IIT Bombay Student Death: ଛାତ୍ର ମୃତ୍ୟୁ ମାମଲାର ତଦନ୍ତ କରିବ କ୍ରାଇମ୍ ବ୍ରାଞ୍ଚ, ଜାତିଗତ ନିର୍ଯାତନା ନେଇ ପରିବାରର ଅଭିଯୋଗ
ମୁମ୍ବାଇ: IIT Bombayର ଦ୍ୱିତୀୟ ବର୍ଷର BTech ଛାତ୍ର ସାହିଲ ୱାକୋଡେଙ୍କ ମୃତ୍ୟୁ ମାମଲାର ତଦନ୍ତ ଏବେ ମୁମ୍ବାଇ କ୍ରାଇମ୍ ବ୍ରାଞ୍ଚକୁ ହସ୍ତାନ୍ତର କରାଯାଇଛି। ସାହିଲଙ୍କ ପରିବାର ତାଙ୍କୁ ଜାତିଗତ ଭେଦଭାବ ଓ ମାନସିକ ନିର୍ଯାତନା ଦିଆଯାଇଥିବା ଅଭିଯୋଗ କରିଛନ୍ତି। ପରିବାରର ଅଭିଯୋଗ ଆଧାରରେ ପୁଲିସ ଭାରତୀୟ ନ୍ୟାୟ ସଂହିତାର ସମ୍ପର୍କିତ ଧାରା ସହ SC/ST ଆଇନର ବ୍ୟବସ୍ଥା ଲାଗୁ କରି ମାମଲା ରୁଜୁ କରିଛି।
ସାହିଲ ଏନର୍ଜି ସାଇନ୍ସ ଆଣ୍ଡ ଇଞ୍ଜିନିୟରିଂ ବିଭାଗରେ ଦ୍ୱିତୀୟ ବର୍ଷରେ ପଢ଼ୁଥିଲେ। ପରୀକ୍ଷା ସମୟରେ ମୋବାଇଲ୍ ବ୍ୟବହାର କରୁଥିବା ଧରାପଡ଼ିବାର କିଛି ଘଣ୍ଟା ପରେ ସେ ହଷ୍ଟେଲ୍ ରୁମ୍ରେ ମୃତ ଅବସ୍ଥାରେ ମିଳିଥିଲେ। IIT Bombayର କହିବା ଅନୁସାରେ, ତାଙ୍କ ବିରୋଧରେ କୌଣସି ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଆରମ୍ଭ ହୋଇନଥିଲା। ଶିକ୍ଷକ ଓ ବିଭାଗୀୟ ମୁଖ୍ୟ ତାଙ୍କ ସହ ଆଲୋଚନା କରି ପରାମର୍ଶ ଦେଇଥିବା ଏବଂ ଏହି ଘଟଣା ତାଙ୍କ ଶିକ୍ଷାଜୀବନକୁ ପ୍ରଭାବିତ କରିବ ନାହିଁ ବୋଲି କହିଥିବା ସଂସ୍ଥା ପକ୍ଷରୁ କୁହାଯାଇଛି।
ସାହିଲଙ୍କ ମୃତ୍ୟୁ ପରେ IIT Bombay କ୍ୟାମ୍ପସରେ ଛାତ୍ରଛାତ୍ରୀମାନେ ପ୍ରତିବାଦ କରି ସ୍ୱଚ୍ଛ ଓ ନିରପେକ୍ଷ ତଦନ୍ତ ଦାବି କରିଛନ୍ତି। ପରିବାର ପକ୍ଷରୁ ନିର୍ଯାତନା ଓ ଜାତିଗତ ଭେଦଭାବର ଅଭିଯୋଗ ହୋଇଥିବା ବେଳେ, IIT Bombay ଏହି ଅଭିଯୋଗକୁ ଖଣ୍ଡନ କରିଛି। ଏବେ କ୍ରାଇମ୍ ବ୍ରାଞ୍ଚ ତଦନ୍ତ କରୁଥିବାରୁ ଘଟଣାର ପ୍ରକୃତ ପରିସ୍ଥିତି ଓ ଅଭିଯୋଗଗୁଡ଼ିକର ସତ୍ୟତା ତଦନ୍ତରୁ ସ୍ପଷ୍ଟ ହେବ।
