
