Asian Games 2026: ଏସିଆ କପ୍ ପରେ ଏବେ ଏସିଆନ୍ ଗେମ୍ସ, ଭାରତୀୟ ଖେଳାଳିଙ୍କ ସହ ନକଭିଙ୍କ ପୁଣି ହେବ ମୁହାଁମୁହିଁ?
ନୂଆଦିଲ୍ଲୀ: ଏସିଆ କପ୍ ୨୦୨୬ରେ ଟ୍ରଫି ବିବାଦ ପରେ ଏବେ ଏସିଆନ୍ ଗେମ୍ସରେ ଭାରତୀୟ କ୍ରିକେଟ୍ ଦଳର ପଦକ ବଣ୍ଟନକୁ ନେଇ ଚର୍ଚ୍ଚା ଆରମ୍ଭ ହୋଇଛି। ଏସିଆ କପ୍ରେ ଭାରତୀୟ ମହିଳା ଦଳ ପାକିସ୍ତାନ କ୍ରିକେଟ୍ ବୋର୍ଡ ମୁଖ୍ୟ ତଥା ଏସିଆନ୍ କ୍ରିକେଟ୍ କାଉନସିଲ୍ (ACC) ଅଧ୍ୟକ୍ଷ ମହସିନ୍ ନକଭିଙ୍କଠାରୁ ଟ୍ରଫି ଗ୍ରହଣ କରିନଥିଲା। ଏହା ପୂର୍ବରୁ ୨୦୨୫ ଏସିଆ କପ୍ରେ ମଧ୍ୟ ଭାରତୀୟ ପୁରୁଷ ଦଳ ନକଭିଙ୍କଠାରୁ ଟ୍ରଫି ନେଇନଥିଲା।
ତେବେ ଏସିଆନ୍ ଗେମ୍ସର ପୁରସ୍କାର ବଣ୍ଟନ ବ୍ୟବସ୍ଥା ଏସିଆ କପ୍ଠାରୁ ଭିନ୍ନ। ଏସିଆନ୍ ଗେମ୍ସ ଅଲିମ୍ପିକ୍ କାଉନସିଲ୍ ଅଫ୍ ଏସିଆ (OCA) ଅଧୀନରେ ଆୟୋଜିତ ହେଉଥିବାରୁ ପଦକ ବଣ୍ଟନ ପାଇଁ OCA ଓ ଆୟୋଜକ ସଂସ୍ଥା ପକ୍ଷରୁ ନିର୍ଦ୍ଧାରିତ ଅଧିକାରୀମାନେ ଦାୟିତ୍ୱ ନେଇଥାନ୍ତି। ତେଣୁ ଏସିଆ କପ୍ରେ ACC ଅଧ୍ୟକ୍ଷ ଭାବେ ନକଭିଙ୍କ ଭୂମିକାକୁ ଆଧାର କରି ଏସିଆନ୍ ଗେମ୍ସରେ ସେ ଭାରତୀୟ ଖେଳାଳିଙ୍କୁ ପଦକ ପିନ୍ଧାଇବେ ବୋଲି କହିବା ଠିକ୍ ହେବ ନାହିଁ।
ଏସିଆ କପ୍ରେ ଘଟିଥିବା ଘଟଣା ଯୋଗୁଁ ଭାରତ-ପାକିସ୍ତାନ କ୍ରିକେଟ୍ ସମ୍ପର୍କକୁ ନେଇ ଚର୍ଚ୍ଚା ତୀବ୍ର ହୋଇଛି। ମହିଳା ଏସିଆ କପ୍ ଫାଇନାଲରେ ଶ୍ରୀଲଙ୍କାକୁ ୭୨ ରନ୍ରେ ହରାଇ ଭାରତ ଅଷ୍ଟମ ଥର ପାଇଁ ଚାମ୍ପିଅନ୍ ହୋଇଥିଲା, କିନ୍ତୁ ନକଭିଙ୍କ ଉପସ୍ଥିତି ଯୋଗୁଁ ଟ୍ରଫି ଗ୍ରହଣ ସମାରୋହରେ ଭାରତୀୟ ଦଳ ଯୋଗ ଦେଇନଥିଲା। ଏବେ ଭାରତୀୟ ଦଳର ନଜର ଏସିଆନ୍ ଗେମ୍ସ ଉପରେ ଥିବା ବେଳେ, ମେଡାଲ୍ ସେରେମୋନି ନେଇ ନିୟମ ଅନୁସାରେ ହିଁ ବ୍ୟବସ୍ଥା ହେବ।
