Riyadh Airportରେ ଧୂଆଁ ଓ ନିଆଁ, Houthisଙ୍କ Ballistic Missile ଆକ୍ରମଣ ଦାବି
ସାଉଦି ଆରବର ରାଜଧାନୀ ରିୟାଦ୍ର King Khalid International Airport ନିକଟରେ ଶନିବାର ଭୋରୁ ଧୂଆଁ ଓ ନିଆଁ ଦେଖିବାକୁ ମିଳିଛି। ଏୟାରପୋର୍ଟ ନିକଟସ୍ଥ ଏକ ଇନ୍ଧନ ଡିପୋରେ Saudi Aramco ଲୋଗୋ ଥିବା ଏକ ଇନ୍ଧନ ଟ୍ୟାଙ୍କରେ ନିଆଁ ଲାଗିଥିବା ବେଳେ ଅଗ୍ନିଶମ ବାହିନୀ ଏହାକୁ ନିୟନ୍ତ୍ରଣ କରିଥିବା ରିପୋର୍ଟରେ କୁହାଯାଇଛି। ସାଉଦି ନେତୃତ୍ୱାଧୀନ ମେଣ୍ଟର ଦାବି ଅନୁସାରେ, ଇରାନ ସମର୍ଥିତ ୟେମେନର ହୁଥି ବିଦ୍ରୋହୀମାନେ ରିୟାଦ୍ ଆଡକୁ ଏକ ବାଲିଷ୍ଟିକ୍ ମିସାଇଲ୍ ଛାଡ଼ିଥିଲେ, ଯାହାକୁ ସାଉଦି ଏୟାର ଡିଫେନ୍ସ ମଝି ଆକାଶରେ ଧ୍ୱଂସ କରିଥିବା କୁହାଯାଇଛି।
ହୁଥି ସାମରିକ ପ୍ରବକ୍ତା ୟାହ୍ୟା ସାରିଙ୍କ ଦାବି ଅନୁସାରେ, ହୁଥି ବିଦ୍ରୋହୀମାନେ ଦୁଇଟି ସାମରିକ ଅଭିଯାନ କରିଥିଲେ। ଏଥିରୁ ଗୋଟିଏ ରିୟାଦ୍ର ସମ୍ବେଦନଶୀଳ ସ୍ଥାନକୁ ଏବଂ ଅନ୍ୟଟି ୟାନବୁସ୍ଥିତ Aramco ପ୍ରତିଷ୍ଠାନକୁ ଲକ୍ଷ୍ୟ କରିଥିବା ସେ କହିଛନ୍ତି। ଏହା ପୂର୍ବରୁ ସାଉଦି କର୍ତ୍ତୃପକ୍ଷ ରାତିରେ ବିମାନ ଆକ୍ରମଣ ସତର୍କତା ଜାରି କରିଥିଲେ। ରିୟାଦ୍ର ବାସିନ୍ଦାମାନେ ବିସ୍ଫୋରଣ ଭଳି ଶବ୍ଦ ଶୁଣିଥିବା କହିଥିବା ବେଳେ FlightRadar24 କିଛି ସମୟ ପାଇଁ King Khalid International Airportରେ ବଡ଼ ଧରଣର ବିମାନ ଚଳାଚଳ ବାଧା ଦେଖାଇଥିଲା।
ଏହି ଘଟଣା ପରେ ଆମେରିକାର ବିଦେଶ ବିଭାଗ ଓ ଅଞ୍ଚଳରେ ଥିବା ଆମେରିକୀୟ ଦୂତାବାସଗୁଡ଼ିକ ପକ୍ଷରୁ ସୁରକ୍ଷା ସତର୍କତା ଜାରି ହୋଇଛି। ରିପୋର୍ଟ ଅନୁସାରେ, ୟେମେନରେ ଚାଲିଥିବା ସଂଘର୍ଷ ଯୋଗୁଁ ୧.୧୨ ଲକ୍ଷରୁ ଅଧିକ ଲୋକ ବିସ୍ଥାପିତ ହୋଇଛନ୍ତି। ୨୦୧୪ରେ ହୁଥିମାନେ ସାନା ଦଖଲ କରିବା ପରେ ୟେମେନରେ ଯୁଦ୍ଧ ଆରମ୍ଭ ହୋଇଥିଲା ଏବଂ ୨୦୧୫ରେ ସାଉଦି ନେତୃତ୍ୱାଧୀନ ସାମରିକ ହସ୍ତକ୍ଷେପ ହୋଇଥିଲା। ବର୍ତ୍ତମାନର ଘଟଣା ଅଞ୍ଚଳରେ ଉତ୍ତେଜନା ଆହୁରି ବଢ଼ିବାର ଆଶଙ୍କା ସୃଷ୍ଟି କରିଛି।
