CJP Protest: ମୁମ୍ବାଇରେ ବିକ୍ଷୋଭ ପୂର୍ବରୁ CJP ନେତାଙ୍କୁ ଥାନାକୁ ନେଲା ପୋଲିସ
ମୁମ୍ବାଇ: ମୁମ୍ବାଇରେ ଅକ୍ଟୋବର ୨ରେ ପ୍ରସ୍ତାବିତ ବିକ୍ଷୋଭ ପୂର୍ବରୁ CJP ପ୍ରତିଷ୍ଠାତା ଅଭିଜିତ ଦିପକେଙ୍କୁ ପୋଲିସ ଥାନାକୁ ନେଇଥିବା ଘଟଣା ସାମ୍ନାକୁ ଆସିଛି। ଦିପକେ କିଛି ସମର୍ଥକଙ୍କ ସହ ମେରିନ୍ ଡ୍ରାଇଭ୍ରେ ପ୍ଲାକାର୍ଡ ଧରି ଠିଆ ହୋଇଥିବା ବେଳେ ପୋଲିସ ଟିମ୍ ସେଠାରେ ପହଞ୍ଚିଥିଲା। ପରେ ତାଙ୍କୁ ପୋଲିସ ଭ୍ୟାନ୍ରେ ମେରିନ୍ ଡ୍ରାଇଭ୍ ଥାନାକୁ ନିଆଯାଇଥିଲା।
ପୋଲିସ ଅନୁସାରେ, ସନ୍ଧ୍ୟା ପ୍ରାୟ ୫ଟାରେ ଦିପକେ ମେରିନ୍ ଡ୍ରାଇଭ୍ରେ ଲୋକଙ୍କ ସହ କଥା ହେଉଥିଲେ ଏବଂ ସେଠାରେ ମୁତୟନ ପୋଲିସ କର୍ମଚାରୀଙ୍କୁ ପ୍ରଶ୍ନ କରୁଥିଲେ। ଅନ୍ୟପକ୍ଷରେ, ଦିପକେଙ୍କ କହିବା ଅନୁସାରେ ଜଣେ ମହିଳା ପୋଲିସ ଅଧିକାରୀ ତାଙ୍କୁ ଚା’ ପିଇବାକୁ ଯିବା ପାଇଁ କହିଥିଲେ ଏବଂ ପରେ ତାଙ୍କୁ ଥାନାକୁ ନିଆଯାଇଥିଲା। କିଛି ସମୟ ପରେ ତାଙ୍କୁ ଛାଡ଼ି ଦିଆଯାଇଥିବା ସେ କହିଛନ୍ତି। ତାଙ୍କ ସମୟ ନଷ୍ଟ କରିବା ପାଇଁ ଏପରି କରାଯାଇଥାଇପାରେ ବୋଲି ଦିପକେ ଅଭିଯୋଗ କରିଛନ୍ତି।
ଏହି ଘଟଣା CJPର ଅକ୍ଟୋବର ୨ର ବିକ୍ଷୋଭ ପୂର୍ବରୁ ଘଟିଛି। ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଏବଂ ଭୋଟର ତାଲିକାର Special Intensive Revision (SIR) ପ୍ରକ୍ରିୟାକୁ ନେଇ CJP ପକ୍ଷରୁ ଦାବି ଓ ପ୍ରଶ୍ନ ଉଠାଯାଇଛି। ଅକ୍ଟୋବର ୨ର ପ୍ରସ୍ତାବିତ ବିକ୍ଷୋଭ ପାଇଁ ଶିବାଜୀ ପାର୍କରେ ପୋଲିସ ଅନୁମତି ଦେଇନାହିଁ। ସମାବେଶ ସମ୍ପର୍କିତ ନିୟମ, ମ୍ୟୁନିସିପାଲ୍ ଅନୁମତି, ଟ୍ରାଫିକ୍ ଏବଂ ଜରୁରୀକାଳୀନ ଯାନବାହନ ଚଳାଚଳ ନେଇ ଚିନ୍ତାକୁ ପୋଲିସ ଏହାର କାରଣ ଦର୍ଶାଇଛି। ବିକ୍ଷୋଭକୁ ନଜରରେ ରଖି ଦାଦର ଷ୍ଟେସନରେ ମଧ୍ୟ ଅତିରିକ୍ତ ସୁରକ୍ଷା ବ୍ୟବସ୍ଥା କରାଯାଇଛି।
