Bengaluru Transformer Blast: ଫୁଟପାଥରେ ହଠାତ୍ ବିସ୍ଫୋରଣ, ଦୁଇ ପଥଚାରୀ ଆହତ; ଭିଡିଓ ଭାଇରାଲ୍
ବେଙ୍ଗାଲୁରୁ: ବେଙ୍ଗାଲୁରୁର ବାଗଲୁର ମୁଖ୍ୟ ରାସ୍ତାରେ ବୁଧବାର ସକାଳେ ଏକ ଟ୍ରାନ୍ସଫର୍ମର ବକ୍ସ ହଠାତ୍ ବିସ୍ଫୋରଣ ହେବାରୁ ଆତଙ୍କ ସୃଷ୍ଟି ହୋଇଛି। ଆମାଜନ୍ କାର୍ଯ୍ୟାଳୟର ଗେଟ୍ ନମ୍ବର-୩ ନିକଟ ଫୁଟପାଥରେ ଲାଗିଥିବା ଏହି ଟ୍ରାନ୍ସଫର୍ମରରେ ପ୍ରାୟ ସକାଳ ୯ଟା ୪୯ ମିନିଟ୍ରେ ହଠାତ୍ ବିସ୍ଫୋରଣ ହୋଇଥିଲା। ଏହି ସମୟରେ ଫୁଟପାଥରେ ଯାଉଥିବା ଦୁଇ ଜଣ ପାଦଚାରୀ ଆହତ ହୋଇଛନ୍ତି। ଜଣେ ବ୍ୟକ୍ତିଙ୍କ ହାତରେ ଗୁରୁତର ପୋଡ଼ା ଆଘାତ ଲାଗିଥିବା ବେଳେ ଅନ୍ୟଜଣଙ୍କୁ ସାମାନ୍ୟ ଆଘାତ ଲାଗିଛି। ନିକଟରେ ଯାଉଥିବା ଜଣେ ଛାତ୍ରୀ ଅଳ୍ପକେ ବର୍ତ୍ତି ଥିବା ଜଣାପଡ଼ିଛି।
ବିସ୍ଫୋରଣର ଭୟଙ୍କର ଦୃଶ୍ୟ ଏକ କାରର ଡ୍ୟାସ୍କ୍ୟାମେରାରେ କଏଦ ହୋଇଛି। ଭିଡିଓରେ ଜଣେ ପାଦଚାରୀ ଟ୍ରାନ୍ସଫର୍ମର ନିକଟରେ ଯାଉଥିବା ବେଳେ ହଠାତ୍ ଏଥିରୁ ନିଆଁ ଓ ଧୂଆଁ ବାହାରୁଥିବା ଦେଖାଯାଉଛି। ବିସ୍ଫୋରଣର ଝଟକାରେ ପାଦଚାରୀ ଜଣକ ତଳେ ପଡ଼ିଯାଇଥିଲେ। ଆହତମାନଙ୍କୁ ଚିକିତ୍ସା ପାଇଁ ହସ୍ପିଟାଲ୍କୁ ନିଆଯାଇଛି। ଘଟଣାସ୍ଥଳ ଯେଲାହଙ୍କା ଓଲ୍ଡ ଟାଉନ୍ ଥାନା ଅଧୀନରେ ଥିବା ବେଳେ ବିଦ୍ୟୁତ୍ ଦୋଷର ପ୍ରକୃତ କାରଣ ନେଇ ତଦନ୍ତ ଜାରି ରହିଛି।
ଫୁଟପାଥ ଭଳି ଲୋକଙ୍କ ଚଳାଚଳ ଅଞ୍ଚଳରେ ଟ୍ରାନ୍ସଫର୍ମର ଲାଗିଥିବାରୁ ଏହି ଘଟଣା ପରେ ବିଦ୍ୟୁତ୍ ଭିତ୍ତିଭୂମିର ସୁରକ୍ଷା ଓ ରକ୍ଷଣାବେକ୍ଷଣକୁ ନେଇ ପ୍ରଶ୍ନ ଉଠିଛି। ବିଶେଷକରି ସ୍କୁଲ୍ ପିଲା ଓ ପାଦଚାରୀଙ୍କ ଚଳାଚଳ ଅଧିକ ଥିବା ସ୍ଥାନରେ ଏଭଳି ବିଦ୍ୟୁତ୍ ଉପକରଣର ସୁରକ୍ଷା ବ୍ୟବସ୍ଥା କେତେ ମଜବୁତ, ତାହା ନେଇ ଚିନ୍ତା ବଢ଼ିଛି। ବେଙ୍ଗାଲୁରୁରେ ୨୦୨୨ରେ ମଧ୍ୟ ଏକ ଟ୍ରାନ୍ସଫର୍ମର ବିସ୍ଫୋରଣରେ ବାପା-ଝିଅଙ୍କ ମୃତ୍ୟୁ ଘଟିଥିଲା। ଏହି ପୁରୁଣା ଘଟଣା ପରେ ପୁଣି ଏଭଳି ଦୁର୍ଘଟଣା ସହରର ବିଦ୍ୟୁତ୍ ସୁରକ୍ଷାକୁ ନେଇ ଚର୍ଚ୍ଚା ବଢ଼ାଇଛି।
