AI Scam: ୨୯ ବର୍ଷର ସୁନ୍ଦର ଡାକ୍ତର ସାଜି ବ୍ୟବସାୟୀଙ୍କୁ ଠକିଲେ ୬୫ ବର୍ଷୀୟ ମହିଳା, AIରେ ତିଆରି କରିଥିଲେ ୭ ହଜାର ଫଟୋ-ଭିଡିଓ
ନୂଆଦିଲ୍ଲୀ: ଚୀନ୍ରେ କୃତ୍ରିମ ବୁଦ୍ଧିମତ୍ତା (AI)ର ବ୍ୟବହାର କରି ଠକେଇର ଏକ ଚକିତ କରିଦେବା ଘଟଣା ସାମ୍ନାକୁ ଆସିଛି। ରିପୋର୍ଟ ଅନୁସାରେ, ଜଣେ ୬୫ ବର୍ଷୀୟ ମହିଳା ନିଜକୁ ୨୯ ବର୍ଷର ଜଣେ ଆକର୍ଷଣୀୟ ଡାକ୍ତର ଭାବେ ପରିଚୟ ଦେଇ ଜଣେ ବ୍ୟବସାୟୀଙ୍କୁ ପ୍ରାୟ ୧.୭ ଲକ୍ଷ ୟୁଆନ୍, ଅର୍ଥାତ୍ ପ୍ରାୟ ୨୫ ହଜାର ଡଲାର ଠକିଥିବା ଅଭିଯୋଗ ହୋଇଛି।
ରିପୋର୍ଟରେ ମହିଳାଙ୍କ ନାମ Yu Xiuzhen ବୋଲି ଉଲ୍ଲେଖ କରାଯାଇଛି। ସେ ସୋସିଆଲ୍ ମିଡିଆରେ ଏକ ନକଲି ପରିଚୟ ତିଆରି କରିଥିଲେ। ଡିଜିଟାଲ୍ ଫେସ୍-ସ୍ୱାପିଂ ସଫ୍ଟୱେରର ସହାୟତାରେ ନିଜକୁ ଜଣେ ୨୯ ବର୍ଷୀୟ ଡାକ୍ତର ଭାବେ ଦେଖାଉଥିଲେ। ସେ ନିଜକୁ ସାଂଘାଇର ଏକ ପ୍ରମୁଖ ହସ୍ପିଟାଲରେ କାମ କରୁଥିବା ଡାକ୍ତର ବୋଲି ପରିଚୟ ଦେଇଥିଲେ। କିନ୍ତୁ ରିପୋର୍ଟ ଅନୁସାରେ ବାସ୍ତବରେ ସେହି ହସ୍ପିଟାଲରେ ସେ ଜଣେ ସଫେଇ କର୍ମଚାରୀ ଭାବେ କାମ କରୁଥିଲେ।
ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ସେ ପ୍ରାୟ ୫ ବର୍ଷ ଧରି ଏହି ନକଲି ପରିଚୟକୁ ସୋସିଆଲ୍ ମିଡିଆରେ ଜାରି ରଖିଥିଲେ। ଏହି ସମୟରେ AI ସହାୟତାରେ ପ୍ରାୟ ୭ ହଜାର ଫଟୋ ଓ ଭିଡିଓ ପୋଷ୍ଟ କରିଥିବା କୁହାଯାଇଛି। ତାଙ୍କର ପ୍ରାୟ ୧୦ ହଜାର ଫଲୋଅର୍ସ ମଧ୍ୟ ଥିଲେ। ଏହି ଅନଲାଇନ୍ ପରିଚୟ ମାଧ୍ୟମରେ ସେ ଲୋକଙ୍କ ବିଶ୍ୱାସ ହାସଲ କରୁଥିଲେ। ଘଟଣାଟି AI ଦ୍ୱାରା ତିଆରି ନକଲି ପରିଚୟ ଓ ଡିଜିଟାଲ୍ ଠକେଇ ପ୍ରତି ସୋସିଆଲ୍ ମିଡିଆ ବ୍ୟବହାରକାରୀଙ୍କୁ ସତର୍କ ରହିବାର ଆବଶ୍ୟକତାକୁ ପୁଣିଥରେ ସାମ୍ନାକୁ ଆଣିଛି।
