Rani Mukerji Mother:ବଲିଉଡ୍ ଅଭିନେତ୍ରୀ ରାଣୀ ମୁଖାର୍ଜୀଙ୍କ ମା’ କୃଷ୍ଣା ମୁଖାର୍ଜୀଙ୍କ ୭୫ ବର୍ଷ ବୟସରେ ପରଲୋକ, ରାଣୀ ଅଭିନେତ୍ରୀ ସାଜିବା ପଛରେ ଥିଲେ ବଡ଼ ପ୍ରେରଣା
ମୁମ୍ବାଇ: ବଲିଉଡ୍ ଅଭିନେତ୍ରୀ ରାଣୀ ମୁଖାର୍ଜୀଙ୍କ ମା’ କୃଷ୍ଣା ମୁଖାର୍ଜୀଙ୍କ ୭୫ ବର୍ଷ ବୟସରେ ପରଲୋକ ହୋଇଛି। ମଙ୍ଗଳବାର ଅପରାହ୍ଣରେ ତାଙ୍କ ମୃତ୍ୟୁ ହୋଇଥିବା ପରିବାର ପକ୍ଷରୁ ଜାରି ବିବୃତ୍ତିରେ ନିଶ୍ଚିତ କରାଯାଇଛି। ଏହି ଦୁଃଖଦ ସମୟରେ ପରିବାର ପକ୍ଷରୁ ସମସ୍ତଙ୍କ ଭଲପାଇବା, ପ୍ରାର୍ଥନା ଓ ସମର୍ଥନ ପାଇଁ କୃତଜ୍ଞତା ଜଣାଇବା ସହ ଗୋପନୀୟତା ବଜାୟ ରଖିବାକୁ ଅନୁରୋଧ କରାଯାଇଛି।
କୃଷ୍ଣା ମୁଖାର୍ଜୀଙ୍କ ସହ ରାଣୀଙ୍କ ସମ୍ପର୍କ ଖୁବ୍ ଘନିଷ୍ଠ ଥିଲା। ୨୦୨୩ରେ ‘Mrs. Chatterjee vs Norway’ ଫିଲ୍ମର ପ୍ରଚାର ସମୟରେ ରାଣୀ କହିଥିଲେ ଯେ, ଫିଲ୍ମରେ ଜଣେ ବଙ୍ଗୀୟ ମା’ଙ୍କ ଚରିତ୍ର ପାଇଁ ତାଙ୍କ ନିଜ ମା’ଙ୍କଠାରୁ ଅନେକ ପ୍ରେରଣା ନେଇଥିଲେ। ମା’ଙ୍କ ଖାଦ୍ୟ ଖୁଆଇବା, ଟିକା ଲଗାଇବା ଭଳି ଦୈନନ୍ଦିନ ଅଭ୍ୟାସ ତାଙ୍କ ଚରିତ୍ର ଗଢ଼ିବାରେ ପ୍ରଭାବ ପକାଇଥିବା ରାଣୀ କହିଥିଲେ।
କୃଷ୍ଣା ମୁଖାର୍ଜୀ ପୂର୍ବରୁ ପ୍ଲେବ୍ୟାକ୍ ଗାୟିକା ଭାବେ କାମ କରିଥିଲେ। ସେ ଫିଲ୍ମ ନିର୍ମାତା ରାମ ମୁଖାର୍ଜୀଙ୍କୁ ବିବାହ କରିଥିଲେ। ରାମ ମୁଖାର୍ଜୀ ଫିଲ୍ମାଲୟା ଷ୍ଟୁଡିଓର ସହ-ପ୍ରତିଷ୍ଠାତା ଥିଲେ ଏବଂ ୨୦୧୭ରେ ତାଙ୍କ ଦେହାନ୍ତ ହୋଇଥିଲା। କୃଷ୍ଣା ମୁଖାର୍ଜୀଙ୍କ ମୃତ୍ୟୁର କାରଣ କିମ୍ବା ଶେଷକୃତ୍ୟ ସମ୍ପର୍କିତ ବିବରଣୀ ଏପର୍ଯ୍ୟନ୍ତ ପରିବାର ପକ୍ଷରୁ ପ୍ରକାଶ କରାଯାଇନାହିଁ।
