LPG Rule:୧ ଅକ୍ଟୋବରରୁ ଗ୍ୟାସ୍ ବୁକିଂରେ ବଡ଼ ପରିବର୍ତ୍ତନ! ଗ୍ୟାସ୍ ସିଲିଣ୍ଡର ନେଉଥିଲେ ଏହି ନିୟମ ବିଷୟରେ ଜାଣି ରଖନ୍ତୁ, ନକଲେ ସବ୍ସିଡିରେ ପଡ଼ିବ ପ୍ରଭାବ
ନୂଆଦିଲ୍ଲୀ: ଘରେ LPG ସିଲିଣ୍ଡର ବ୍ୟବହାର କରୁଥିଲେ ଅକ୍ଟୋବର ୧ ତାରିଖ ପୂର୍ବରୁ ଏକ ଜରୁରୀ କାମ କରିନେବାକୁ ପଡ଼ିପାରେ। ୧ ଅକ୍ଟୋବର ୨୦୨୬ରୁ ସବ୍ସିଡି ପାଇବାକୁ ଯୋଗ୍ୟ ଘରୋଇ LPG ଗ୍ରାହକଙ୍କ ପାଇଁ Biometric Aadhaar Authentication ନିୟମ ଲାଗୁ ହେବ। ଅର୍ଥାତ୍, ଯେଉଁ ଗ୍ରାହକ ସବ୍ସିଡି ଯୋଗ୍ୟ ହୋଇଥିଲେ ମଧ୍ୟ ଏପର୍ଯ୍ୟନ୍ତ ନିଜ ଆଧାରର ବାୟୋମେଟ୍ରିକ୍ ଅଥେଣ୍ଟିକେସନ୍ କରିନାହାନ୍ତି, ସେମାନେ ଏହା ପୂରା କରିବାକୁ ପଡ଼ିବ। ସରକାରଙ୍କ ଅନୁସାରେ, ଏହି ବ୍ୟବସ୍ଥାର ଲକ୍ଷ୍ୟ ହେଉଛି ପ୍ରକୃତ ଯୋଗ୍ୟ ଗ୍ରାହକଙ୍କୁ ସବ୍ସିଡି ପହଞ୍ଚାଇବା।
ଏହି ଅଥେଣ୍ଟିକେସନ୍ କରିବା ପାଇଁ LPG ଡେଲିଭରି ସମୟରେ ଡେଲିଭରି କର୍ମଚାରୀଙ୍କ ମୋବାଇଲ୍ ଆପ୍ ମାଧ୍ୟମରେ ପ୍ରକ୍ରିୟା ପୂରା କରିହେବ। ଗ୍ରାହକ ଚାହିଲେ ନିଜ LPG ଡିଷ୍ଟ୍ରିବ୍ୟୁଟରଙ୍କ ଶୋ’ରୁମ୍କୁ ଯାଇ ମଧ୍ୟ ଏହା କରିପାରିବେ। ଏହାଛଡ଼ା ସମ୍ପୃକ୍ତ ତେଲ କମ୍ପାନୀର ମୋବାଇଲ୍ ଆପ୍ ମାଧ୍ୟମରେ ଘରେ ବସି ମଧ୍ୟ ଅଥେଣ୍ଟିକେସନ୍ କରିବାର ସୁବିଧା ରହିଛି। ଇଣ୍ଡେନ୍ ଗ୍ରାହକ IndianOil ONE, ଭାରତଗ୍ୟାସ୍ ଗ୍ରାହକ HelloBPCL ଏବଂ HP Gas ଗ୍ରାହକ HP PAY ଆପ୍ ମାଧ୍ୟମରେ ଏହି ପ୍ରକ୍ରିୟା କରିପାରିବେ। ସେପ୍ଟେମ୍ବର ୧୯ ସୁଦ୍ଧା ୨୭.୪୩ କୋଟି ସକ୍ରିୟ ଘରୋଇ LPG ଗ୍ରାହକ ଅର୍ଥାତ୍ ମୋଟ ଗ୍ରାହକଙ୍କ ୮୯.୯ ପ୍ରତିଶତ ଏହି ଅଥେଣ୍ଟିକେସନ୍ ପୂରା କରିସାରିଥିଲେ।
ତେବେ ଅଥେଣ୍ଟିକେସନ୍ କରିବାକୁ ଚାହୁଁନଥିବା କିମ୍ବା କୌଣସି କାରଣରୁ କରିପାରୁନଥିବା ଗ୍ରାହକଙ୍କ ପାଇଁ ମଧ୍ୟ ବିକଳ୍ପ ରହିଛି। ସେମାନେ ନିଜ ତେଲ କମ୍ପାନୀର ୱେବ୍ସାଇଟ୍, ମୋବାଇଲ୍ ଆପ୍, WhatsApp chatbot କିମ୍ବା IVRS ମାଧ୍ୟମରେ ନିଜ ପସନ୍ଦ ଜଣାଇପାରିବେ। କିନ୍ତୁ ଏପରି କ୍ଷେତ୍ରରେ ସବ୍ସିଡି ବିନା ବଜାର ଦରରେ LPG ଯୋଗାଣ କରାଯିବ। ତେଣୁ ଯଦି ଆପଣ ସବ୍ସିଡି ଯୋଗ୍ୟ ଗ୍ରାହକ ଏବଂ ଏପର୍ଯ୍ୟନ୍ତ ଆଧାର ବାୟୋମେଟ୍ରିକ୍ ଅଥେଣ୍ଟିକେସନ୍ କରିନାହାନ୍ତି, ତେବେ ଅକ୍ଟୋବର ୧ ପୂର୍ବରୁ ଏହାର ସ୍ଥିତି ଯାଞ୍ଚ କରିନେବା ଭଲ। ପୂର୍ବରୁ ଅଥେଣ୍ଟିକେସନ୍ କରିସାରିଥିବା ଗ୍ରାହକଙ୍କୁ ପୁଣିଥରେ ଏହି ପ୍ରକ୍ରିୟା କରିବାକୁ ପଡ଼ିବ ନାହିଁ।
