Pink Force: ଦିଲ୍ଲୀରେ ମହିଳା ପୋଲିସର ନୂଆ ଫୋର୍ସ, ସ୍କୁଲ-କଲେଜରେ ହେବ ପେଟ୍ରୋଲିଂ
ନୂଆଦିଲ୍ଲୀ: ଦିଲ୍ଲୀରେ ମହିଳା ଓ ଶିଶୁଙ୍କ ସୁରକ୍ଷାକୁ ନେଇ ପୋଲିସ ପକ୍ଷରୁ ନୂଆ ପଦକ୍ଷେପ ନିଆଯାଉଛି। ରାଜଧାନୀରେ ‘Pink Force’ ନାମରେ ଏକ ସ୍ୱତନ୍ତ୍ର ମହିଳା ପୋଲିସ ଟିମ୍ ଗଠନ କରିବାକୁ ଦିଲ୍ଲୀ ପୋଲିସକୁ କୁହାଯାଇଛି। ଏହି ଟିମ୍ରେ ପ୍ରଶିକ୍ଷିତ ମହିଳା ପୋଲିସ କର୍ମଚାରୀ ରହିବେ। ସେମାନେ ସ୍କୁଲ, କଲେଜ, ମେଟ୍ରୋ ଷ୍ଟେସନ ଓ ଅନ୍ୟ ସମ୍ବେଦନଶୀଳ ସ୍ଥାନରେ ପେଟ୍ରୋଲିଂ କରିବେ।
ଏହି ପଦକ୍ଷେପର ମୁଖ୍ୟ ଉଦ୍ଦେଶ୍ୟ ହେଉଛି ସମ୍ବେଦନଶୀଳ ସମୟରେ ମହିଳା ପୋଲିସର ଉପସ୍ଥିତି ବଢ଼ାଇବା ଏବଂ ଆବଶ୍ୟକ ସମୟରେ ଶୀଘ୍ର ପୋଲିସ ସହାୟତା ଦେବା। ଗୋଆ ପୋଲିସର ‘Pink Force’ ଢାଞ୍ଚାକୁ ଆଧାର କରି ଦିଲ୍ଲୀରେ ଏହି ଟିମ୍ ଗଠନ କରାଯିବ। ଏହା ସହିତ ସ୍କୁଲ, କଲେଜ, ବଜାର ଓ ମେଟ୍ରୋ ଭଳି ଅଧିକ ଭିଡ଼ ଥିବା ସ୍ଥାନରେ ପାଦରେ ଓ ମୋଟରସାଇକେଲରେ ପୋଲିସ ପେଟ୍ରୋଲିଂ ବଢ଼ାଇବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି।
ଗତ ପ୍ରାୟ ୧୦ ଦିନରେ ନାବାଳିକାଙ୍କୁ ନେଇ ଦିଲ୍ଲୀରେ ଚାରିଟି ଯୌନ ନିର୍ଯାତନା କିମ୍ବା ବଳାତ୍କାର ମାମଲା ସାମ୍ନାକୁ ଆସିବା ପରେ ଏହି ପଦକ୍ଷେପ ଉପରେ ଗୁରୁତ୍ୱ ଦିଆଯାଇଛି। ତେବେ ‘Pink Force’ରେ କେତେ ପୋଲିସ କର୍ମଚାରୀ ରହିବେ, କେବେଠାରୁ ଏହା କାମ ଆରମ୍ଭ କରିବ ଏବଂ କେଉଁ ଅଞ୍ଚଳରେ କେତେ ଟିମ୍ ମୁତୟନ ହେବେ, ସେନେଇ ଏପର୍ଯ୍ୟନ୍ତ ଚୂଡ଼ାନ୍ତ ତଥ୍ୟ ଘୋଷଣା ହୋଇନାହିଁ।
