Bay of Bengal Cyclone Alert: ଅକ୍ଟୋବରରେ ପୁଣି ବଦଳିବ ପାଗ, ବଙ୍ଗୋପସାଗରରେ ଲଘୁଚାପ ଆଶଙ୍କା
ଭୁବନେଶ୍ୱର: ଅକ୍ଟୋବର ଆରମ୍ଭରୁ ବଙ୍ଗୋପସାଗରରେ ପୁଣି ପାଣିପାଗ ପରିବର୍ତ୍ତନର ସମ୍ଭାବନା ଦେଖାଦେଇଛି। ଭାରତୀୟ ପାଣିପାଗ ବିଭାଗ (IMD)ର ସୂଚନା ଅନୁସାରେ, ଅକ୍ଟୋବର ୧୨ରୁ ଉତ୍ତର ଆଣ୍ଡାମାନ ସାଗର ଅଞ୍ଚଳରେ ଏକ ଘୂର୍ଣ୍ଣିବଳୟ ସୃଷ୍ଟି ହେବାର ସମ୍ଭାବନା ରହିଛି। ଏହାର ପ୍ରଭାବରେ ଅକ୍ଟୋବର ୧୩ ବେଳକୁ ଆଣ୍ଡାମାନ ସାଗର ଉପରେ ଏକ ଲଘୁଚାପ କ୍ଷେତ୍ର ଗଠନ ହୋଇପାରେ।
ପାଣିପାଗ ବିଭାଗର ଏହି ପୂର୍ବାନୁମାନ ଅନୁଯାୟୀ, ସିଷ୍ଟମ୍ଟି ପରବର୍ତ୍ତୀ ସମୟରେ କେଉଁ ଦିଗକୁ ଗତି କରିବ ଏବଂ କେତେ ଘନୀଭୂତ ହେବ, ତାହା ଉପରେ ନଜର ରହିଛି। କିଛି ମଡେଲ୍ରେ ଅକ୍ଟୋବର ୧୫ ବେଳକୁ ଦକ୍ଷିଣ ଓ ସଂଲଗ୍ନ କେନ୍ଦ୍ରୀୟ ବଙ୍ଗୋପସାଗରରେ ସିଷ୍ଟମ୍ଟି ଅଧିକ ଶକ୍ତିଶାଳୀ ହେବାର ସଙ୍କେତ ମିଳୁଥିଲେ ମଧ୍ୟ, ବର୍ତ୍ତମାନ ସମୟରେ ଏହାକୁ ବାତ୍ୟା ବୋଲି ନିଶ୍ଚିତ କରାଯାଇନାହିଁ।
ଅନ୍ୟପକ୍ଷରେ, ଓଡ଼ିଶାରୁ ମୌସୁମୀ ପ୍ରତ୍ୟାବର୍ତ୍ତନ ମଧ୍ୟ ଅକ୍ଟୋବର ପ୍ରଥମାର୍ଦ୍ଧରେ ହେବାର ଆକଳନ ରହିଛି। ତେଣୁ ଆଣ୍ଡାମାନ ସାଗରରେ ଗଠିତ ହେବାକୁ ଥିବା ଲଘୁଚାପର ଗତିପଥ ଓ ତୀବ୍ରତା ଉପରେ ଆଗାମୀ ଦିନରେ ନଜର ରଖିବା ଜରୁରୀ। ସିଷ୍ଟମ୍ର ଗତି ଓ ଶକ୍ତି ବିଷୟରେ IMD ପକ୍ଷରୁ ପରବର୍ତ୍ତୀ ବୁଲେଟିନ୍ରେ ଅଧିକ ସ୍ପଷ୍ଟ ସୂଚନା ମିଳିବ।
