IND vs West Indies: ସ୍ଲୋ ଓଭର ରେଟ୍ ପାଇଁ ଭାରତ ଓ ୱେଷ୍ଟଇଣ୍ଡିଜ୍କୁ ଜରିମାନା!
ନୂଆଦିଲ୍ଲୀ: ନୂଆ ଚଣ୍ଡୀଗଡ଼ରେ ଖେଳାଯାଇଥିବା ତୃତୀୟ ଦିନିକିଆ ମ୍ୟାଚ୍ରେ ସ୍ଲୋ ଓଭର ରେଟ୍ ଅର୍ଥାତ ନିର୍ଧାରିତ ସମୟରେ ଓଭର ଶେଷ ନ କରିବା ଭାରତ ଓ ୱେଷ୍ଟଇଣ୍ଡିଜ୍ ପାଇଁ ମହଙ୍ଗା ପଡ଼ିଛି। ଏହି ମାମଲାରେ ଆଇସିସି ଉଭୟ ଦଳକୁ ଜରିମାନା କରିଛି। ଭାରତୀୟ ଖେଳାଳିଙ୍କ ମ୍ୟାଚ୍ ଫି’ର ୨୦ ପ୍ରତିଶତ ଏବଂ ୱେଷ୍ଟଇଣ୍ଡିଜ୍ ଖେଳାଳିଙ୍କ ମ୍ୟାଚ୍ ଫି’ର ୧୦ ପ୍ରତିଶତ କାଟି ଦିଆଯାଇଛି। ମିଳିଥିବା ଅତିରିକ୍ତ ସମୟକୁ ଧରି ହିସାବକୁ ନେବା ପରେ ଭାରତ ୪ ଓଭର ଏବଂ ୱେଷ୍ଟଇଣ୍ଡିଜ୍ ୨ ଓଭର କମ୍ କରିଥିବା ଜଣାପଡ଼ିଛି।
ଶନିବାର ମ୍ୟାଚ୍ ଶେଷ ହେବା ପରେ ମ୍ୟାଚ୍ ରେଫରି ପ୍ରକାଶ ଭଟ୍ଟ ଏହି ଜରିମାନା ଲଗାଇଥିଲେ। ଉଭୟ ଦଳର ଅଧିନାୟକ ନିଜ ଦୋଷ ସ୍ୱୀକାର କରି ଜରିମାନାକୁ ମାନି ନେଇଥିଲେ। ତେଣୁ ଏହି ମାମଲାରେ ଅଲଗା ଭାବେ ଶୁଣାଣିର ଆବଶ୍ୟକତା ପଡ଼ିନଥିଲା। ମ୍ୟାଚ୍ର ଅମ୍ପାୟରମାନେ ସ୍ଲୋ ଓଭର ରେଟ୍ ନେଇ ଅଭିଯୋଗ ଆଣିଥିଲେ।
ଏହି ମ୍ୟାଚ୍ରେ ୱେଷ୍ଟଇଣ୍ଡିଜ୍ ୩୫୨ ରନ୍ର ଲକ୍ଷ୍ୟକୁ ପିଛା କରି ବିଜୟ ହାସଲ କରିଥିଲା | ଶାଇ ହୋପ୍ ଅପରାଜିତ ୧୬୨ ରନ୍ କରି ଦଳକୁ ଜିତାଇବାରେ ବଡ଼ ଭୂମିକା ନେଇଥିଲେ। ଏହା ପୁରୁଷ ଦିନିକିଆ କ୍ରିକେଟ୍ରେ ୱେଷ୍ଟଇଣ୍ଡିଜ୍ର ସବୁଠାରୁ ବଡ଼ ସଫଳ ରନ୍ ପିଛା ଥିଲା। ଏବେ ଭାରତ ଓ ୱେଷ୍ଟଇଣ୍ଡିଜ୍ ମଧ୍ୟରେ ୫ଟି ମ୍ୟାଚ୍ର ଟି-୨୦ ସିରିଜ୍ ଆରମ୍ଭ ହେବ। ଏହାର ପ୍ରଥମ ମ୍ୟାଚ୍ ମଙ୍ଗଳବାର ଲକ୍ଷ୍ନୌରେ ଖେଳାଯିବ।
