Barapullah Phase -3: ଦୀର୍ଘ ୧୦ ବର୍ଷ ପରେ ଦିଲ୍ଲୀବାସୀଙ୍କୁ ଟ୍ରାଫିକ୍ ସମସ୍ୟା ନେଇ ମିଳିଛି ବଡ ଆଶ୍ୱସ୍ତି, ଉଦ୍ଘାଟିତ ହେଲା ୧,୬୩୫ କୋଟି ଟଙ୍କାର ପ୍ରକଳ୍ପ ଏଲିଭେଟେଡ୍ ରୋଡ୍
ନୂଆଦିଲ୍ଲୀ: ଦୀର୍ଘ ବର୍ଷର ପ୍ରତୀକ୍ଷା ପରେ ଦିଲ୍ଲୀବାସୀଙ୍କୁ ମିଳିଛି ବଡ଼ ଟ୍ରାଫିକ୍ ଆଶ୍ୱସ୍ତି। କେନ୍ଦ୍ର ଗୃହମନ୍ତ୍ରୀ ଅମିତ ଶାହ ମୟୂର ବିହାର ଫେଜ୍-୧ରୁ ସରାଇ କାଲେ ଖାନ୍କୁ ସଂଯୋଗ କରୁଥିବା ବାରାପୁଲ୍ଲା ଫେଜ୍-୩ ଏଲିଭେଟେଡ୍ ରୋଡ୍ କରିଡରର ଉଦ୍ଘାଟନ କରିଛନ୍ତି। ପ୍ରାୟ ୧,୬୩୫ କୋଟି ବ୍ୟୟରେ ନିର୍ମିତ ଏହି କରିଡରରେ ଯାତାୟାତ ପାଇଁ ସଡ଼କ ସହ ଏକ ସ୍ୱତନ୍ତ୍ର ସାଇକେଲ୍ ଟ୍ରାକ୍ ମଧ୍ୟ ରହିଛି। ଏହା ଦିଲ୍ଲୀର ଦୁଇ ପ୍ରମୁଖ ଅଞ୍ଚଳ ମଧ୍ୟରେ ଯାତାୟାତକୁ ସୁଗମ କରିବାରେ ସହାୟକ ହେବ ବୋଲି ଆଶା କରାଯାଉଛି।
ଏହା ସହିତ ମୁକରବା ଚୌକ ଅଣ୍ଡରପାସ୍ ମଧ୍ୟ ପରିବହନ ଭିତ୍ତିଭୂମି ପ୍ରକଳ୍ପର ଅଂଶ ଭାବେ ଉଦ୍ଘାଟିତ ହୋଇଛି। ଏହି ଦୁଇ ପ୍ରକଳ୍ପ ସମେତ ମୋଟ ୧,୯୪୧ କୋଟିର ପରିବହନ ପ୍ରକଳ୍ପକୁ ୨୦୧୪ରେ ଅନୁମୋଦନ ମିଳିଥିଲା। ପ୍ରକଳ୍ପଗୁଡ଼ିକର କାର୍ଯ୍ୟକାରିତା ପରେ ଦିଲ୍ଲୀର ଟ୍ରାଫିକ୍ ଚାପ କମିବା ସହ ଯାତ୍ରୀଙ୍କ ଯାତାୟାତ ସମୟ ହ୍ରାସ ପାଇବା ନେଇ ଆଶା ରହିଛି।
ଉଦ୍ଘାଟନ ଅବସରରେ ଦିଲ୍ଲୀ ମୁଖ୍ୟମନ୍ତ୍ରୀ ଗୁପ୍ତା ଏହି ପ୍ରକଳ୍ପଗୁଡ଼ିକୁ ସରକାରଙ୍କ ଭିତ୍ତିଭୂମି ବିକାଶ ଉଦ୍ୟମ ସହ ଯୋଡ଼ିଥିଲେ। ତାଙ୍କ କହିବା ଅନୁସାରେ, ‘ଡବଲ୍ ଇଞ୍ଜିନ୍ ସରକାର’ ଯୋଗୁଁ ଏଭଳି ପ୍ରକଳ୍ପ ଆଗକୁ ବଢ଼ିପାରିଛି। ତେବେ ପ୍ରକଳ୍ପର ପ୍ରକୃତ ପ୍ରଭାବ ଟ୍ରାଫିକ୍ ପ୍ରବାହ ଓ ଯାତ୍ରା ସମୟ ଉପରେ କେତେ ପଡ଼ୁଛି, ତାହା ଆଗାମୀ ସମୟରେ ସ୍ପଷ୍ଟ ହେବ।
