Punjab Crime: ତିନି ଛୁଆଙ୍କୁ ବିଷ ମିଶା ମିଠା ଖୁଆଇ ହତ୍ୟା କଲା ମା! ପ୍ରେମିକ ସହ ମା’ର ଷଡ଼ଯନ୍ତ୍ର ନେଇ ପୋଲିସର ତଦନ୍ତ
ପଞ୍ଜାବ: ପଞ୍ଜାବର ସାଙ୍ଗରୁରରେ ତିନି ଶିଶୁଙ୍କ ସନ୍ଦେହଜନକ ମୃତ୍ୟୁ ଘଟଣାରେ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି। ୬ ବର୍ଷର ଜସନୁର କୌର, ୫ ବର୍ଷର ଅରମାନଦୀପ ସିଂହ ଏବଂ ଅଢ଼େଇ ବର୍ଷର ରେହାନଦୀପ ସିଂହଙ୍କ ଅଗଷ୍ଟ ୨୬ରେ ମୃତ୍ୟୁ ହୋଇଥିଲା। ପ୍ରଥମେ ଏହାକୁ ଖାଦ୍ୟ ବିଷକ୍ରିୟା ବୋଲି ସନ୍ଦେହ କରାଯାଇଥିଲେ ମଧ୍ୟ ପୁଲିସ ତଦନ୍ତ ପରେ ଘଟଣା ପଛରେ ଯୋଜନାବଦ୍ଧ ଷଡ଼ଯନ୍ତ୍ର ଥିବା ସନ୍ଦେହ କରାଯାଉଛି। ଶିଶୁମାନଙ୍କ ବାପାଙ୍କ ଅଭିଯୋଗ ଆଧାରରେ ମାମଲା ରୁଜୁ ହୋଇଥିଲା।
ପୁଲିସର ତଦନ୍ତ ଅନୁସାରେ, ରକ୍ଷାବନ୍ଧନ ଅବସରରେ ବଜାରରୁ ଆସିଥିବା ମିଠା ଖାଇବା ପରେ ତିନି ଶିଶୁଙ୍କ ସ୍ୱାସ୍ଥ୍ୟ ଖରାପ ହୋଇଥିଲା। ତଦନ୍ତକାରୀମାନେ ସନ୍ଦେହ କରୁଛନ୍ତି ଯେ, ମିଠାରେ ହର୍ବିସାଇଡ୍ ମିଶାଯାଇଥିଲା। ବରିଷ୍ଠ ପୁଲିସ ଅଧିକାରୀ ରବଜୋତ କୌର ଗ୍ରେୱାଲଙ୍କ ଅନୁସାରେ, ଶିଶୁମାନଙ୍କ ମା’ ଲଭପ୍ରୀତ କୌରଙ୍କର ହରଜିତ ସିଂହ ନାମକ ଜଣେ ବ୍ୟକ୍ତିଙ୍କ ସହ ସମ୍ପର୍କ ଥିବା ତଦନ୍ତରୁ ଜଣାପଡ଼ିଛି। ଦୁହେଁ ଇନ୍ଷ୍ଟାଗ୍ରାମ୍ ମାଧ୍ୟମରେ ପରିଚିତ ହୋଇଥିବା ଏବଂ ଶିଶୁମାନଙ୍କୁ ହଟାଇବା ପାଇଁ ଯୋଜନା କରିଥିବା ପୁଲିସ ସନ୍ଦେହ କରୁଛି। ସେହି ଦୋକାନରୁ ମିଠା ଖାଇଥିବା ଅନ୍ୟମାନଙ୍କର କୌଣସି ଅସୁସ୍ଥତା ହୋଇନଥିବାରୁ ତଦନ୍ତକାରୀଙ୍କ ସନ୍ଦେହ ଆହୁରି ବଢ଼ିଥିଲା।
ଘଟଣାରେ ଲଭପ୍ରୀତ କୌରଙ୍କୁ ପୁଲିସ ଗିରଫ କରିଥିବା ବେଳେ ହରଜିତ ସିଂହଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି। ତଦନ୍ତକାରୀ ଦଳ ସନ୍ଦେହ କରାଯାଉଥିବା ମିଠା ସମେତ ଅନ୍ୟାନ୍ୟ ସାମଗ୍ରୀର ଫରେନ୍ସିକ୍ ପରୀକ୍ଷା କରୁଛି। ତେବେ ଘଟଣାର ପ୍ରକୃତ କାରଣ ଓ ଷଡ଼ଯନ୍ତ୍ରରେ କାହାର କେତେ ଭୂମିକା ଥିଲା, ସେନେଇ ପୁଲିସର ତଦନ୍ତ ଶେଷ ହୋଇନାହିଁ।
